Die Pan-Suid-Afrikaanse Taalraad, Pansat, het Woensdag 'n besluit van die Universiteit van Johannesburg verwelkom om Sepedi, Engels, Afrikaans en Zoeloe as die amptelike tale van die instelling te aanvaar.
"Dié transformasie sal beslis werklike betekenis aan die grondwet gee deur die gelyke gebruik en genot van al die amptelike tale te bevorder," het Pansat se hoofuitvoerende beampte, Chris Swepu in 'n verklaring gesê.
"Dit gee studente ook 'n kans om te voel dat hulle ware Suid-Afrikaners is, en dit is wat mense soos Steve Biko hulle laaste asems voor gegee het."
Hy het gepraat by die bekendstelling van die nuwe taalbeleid waar Sepedi (ook bekend as Noord-Sotho of Sesotho sa Leboa), Engels, Afrikaans en Zoeloe gebruik gaan word.
Swepu sê dit was "onaanvaarbaar" dat "inheemse tale deurentyd op die rand uitgeskuif word deur instellings".
"Ons kan nie 'n situasie onderhou waar die meerderheid burgers gedwing word om hulle grondwetlike regte wat toegang tot opvoeding, geregtigheid en inligting waarborg by die hekke van hulle huise agterlaat nie. [Die huidige situasie] bevorder die historiese meerderwaardigheid van Engels en Afrikaans," het Swepu gesê.