Zimbabwiese skole is 'n "nasionale ramp" met bywoning wat afgeneem het tot slegs 20% en byna alle landelike klaskamers wat toe is weens 'n gebrek aan onderwysers, het die VN se Kinderonderrigfondsagentskap (Unicef) Vrydag gesê.
Unicef het Zimbabwe se nuwe regering van nasionale eenheid (RNE) aangemoedig om onmiddellik te werk om die nasionale onderwysstelsel, wat voorheen een van die bestes in Afrika was, te herstel.
"Die onderwyssituasie is 'n nasionale ramp. Dit is belangrik dat die RNE op dit fokus," het Roeland Monasch, die agentskap se verteenwoordiger in Zimbabwe, gesê.
"Kinders in landelike gebiede lewe reeds op die absolute rand, baie is wese, 'n groot hoeveelheid is afhanklik van voedselhulp en dit is 'n stryd op vele fronte," het hy gesê.
"Nou word die kinders ontneem van die enigste basiese reg wat hulle vooruitsigte kan verbeter. Dit is onaanvaarbaar."
Die onderwyskrisis het verlede jaar begin toe die nasionale skoolbywoningsyfer gedaal het van 80% na 20%, het Unicef in 'n verklaring gesê.
Verlede jaar se eksamenuitslae is nog nie vrygestel nie en onderwysers in stedelike skole het gesê hulle sal slegs opdaag vir klasse indien die ouers dit kan bekostig om hulle salarisse te subsidieer met Amerikaanse dollars.
Gedurende 'n toer wat Unicef van 70 skole regoor Zimbabwe onderneem het, is daar gevind dat 66 skole gesluit en verlate was. Slegs een skool was ten volle werkend, maar dit is bygewoon deur net een derde van die normale getal skoliere.
Zimbabwe se steierende ekonomie het die meeste van die bevolking in 'n posisie gelaat waar hulle sukkel om te oorleef, terwyl die wêreld se hoogste inflasie die salarisse van onderwysers, dokters en ander professionele mense so te sê waardeloos gemaak het.