Kategorie: Suider-Afrika

Noordwes-polisiebeamptes het ‘n uitnodiging na Vega Gupta se uitspattige troue opgeblaas omdat hulle gedink het dis ‘n plofbaar.

The Star berig die uitnodiging was aan die provinsiale polisiekommissaris, lt.kol. Merriam Mbombo, gerig.

Brig. Thulani Ngubane het aan die koerant verduidelik dat die pakkie verdag gelyk het.

“Ons het die uitnodiging gekry, maar Mev. Mbombo het nie ‘n uitnodiging verwag nie.

“… Dit het gelyk asof dit drade [aangeheg] gehad het en ons moes ons normale veiligheidstoetse doen.”

Ses versierde silinders was aangeheg, wat na bewering geskenke soos sjokolade bevat het.

Luidens die berig het ‘n snuffelhond ook op iets verdag afgekom.

“So ons het geen keuse gehad nie… en moes die bomeenheid inroep,” het die polisiewoordvoerder gesê.

Die Guptas het ‘n opskudding veroorsaak toe trougaste drie weke gelede vir die troue by Sun City, by die Waterkloof-lugmagbasis geland het.

Vyf hooggeplaaste amptenare en militêre personeellede is sedertdien geskors.

Verskeie regeringsdepartemente is besig om die saak te ondersoek.

Die dwelmprobleem in Eldoradopark, ‘n bruin woonbuurt suid van Johannesburg, het “abnormaliteit” bereik, het pres. Jacob Zuma Dinsdag gesê.

“Ek het die brief gelees en ek was geskok. Die graad van die probleem en die beskrywing is ongehoord… hierdie is ‘n krisis, ‘n abnormaliteit,” het Zuma aan inwoners gesê tydens ‘n besoek aan die gebied.

Bekommerde ouers het in April aan Zuma geskryf en gevra dat hy moet help. Verskeie kabinetsministers het hom vergesel tydens sy besoek.

Zuma het aan inwoners gesê dat hy persoonlik beheer sal neem oor die geveg teen dwelms in die gebied.

“Ek gaan ‘n punt daarvan maak om hierdie program self te dryf… die regering moet vinniger beweeg om dit te hanteer.”

Wetgewing rondom wetstoepassing kan moontlik aangepas word sodat kriminele nie agter tegniese aspekte van die wet kan wegkruip nie, het hy gesê.

“Ons kan nie toelaat dat hierdie dwelmbase beheer oor ons gemeenskappe neem en agter tegniese aspekte van die wet wegkruip nie.”

Twee mans is intussen in hegtenis geneem nadat die polisie Dinsdagaand toegeslaan het op ‘n dwelmlaboratorium in Boksburg aan die Oos-Rand, het die Valke gesê.

Kapt. Paul Ramaloko, woordvoerder van die Valke, het gesê beamptes het beslag gelê op toerusting waarmee dwelms vervaardig word en 150 000 Mandrax-tablette met ‘n geraamde straatwaarde van R10,5 miljoen.

Een van die mans in die laboratorium het gevlug.

Die twee mans wat in hegtenis geneem is sal Donderdag in die Boksburg-landdroshof verskyn.

Aanklagte van aanranding en roekelose en nalatige bestuur wat deur die Pretoriase fietsryer Hein van der Merwe aanhangig gemaak is, word ondersoek, het die polisie Dinsdagaand gesê.

Die fietsryer het die aanklagte aanhangig gemaak teen ‘n onbekende buitelandse diplomaat se motorbestuurder ná ‘n struweling op 8 Mei.

Brig. Phuti Setati het Dinsdag gesê die diplomaat se motorbestuurder het aanklagte van crimen injuria en intimidasie by die Brooklyn-polisiekantoor in Pretoria aanhangig gemaak.

Setati het gesê die polisie ondersoek al die aanklagte.

‘n Video van die aanranding is op YouTube gelaai.

Van der Merwe het aan die eNCA-nuuskanaal gesê die diplomaat se voertuig het ‘n stopteken op die hoek van Brooks- en Roperstraat verontagsaam en voor hom ingesny.

“In my poging om die bestuurder se aandag te kry deur langs sy venster te skree, het ek herhaaldelik geskree en in ‘n laaste poging het ek twee keer op sy kantspieël geslaan. Die voertuig het probeer om my raak te ry deur in my rigting te swenk.”

‘n Struweling het ontstaan nadat die bestuurder die diplomaat se swart Mercedes Benz langs die pad stilgehou het. In die video kan gesien word hoe die diplomaat se motorbestuurder en lyfwag die fietsryer rondpluk en op die grond vasdruk.

Setati het gesê bewerings dat polisiebeamptes wat op die toneel opgedaag het, nie vir Van der Merwe gehelp het nie, word ook ondersoek.

Hy het gesê diplomate in Suid-Afrika word beskerm deur privaat sekuriteitswagte, nie deur polisiebeamptes nie.

Setati het gesê verklarings is afgeneem en die dossiere is na die direkteur van openbare vervolging gestuur vir verdere instruksies.

Die Gupta-debakel het rassespanning tussen swartes en Indiërs verhoog.

‘n Klag van crimen injuria deur Newcastle se burgemeester Afzul Rehman, omdat hy ‘n “Gupta” genoem is, is nou opgevolg deur ‘n hete konfrontasie in Durban met die ANC oor sy “noue bande met Indiërs”.

Phumlani Mfeka, die woordvoerder van die Mazibuye Africa Forum – met meer as 1500 lede – het ‘n reeks rassebeledigings op provinsiale ANC-sekretaris Sihle Zikalala se  Facebookbladsy gelaat, en hom gewaarsku om nie “te probeer om betrokke te raak met [‘n ] samoesa in jou mond nie”.

Mfeka beweer dat die Guptas onder die talle Indiese sakemanne is, soos Schabir Shaik en Vivian Reddy, wat rykdom geniet ver bokant dié van die swart meerderheid, te danke aan hul bande met President Jacob Zuma.

“Die verhouding tussen sommige Indiese sake-individue en ons president is een wat veel te wense oorlaat.

“Hierdie sake-individue mishandel en misbruik die president se naam om hul eie selfsugtige belange te bevorder.

“[Dit] het ‘n ernstige en slegte beeld van ons president en die land as ‘n geheel geskep, in ag genome dat die ANC ingestem word deur swartes.”

ANC-woordvoerder Keith Khoza het gesê dit is verkeerd om te bepaal wie Zuma moet bevriend.

Die SA Minority Rights Equality Movement het gister gesê die Guptas is ‘n familie, nie ‘n ras nie.

“Ons sal nie om verskoning vra vir die feit dat ons Indiërs is nie,” het die beweging gesê.

Die SA Instituut vir Rasseverhoudinge se navorsingsbestuurder Lucy Holborn het gesê kompetisie vir hulpbronne het al dikwels gelei tot rassespanning, insluitend die xenofobiese geweld van 2008.

“Dit is die rede waarom die instituut teen enige beleid is wat nadeel of meriete suiwer gebaseer op ras meet.”

Die Demokratiese Alliansie het bewerings ontken dat die party befondsing van die Israeliese “lobby” ontvang.

“Die DA het nog nooit verklaar dat ons enige geld ontvang het [van die lobby] nie,” het woordvoerder Mmusi Maimane gesê.

Hy het gereageer op Cosatu se sekretaris Tony Ehrenreich, wat gesê het die DA sal nie teen die Israeliese regering optree nie, want hulle ontvang geld uit dié land.

“As die DA gekant is teen rassisme en apartheid en diskriminerende praktyke in beginsel, hoekom is hulle nie teen die apartheidpraktyke van Israel in Palestina nie?” het Ehrenreich in ‘n verklaring gesê.

“Die realiteit is dat die DA ‘n klomp geld van die Israeliese lobby kry, en daarom sal hulle nie teen die praktyke in Palestina protesteer nie.”

Ehrenreich het reageer op die party se “Ken Jou DA”-veldtog wat die rol beklemtoon wat DA-lede, of mense wat geaffilieer is by die party, gespeel het in die stryd teen apartheid.

Maimane het gesê Cosatu se opmerkings is “jammer en in swak smaak” en het gesê die vakverbond probeer om politieke punte aan te teken.

“Ons dink dat daar ‘n twee-staat-oplossing [tussen Palestina en Israel], en ‘n vreedsame oorgang moet wees soos hier in Suid-Afrika om demokrasie te bevorder.”

Ehrenreich het gesê die DA en sy leier Helen Zille moet verklaar wanneer hulle gaan “ophou om die rassisme van Israel se regering te steun en die mense van Palestina te ondersteun”.

Die twee-staat-oplossing behels die vestiging van ‘n onafhanklike Palestynse staat naas die staat van Israel in die betwiste gebied van die voormalige Britse mandaat van Palestina.

Miljoene rande is gesteel tydens ‘n rooftog by die FNB-stadion, suid van Johannesburg, het die polisie in Gauteng Maandag gesê.

“‘n Werknemer van die stadion het na bewering ná die Justin Bieber-konsert geld in die instapkluis gesit en omstreeks 23:00 gisteraand [Sondag] huis toe gegaan,” het lt. kol. Katlego Mogale, polisiewoordvoerder, gesê.

Mogale het gesê Maandagoggend toe die vrou by die werk aankom, is daar met verskeie deure wat lei na die hoofkluis gepeuter.

Volgens Mogale het die rowers toegang verkry deur ‘n toiletdak wat lei na die muur van die kluis en die kluis oopgebreek.

“Die verdagtes het toe toue gebruik om toegang vanaf die dak na die kluis te beweeg en miljoene rande kontant gesteel.”

Mogale het gesê beeldmateriaal van die rooftog word bestudeer en ‘n ondersoek is aan die gang.

Dianne Kohler-Barnard, DA-woordvoerder, het Maandag gesê die Demokratiese Alliansie “soek antwoorde oor hoekom ‘n ondersoek na Al-Kaida-bedrywighede in Suid-Afrika gestaak is”.

“Suid-Afrikaners verdien ‘n verduideliking hoekom dit gebeur het en hoekom die ondersoek gestaak is,” het sy gesê.

Kohler-Barnard, wat nie Afrikaans magtig is nie, is klaarblyklik nie bewus van berigte wat aandui dat die VSA, NAVO en Israel Al Kaida in Libië sowel as Sirië aktief ondersteun nie.

Sy het ‘n versoek gerig dat Chris Ngcobo, waarnemende hoof van misdaadintelligensie en Nathi Mthethwa, minister van polisie, dringend die kwessie met die parlementêre portefeuljekomitee bespreek.

“Dit is baie ernstige bewerings met implikasies vir nasionale veiligheid en internasionale betrekkinge, en kan nie geïgnoreer word nie. Minister Mthethwa moet in die parlement verskyn om duidelikheid oor die situasie te verskaf.”

Die Valke weier om kommentaar te lewer oor ‘n berig dat die polisie en die staatsveiligheidsagentskap (SSA) die opleiding van Al-Kaïda-“terroriste” in Suid-Afrika gemonitor het, maar niks daaromtrent gedoen het nie.

“Geen kommentaar. Dit is nie ons beleid om kommentaar te lewer oor ondersoeke wat aan die gang is nie,” het kapt. Paul Ramaloko Maandag gesê en benadruk wat hy aan Daily Maverick, wat die berig gepubliseer het, gesê het.

Die Daily Maverick berig dat die Valke se eenheid vir misdade teen die staat en die SSA aktiwiteite op ‘n plaas “naby Vlakplaas” buite Pretoria en op ‘n afgeleë plaas in die Klein Karoo gemonitor het.

Dit is nie duidelik waarom Vlakplaas relevant is tot die sogenaamde opleiding nie. Bronne het aan Praag gesê die ligging word slegs gegee om die omstredenheid te probeer verhoog.

“Operasie Kanu” is volgens die berig op die been gebring om “ekstremistiese Moslem-aktiwiteite” in Suid-Afrika te ondersoek. Dít was kort ná die aanvalle op 11 September 2001 in die VSA.

Die operasie het dieselfde tyd begin as ‘n ondersoek na sogenaamde verregse aktiwiteite, genaamd “Operasie Waco”, wat gelei het tot die Boeremag-hoogverraad-verhoor.

Dit het intussen aan die lig gekom dat die sogenaamde Boeremag ‘n intelligensie-operasie was.

Daar word dus betoog dat die staat in hierde verhoor deurgaans aan ongrondwetlike optredes skuldig is. Die billikheid van die regsproses in die Boeremagverhoor is daarom tans in gedrang en sal in die howe getoets word.

Britse en Amerikaanse intelligensie-agentskappe was uiters gretig dat die Suid-Afrikaanse regering optree teen “Moslem-terreurdreigemente”. Ingeligte bronne het aan Praag gesê dat dié lande graag terreur uitvoer sodat hulle militêr betrokke kan raak.

“Die feit dat geen bomme tot dusver in die land ontplof het nie, beteken nie die dat die bedreiging nie binne Suid-Afrika se grense bestaan nie,” het die lande gewaarsku.

Wat egter baie kommerwekkend is, is dat hierdie lande nou self aktief by Moslemterreur betrokke is in Libië en Sirië.

Volgens Daily Maverick is verskeie lede van die “invloedryke Dockrat-familie die middelpunt van die beweerde terroriste-netwerk”.

Die Dockrats het enige verbintenis met Al-Kaida of enige ander militantegroepe ontken.

Die kapitalistiese stelsel is die ware vyand in Suid-Afrika, het Cosatu se sekretaris-generaal Zwelinzima Vavi Vrydag gesê.

Probleme soos xenofobie, korrupsie, geslagsgeweld en dwelmmisbruik is gewortel in ekonomiese ellende, het hy gesê in Johannesburg.

“Al hierdie is gewortel in ‘n ander stel van drie selfs groter duiwels;. Werkloosheid, armoede en ongelykheid, wat ‘n vrugbare teelaarde vir al die ander is.”

Vavi het gepraat by ‘n seminaar aangebied deur die Universiteit van die Witwatersrand se Afrika-sentrum vir migrasie en die samelewing.

Hy het gesê die jongste syfers oor werkloosheid het aangedui dat dinge “nog erger” gaan raak.

Statistiek Suid-Afrika het vandeesweek berig dat die amptelike werkloosheidskoers in die eerste kwartaal van die jaar gestyg het tot 25,2 persent van 24,9 persent in die laaste kwartaal van 2012.

Vavi het gesê dit weerspieël nie die volle omvang van die probleem nie, omdat ontmoedigde werksoekers en diegene wat “hare op die hoek van die straat sny” nie ingesluit is nie.

Suid-Afrika het ook die mees ongelyke samelewing in die wêreld, het hy gesê.

Die “duiwel” en “ware vyand” is die kapitalistiese stelsel, wat sosiale samehorigheid ondermyn.

Hy het kommer dat ‘n voorgestelde nasionale minimum loon sal lei tot werkverliese as “propaganda en leuens” afgemaak.

“‘n Nasionale minimumloon sal ‘n beduidende stap in die rigting wees om groter sosiale samehorigheid te verseker,” het hy gesê.

Dele van Kemptonpark, oos van Johannesburg, was teen Maandagoggend steeds sonder krag ná ‘n kabel in die gebied beskadig is, het die Ekurhuleni-munisipaliteit gesê.

Tegnici het nog ‘n dag nodig om die skade te herstel, het Sam Modiba, ‘n woordvoerder, in ‘n verklaring gesê.

Dele van Van Riebeeckpark, Terenure, Birch Acres en Edleen het sedert Sondagmiddag nie krag nie, ná ‘n kontrakteur ‘n kabel by ‘n kruising beskadig het.

Die kabel, ‘n voerkabel wat met olie gevul is, neem langer om te herstel as gewone kabels.

Modiba het gesê die krag sal na verwagting weer Dinsdagmiddag aangeskakel word.

Die Ekurhuleni-munisipaliteit het vir die ongerief om verskoning gevra.

“As die kragtoevoer nie herstel word in die gegewe tyd nie… verseker die [Ekurhuleni-munisipaliteit] verbruikers dat hy sal voortgaan met werk tot alle gebiede weer elektrisiteit het,” het hy gesê.

‘n Streeksorganiseerder van die vakbond Amcu in Noordwes is Saterdag by ‘n sjebeen naby Amplats se Khomani-myn in Rustenburg doodgeskiet.

Die man sou ook na verwagting in die Marikana-saak getuig.

Vier verdagtes het die man in die sjebeen genader waarna hy vier keer geskiet is, het die polisie aan eNCA bevestig.

Sy naam sal nie bekend gemaak word voor sy familie nie ingelig is van die voorval nie.

‘n Tradisionele geneesheer wat ook glo by die Marikana-voorval betrokke was, is in Maart doodgeskiet.

Die vakbond, AMCU, het ‘n pleidooi by sy lede gelewer om nie die dood van ‘n vakbondlid te wreek nie. 

Die moord volg te midde van spanning wat hoog loop weens werkverliese en salarisonderhandelings. AMCU is van plan om vandag ‘n nuuskonferensie te hou.

Die vakbond het verlede jaar duisende ontevrede lede van die N.U.M weggerokkel.

Meer as 50 mense is verlede jaar in arbeidsverwante geweld by platinummyne dood. Waarnemers is bekommerd dat die jongste moord geweld kan aanblaas nadat Anglo American Platinum Vrydag werksverliese aangekondig het.