Die regstryd tussen die sakeman Tokyo Sexwale, Bally Chuene en George Bizos, aan die een kant, en die Mandela-familie aan die ander, mag dalk verder vertraag word of van die rol geskrap word. Só berig die koerant New Age vandag.
Michael Hart, wat Sexwale, Bizos en Chuene verteenwoordig, sal die hof Vrydag vra om die regspan van die Mandela-familie te versoek om beantwoordende verklarings te liasseer of om die saak van die rol te skrap.
Zenani Mandela en Makaziwe Mandela, wat na bewering deur 17 familielede ondersteun word, het ‘n aansoek in die Hoëhof in Johannesburg gebring om Bizos, Sexwale en Chuene as direkteurs van Harmonieux Investment Holdings en Magnifique Investment Holdings te verwyder.
Oudpresident Nelson Mandela het die twee maatskappye in dié drie se sorg gelaat, maar die familielede voer aan dat hul aanstelling onregmatig was.
Die saak het Dinsdag nog ‘n struikelblok teëgekom toe Ismael Ayob as prokureur vir die Mandela-familie onttrek het, berig die koerant. – praag en Sapa