Daar sal 'n regering van nasionale eenheid wees met Robert Mugabe as staatspresident en Morgan Tsvangirai as uitvoerende eerste minister.
Die regering sal ook twee adjunkpresidente en twee adjunk-eersteministers bevat. Mugabe sal sy huidige twee adjunkte, Joyce Mujuru en Joseph Msika, behou terwyl Tsvangirai een van die twee adjunk-eersteministers sal aanstel met die ander wat van Arthur Mutambara se splintergroep van die Beweging vir Demokratiese Verandering afkomstig sal wees.
Mbeki het die aankondiging in Harare gemaak en al drie partye, ook dié van Arthur Mutambara se wegbreekfaksie, vir hul samewerking geprys.
Mbeki het die hoop uitgespreek dat die wêreld die ooreenkoms sal steun en dadelik sal begin help met stappe om die mense se nood in Zimbabwe te verlig. Suid-Afrika sal alles in sy vermoë doen om onmiddellike gevolg te gee aan planne om ekonomiese herstel in Zimbabwe te bewerkstellig.