Hy het dit gedoen onder dwang van die ondersoekbeampte, kapt. Tsietsi Mano, het die getuie, sers. Jack Ramonyane, in die rondgaande Hooggeregshof op Ventersdorp gesê.
Die hof het gehoor dat Ramonyane twee verklarings aan die polisie gemaak het – een op die dag van die moord en een ‘n paar weke later.
Hy het verskeie besonderhede verander in die tweede verklaring.
In sy eerste verklaring het die beampte gesê Terre’Blanche se broek was halfpad afgetrek toe sy lyk gevind is, maar die tweede verklaring het dit ontken.
Hy het ook gesê die plaaswerker Chris Mahlangu het die polisie eerste gebel, maar het later gesê dit was die minderjarige.
Die twee word daarvan aangekla dat hulle die voormalige AWB-leier verlede jaar in sy plaashuis vermoor het.
Verskeie ander teenstrydighede is ook in Ramonyane se verklarings gevind.
“Jy is besig om ‘n spul leuens aan hierdie hof te vertel… jy het die ander aspekte opgemaak,” het Mahlangu se regsverteenwoordiger, Kgomotso Tlouane, gesê.
Toe die tiener se regsverteenwoordiger, Norman Arendse, oorgeneem en hom nog verder onder druk geplaas het, het Ramonyane erken hy het gelieg.
“U getuienis vandag is baie anders as u eerste verklaring,” het Arendse gesê.
Ramonyane het geantwoord: “Ja, hulle verskil hier en daar.”
“Hy [Mano] het jou aangesê om dinge te sê wat jy nie wou sê nie en hy het jou aangesê om dinge te sê wat jy nie gesien of gehoor het nie,” het Arendse gesê.
Ramonyane het geantwoord: “Dit is so”.
Die verdediging het ook Ramonyane se bewering dat Mahlangu aan hom gesê het hy wou Terre’Blanche se selfoon verkoop om die geld van uitstaande lone te kry, verwerp.
Mahlangu het gesê hy het die selfoon op die grond gevind en het dit gevat in ‘n “desperate poging” om die moord aan die polisie te rapporteer.
Mahlangu het gesê hy het die selfoon veilig in sy broeksak gehou om aan die polisie te gee. Hy het ook ontken dat hy met Terre’Blanche oor onbetaalde lone baklei het.
In ‘n verklaring wat vroeër ingedien is, het die 28-jarige Mahlangu egter gesê hy het in selfverdediging opgetree ná ‘n argument met Terre’Blanche oor lone.