Indië het elite veiligheidsmagte in die westelike deelstaat, Gujarat ontplooi ná ‘n intelligensieverslag aangedui het dat tien militante moontlik die grens vanaf Pakistan oorgesteek het.
Veiligheidsmaatreëls by sleutelinstansies is eweneens opgeskerp, het AFP berig.
Gujarat is die tuisstaat van die Indiese eerste minister, Narendra Modi. Die deelstaat is in 2008 deur ’n reeks bomontploffings geskud waarin minstens 45 mense dood is.
Veiligheidspersoneel het besoekers buite hotelle, rolprentteaters en winkelsentrums deursoek. Die ondersoeke is gebeeldsend.
Senior polisiebeamptes is in kennis gestel dat hulle verlof opgeskort is en dat hulle vir diens moet aanmeld. Hulle is aangesê om verdagte optrede te rapporteer.
Die vrees bestaan dat lede van die verbanne militante organisasie, Lashkar-e-Taiba, die land deur die Koesj-distrik kon binnegekom het.
Indië beskuldig Lashkar-e-Taiba (LeT) van die 2008 Mumbai-aanvalle waarin 166 mense dood is. Pakistan se regering het ook ’n verbod op LeT geplaas, maar ’n aantal van die organisasie se leiers is nog op vrye voet.
In 2002 is die deelstaat deur godsdiensgeweld geteister waarin meer as ’n duisend mense dood is. Die slagoffers was meestal van die Moslem-minderheid.