Intussen het Helen Zille, DA-leier, en Terror Lekota, Cope-leier, verlede Vrydag ’n voorlopige ooreenkoms oor samewerking goedgekeur. Die ooreenkoms is deur Cope opgestel en deur die DA verfyn.
Albei partye voel dat hulle kernwaardes deel, asook ’n gemeenskaplike visie vir Suid-Afrika se opposisiepolitiek. Die gedagte van nie-rassigheid staan sentraal vir beide die DA en Cope.
Dit volg nadat 12 partyverteenwoordigers, ses van elke party, die inisiatief geneem het om 'n verkennende gesprek van stapel te stuur
Zille, Athol Trollip en Ryan Coetzee het die DA-afvaardiging gelei, terwyl Lekota, Mbhazima Shilowa en Phillip Dexter vir Cope ingestaan het.
Shilowa, Patricia de Lille, leier van die OD en Bantu Holomisa van die UDM, het ook uitnodigings uitgestuur aan alle leiers van opposisiepartye om Dinsdag ’n vergadering in die parlement by te woon.
Volgens Beeld is die uitnodigings aanvaar en sal alle partye op die vergadering verteenwoordig wees.
Formele gesprekvoering oor die herskikking van opposisiepolitiek sal tydens die vergadering glo bespreek word.