praag.co.za

Teleurstelling dat e-tol nie geskrap word nie

Written by

praag

in

,

Daar is groot teleurstelling dat die e-tol-hersieningspaneel nie aanbeveel het dat die stelsel in Gauteng geskrap moet word nie.

Die meerderheid van mense en organisasies wat voorleggings gedoen het, het gemeen die stelsel is onregverdig en behoort laat vaar te word.

Die paneel se verslag, wat meer as 50 aanbevelings insluit, is gister deur die premier van Gauteng, David Makhura in Johannesburg bekend gemaak. Hy het gesê die stelsel plaas ʼn buitensporige las op lae- en middelklas inkomste huishoudings.

Die paneel is in Julie verlede jaar deur Makhura aangestel om die sosio-ekonomiese impak van die stelsel te ondersoek. Die paneel het sy verslag op 30 November reeds aan Makhura oorhandig, maar die inhoud daarvan is eers vandag bekend gemaak.

“In sy huidige vorm is die e-tolstelsel onbekostigbaar en onbillik,” het Makhura gesê. “Dit is ook ʼn administratiewe rompslomp.”

Makhura het die media in Johannesburg toegespreek. Hy het egter gesê die implementering van die stelsel het die ekonomie en inwoners van Gauteng bevoordeel.

Makhura het gesê die gehalte van die pad is beter, reistyd het verminder, brandstofdoeltreffendheid het verbeter, voertuie se instandhoudingskoste het verlaag en besighede se logistieke doeltreffendheid het verbeter.

“Die belangrikste aanbeveling van die paneel is dat elemente van die huidige e-tolstelsel hersien moet word om die vrae oor bekostigbaarheid, gelykheid, regverdigheid, administratiewe eenvoud en volhoubaarheid aan te spreek,” het hy gesê.

Openbare vervoerinfrastruktuur, omgewingsvolhoubaarheid en ruimtelike integrasie van die Gauteng-provinsie is ook onder die loep geneem.

Die Departement van Vervoer sê hy sal reageer op die bevindings en aanbevelings van die Gautengse hersieningspaneel deur middel van die raadplegende proses wat deur adjunk-president Cyril Ramaphosa gelei word.

‘n Woordvoerder van die departement sê hulle sal aan die proses deelneem en dat die nasionale regering daarna ‘n aankondiging sal doen.

Comments

2 responses to “Teleurstelling dat e-tol nie geskrap word nie”

  1. Rooikop Avatar
    Rooikop

    Ek het van die begin af gesê die paneel is ‘n foefie. Tipiese oëverblindery dat dit lyk of hulle iets aan die probleem doen. Die sogenaamde “opgraderings” aan Gauteng se paaie was en is nie voldoende nie. Indien hulle nuwe addisionele paaie gebou het en daarvoor tol gevra het, sou geen haan daarna gekraai het nie en baie mense sou die paaie gebruik. Hulle het egter gegaa en die bestaande paaie ‘n lagie teer gesmeer, die noodbaan nog ‘n baan gemaak en nou wil hulle dermiljoene vra vir die gebruik daarvan, en dit op so ‘n manier dat die invordering amper onbekostigbaar is en ons steed daarvoor moet opdok.

    Ek sien die e-trol in ‘n heel ander lig. Dit gaan oor die monitering van mense en voertuie se bewegings (hulle doen dit reeds met selfone in elk geval). So die ANC DURF nie hierdie aspek daarvan laat vaar nie.

    Die sogenaamde verbetering in verkeersvloei is omdat mense die pad vermy om dit tol te vermy. Volgens die grapkasse baat die mense van Gauteng by die tolstelsel. Hoewel dit waar is, is dit die HELE land wat daarby baat aangesien die verhoogde produktiwiteit in Gauteng ly tot meer inkomste wat lei tot meer belasting wat die HELE land baat.

    Die “raadplegende proses” word weer deur ons skadupresident siril gelei. Hierdie ou is gevaarlik. Kyk maar wat het by by Marikana laat gebeur. Kyk hoe het hy vir pikkefrikkeroelfie ore aangesit by Codesa.(Pikkefrikkeroelfie was in elk geval verloop en het ander planne gehad maar steeds is hulle so uitoorlê dit is nie eers snaaks nie)

    Die uiteinde gaan wees dat ons maar sal moet hoes.

  2. Riempies Avatar
    Riempies

    Hierdie Etol kan nou maar geplooi word soos hulle wil – die lank en die kort is dat daar nie met die mense wie se geld gebruik is om die ETol te bou in die saak geken is nie – wat nou eintlik hier gebeur is dat die mense wat hulle pensioen belê het nou self ook die rente daarop moet betaal. Was daar ook
    nie beweer dat daar oneerlike winsverdeling sou plaasvind nie? As ek verkeerd is kan iemand my reghelp asseblief.

Leave a Reply

More posts