‘n Hofaansoek om wetgewing in alle amptelike tale te laat publiseer, is deur die Gelykheidshof in Kaapstad van die hand gewys.
AfriForum het sy teleurstelling uitgespreek oor die beslissing, maar het Cerneels Lourens gelukgewens vir die “inisiatief” om die saak aanhangig te maak. Die organisasie het talle lede gewerf weens die saak.
Die blinde prokureur van Brits, Lourens het in sy aansoek aangevoer dat daar onregverdig teen hom gediskrimineer word op grond van sy taal.
Regter Bennie Griesel het beslis dat daar geen verpligting is om wetgewing in alle amptelike tale te publiseer nie.
Die adjunk uitvoerende hoof van AfriForum belas met taalkwessies, Alana Bailey sê hulle sal aanhou om Lourens se aansoek om appèl te steun.
Afriforum het lede van die publiek aangemoedig om die regskoste te betaal vir die nuwe aansoek.