Die verwagte staking deur petroljoggies is opgeskort, het ’n amptenaar van die National Union of Metalworkers (Numsa) Maandag gesê.
‘n Amptelike stakingskennisgewing aan werkgewers is nog nie uitgereik nie, sê Castro Ngobese, ’n woordvoerder.
Werkgewers het hul “bereidheid om verder te onderhandel” verklaar nadat hulle met die staking gedreig is.
Numsa sal Woensdag en Donderdag met die Vereniging van Brandstofkleinhandelaars (FRA) en die Kleinhandelmotorbedryf (RMI) ontmoet.
“Ons ondersteun die proses van konstruktiewe onderhandeling,” het Ngobese gesê.
Daar is 72 000 petroljoggies en ander werkers in die motorbedryf. Numsa het verlede week gesê dat onderhandelings in Julie skipbreuk gely het.
Die eerste fase van die loononderhandelinge het reeds in Mei begin.
Numsa, wat sowat 100 000 werkers in die kleinhandel-motorbedryf verteenwoordig, eis ‘n minimumsalaris van R6 000 per maand.