‘n Swart verdagte wat aangekla word van die verkragting van ‘n nege-jarige meisie, verskyn vandag in die Bellville landdroshof naby Kaapstad.
Die meisie het die aanval oorleef. Haar aanvaller het haar tussen die bosse langs die R300-snelweg aan die brand gesteek. Sy is Sondag lewend deur familielede gevind.
Die sewe-en-twintigjarige man het glo Saterdag die kind in ‘n oop stuk veld by Delft verkrag en daarna aan die brand gesteek.
Die polisie het die verdagte Sondag in hegtenis geneem nadat die meisie opgespoor is.
Daar was die afgelope paar weke minstens twee voorvalle waar kinders wreedaardig aangerand of vermoor is.
Die Delft-gemeenskap eis dat die regering die veiligheid in die gebied opskerp
Die verdagte word aangekla van verkragting en poging tot moord.
Lede van die buurtwag het ’n burgerlike inhegtenisneming gemaak, maar moes die verdagte toesluit om hom van die woedende Delft-inwoners te beskerm, wat self met die vermeende verkragter wou afreken.