Operasie Young Eagle by die leërgevegskool op Lohatlha in die Noord-Kaap, het skeefgeloop toe ‘n soldaat beseer is.
Die Suid-Afrikaanse Nasionale Weermag is besig om sy paraatheid tydens die operasie te toets vir enige gebeurlikheid vir wanneer hulle in Afrika ontplooi word.
Sowat 1 600 soldate neem aan die oefening deel.
‘n Katroltou wat soldate moes ophys in ‘n Oryx-helikopter, het probleme gegee en ‘n soldaat getref wat daarna grond toe geval het.
Die weermagbevelvoerder Vusi Masondo sê hy is bly dat die ongeluk tydens ‘n oefening gebeur het, en nie in die slagveld nie.
Die soldaat se beserings is glo gering.
Die SA Weermag se probleme om jong wit mans te werf kan toegeskryf word aan die feit dat geen spesifieke groep ooit geteiken word nie, het Masondo by dieselfe geleentheid verklaar.
Masondo sê hulle sal ‘n werwingsveldtog van stapel stuur wat jong blankes sal teiken, om seker te maak die SANW is ten volle verteenwoordigend van die mense van Suid-Afrika, en sodoende meer geloofwaardigheid te verkry.
Masondo het bygevoeg dat dit belangrik is dat die land besef dat die SANW is ‘n nasionale bate is wat alle moontlike ondersteuning nodig het. Hy het ook gesê in hul werwing, sal hulle nie diskrimineer nie.