Die polisie in Bloemfontein soek na vier swart mans in verband met ‘n gewapende rooftog by ‘n gastehuis in Universitas die naweek.
Polisiewoordvoerder, Wendy Nkabi, sê ‘n werknemer van die gastehuis, wat aan OFM-nuus bekend is, was vroegaand op pad van die kombuis na die ontvangstoonbank.
Die vier mans was reeds in die gastehuis en het die werknemer gedreig. Hulle het op geld en selfone aangedring. Dit is nog onduidelik of van die gaste wat daar tuisgegaan het ook beroof is.
Nkabi sê ‘n onbekende bedrag geld is uit die gastehuis se kluis geneem, terwyl die booswigte weg is met nog ‘n kluis en twee selfone. ‘n Klag van sakeroof word ondersoek.
Nkabi doen ‘n beroep op enigiemand met inligting om hul naaste polisiekantoor te bel.