Rotterdam
'n Marokkaanse immigrant is ingehuldig as die burgemeester van Nederland se tweede grootste stad in 'n betekenisvolle stap vir die integrasie van minderhede in dié multikulturele land.
Ahmed Aboutaleb, wat dubbele Nederlands-Marokkaanse burgerskap het, is die eerste Marokkaans-gebore immigrant om as 'n Nederlandse burgemeester aangestel te word. Die 47-jarige voormalige verslaggewer het as adjunk-minister in die eerste minister, Jan Peter Balkenende, se regering bedank om die leisels in Rotterdam oor te neem. Die stad van 585 000 siele het die grootste persentasie immigrante van enige groot Nederlandse stad.
Voordat hy by die nasionale regering in 2007 aangesluit het, was Aboutaleb 'n raadsheer in Amsterdam waar hy immigrante aangepor het om te integreer of pad te gee.