Etiket: gaslek

Drie geboue stort ineen na ontploffing in NY

Drie woonstelgeboue het in New York in die VSA ineengestort en ‘n vierde het aan die brand geslaan ná ‘n vermeende gasontploffing.

Brandweermanne het gesê 19 mense is beseer, waarvan vier in ‘n kritieke toestand verkeer, sommige met brandwonde aan hul lugweë.

Die burgemeester van New York, Bill de Blasio het gesê dat dit blyk dat niemand vermis word nie. ‘n Ondersoek na die voorval is aan die gang.
 
De Blasio het gesê niemand het ‘n gaslek aan die owerhede voor Donderdag se ontploffing aangemeld nie. Con Edison, die gasmaatskappy, het gesê hulle het die hele gebou Woensdag ondersoek en het geen lekkasies gevind nie.

Ooggetuies het vertel hoe bebloede inwoners uit die gebou gehardloop het en in die straat ineengesak het.

Agt mense is verlede jaar in ‘n soortgelyke voorval in die Harlem-buurt dood.

Ontploffing eis vier in NY

harlemgasDie ontploffing wat New York Woensdag geskud het, was glo te wyte aan ‘n gaslek.

Die dodetal in die gasontploffing in Harlem, in die noorde van die Amerikaanse stad, sal na verwagting nog verder styg.

Twee woonstelgeboue is slegs vyftien minute nadat ‘n gaslekkasie by die plaaslike kragverskaffer aangemeld is, deur ‘n reuse ontploffing in puin gelê.

Die geweldige slag het stukke van die gebou tot meer as 20 meter ver laat spat en inwoners het gesê dit het soos ‘n aardbewing gevoel.

Meer as 250 brandbestryders moes spook om die brand onder beheer te bring.

Die dodetal staan op vier, maar die owerhede kon nog nie vasstel hoeveel mense in die geboue was toe dit ineengestort het nie.

Na wat berig word, word nege mense tans vermis en 60 mense is in die ontploffing beseer.

‘n Opruimingsoperasie is aan die gang wat ‘n geruime tyd sal duur.