Nuus Archives - Page 722 of 1583

Cosatu ruk op na Swartruggens-tolhek

Cosatu sê die betoging wat by die Swartruggens-tolhek in die Noordwes beplan word, sal Vrydag voortgaan.

Solly Phetoe, die vakverbond se provinsiale sekretaris, sê die protesoptog sal voortgaan ten spyte van terugslae om die polisie se toestemming te kry.

Cosatu wou verlede week ‘n deurnagbetoging hou om te eis dat tolgeld of geskrap word, of van R71 na R20 vir ‘n gewone motor verminder word.

Die vakbondfederasie is nie toegelaat om dié optog te hou nie, maar het toestemming gekry om die betoging Vrydag te hou.

“Ons sal na die tolhek opruk en antwoorde eis oor die memoranda wat aan die departement van vervoer en Sanral oorhandig is… aangesien dit ‘n sosiale las op arm mense is…”

Александр Фильчаков

Britte sit op twee stoele oor EU

Brittanje se premier, David Cameron, het Donderdag gesê Brittanje wil nie sy rug op Europa draai nie.

Dit volg nadat hy sy vennote in die Europese Unie (EU) ontstig het met ‘n aankondiging dat hy ‘n referendum oor lidmaatskap in die vooruitsig stel.

Cameron het volgehou dat sy voorneme om die Britte teen die einde van 2017 oor die kwessie te laat stem, nie buitelandse beleggers sal afskrik nie. Hy het dit in ‘n toespraak Woensdag in Londen verduidelik.

“Dit gaan nie daaroor dat ons ons rug op Europa draai nie – eintlik is dit die teenoorgestelde,” het Cameron aan die Wêreld- Ekonomiese Forum in Davos gesê.

“Dit gaan oor hoe ons ‘n saak maak vir ‘n meer mededingende, oop en buigbare Europa en om Brittanje se plek daarbinne te verseker.”

Cameron het volgehou dat dringende hervomings in die EU nodig is.

“Wat ek voorstel is nie net verandering vir Brittanje nie, maar ook verandering vir Europa,” het die Britse premier gesê.

“Ons moet eerlik wees oor ons vertoning. Ons raak agter in die wêreld. Ons oor-reguleer ons ondernemings, ons voeg te veel by hul kostes by. Ons laat ons burgers agter.”

Brittanje het egter byna geen invloed meer in die EU se besluite en koers nie, en word toenemend gemarginaliseer, sê waarnemers.

Apokalips kom weens antibiotikum-weerstand, waarsku kenner

Brittanje se mees senior mediese adviseur het LP’s gewaarsku dat die styging in antibiotikum-weerstandige siektes ‘n nasionale noodtoestand wat vergelykbaar is met ‘n katastrofiese terreuraanval, pandemiese griep of groot kusoorstromings kan veroorsaak.

Dame Sally Davies, die hoof mediese beampte, het gesê die bedreiging van infeksies wat weerstand teen antibiotika bied is so ernstig dat die kwessie bygevoeg moet word by die regering se nasionale risikoregister van siviele noodgevalle.

Sy beskryf wat sy ‘n “apokaliptiese scenario” noem waar mense gaan vir eenvoudige operasies oor 20 jaar en dan sterf van roetine-infeksies “want ons antibiotika het opgeraak”.

Lees hier.

Фильчаков

Amerikaanse vroue na frontlinies

Vroue in die Akerikaanse weermag sal binnekort amptelik die geleentheid kry om in die voorste linies van die land se oorloë te dien.

Leon Panetta, in een van sy laaste besluite as President Obama se verdedigingsekretaris, sal die huidige beleid aanpas, wat honderde duisende frontlinieposisies en elite kommandoposte na meer as ‘n dekade van oorlog sal oopstel vir beide geslagte, het die Pentagon Woensdag bevestig.

Die innoverende skuif is ‘n omkeer van ‘n 1994-reël wat die verbod teen vroue in dié rol bekragtig. Panetta se besluit gee die weermag tot Januarie 2016 om spesiale uitsonderings te formuleer indien hulle glo dat enige poste vir vroue verbode moet bly.

Sommige frontlinie militêre rolle mag so gou as hierdie jaar oopgestel word vir vroue. Assessering vir ander, soos spesiale operasies, vir die Navy Seals en die weermag se Delta Force, kan langer neem.

Hierdie besluit kan meer as 230,000 poste – baie in die Infanterie en Mariene-eenhede – oopstel vir vroue.

Senator John McCain, R-Ariz., het gesê hy ondersteun Panetta se besluit.

“Die feit is dat Amerikaanse vroue reeds diens verrig in doodsgevaar vandag oor die hele wêreld en in elke afdeling van ons gewapende magte,” het hy gesê in ‘n verklaring. “Baie het die hoogste offer gebring, en ons nasie is aan hulle ‘n diepe dankbaarheid verskuldig.”

Vroue dien reeds as dokters, militêre polisielede en intelligensie amptenare, maar nie formeel nie, in eenhede op die voorste linies.

Vroue maak 14 persent uit van die 1,4 miljoen aktiewe militêre personeel.

Panetta sal nie aanbly as Obama met sy tweede termyn begin nie, en die voormalige Sen. Charles Hagel is genomineer om Panetta se plek te neem.

Zuma prys Charlize

President Jacob Zuma het die Suid-Afrikaans gebore aktrise Charlize Theron Woensdag gelukgewens en die Wêreld Ekonomiese Forum se kristal-toekenning vir haar humanitêre werk aan haar oorhandig.

“Ons is trots op ons Charlize,” het Zuma in ‘n verklaring gesê.

“Sy het daarin geslaag om in ‘n uiters mededingende omgewing opgang te maak, en is ‘n sigbare en hardwerkende ambassadeur vir haar land.”

Die Charlize Theron Afrika Uitreik Projek finansier programme wat ontwerp is om die verspreiding van MIV onder jong Afrikane teverhoed, veral in Suid-Afrika.

Die programme sluit mobiele gesondheidsdienste in ‘n verarmde streek van Suid-Afrika in.

Zuma het gesê hy het Theron sydelings by die konferensie in Switserland Woensdag ontmoet, en sy het hom oor haar werk ingelig.

“Ek het haar verseker dat Suid-Afrikaners lief vir haar is en ons wens haar alles van die beste toe,” het hy gesê.

“Ons wens haar sukses in elke onderneming sy aanpak.”

Die toekenning is Dinsdagaand aan haar oorhandig.

Verlede jaar het die toekenning het gegaan aan Suid-Afrikaanse sanger Yvonne Chaka Chaka, vir “die gebruik van haar kuns om die toestand van die wêreld te verbeter”.

Sasolburg kalm

Die polisie het die oproer in die Zamdela-lokasie by Sasolburg Donderdag weer onder beheer gebring n weerwil van ‘n nag van geweld. Vier oproeriges is gedurende die afgelope drie dae doodgeskiet.

‘n Polisiewoordvoerder het aan Sapa gesê die situasie is onder beheer, maar bly steeds gespanne.

‘n Huis is oornag oproeriges onder die klippe gesteek en ‘n brand is by ‘n konstruksieterrein gestig, het konst. Peter Kareli gesê. Dié voorvalle was glo “krimineel gemotiveer”.

Polisielede is blykbaar deur die oproeriges geteiken. ‘n Polisiebeampte het bevestig dat van die polisielede se huise aangeval is en sommige se privaat voertuie is Dinsdag by die Zamdela-polisiekantoor beskadig toe inwoners die polisiekantoor gestorm het.

Daar is 261 mense gearresteer, onder wie 23 in hegtenis geneem in ‘n opvolgpolisie-operasie.

Woensdag het 39 gemeenskapslede in die Sasolburg-landdroshof op aanklagte van openbare geweld verskyn, en 10 is op waarskuwing vrygelaat is.

Die oorblywendes sal op 30 Januarie weer in die hof verskyn.

Oproeriges in Sasolburg het glo gister gedreig om die huis in Parys van Ace Magashule, Vrystaatse premier, af te brand.

Oupa Khoabane, die ANC se woordvoerder in die Vrystaat, het bevestig die party is bewus van dié dreigemente, maar wou nie daarop kommentaar lewer nie.

Die plunderaars het hul fokus eergisternag na Magashule se huis in sy tuisdorp, Parys, verskuif nadat hulle miljoene rande se skade in Sasolburg aangerig het.

Die geweld is oënskynlik gemik teen die samesmelting van die Parys- en Sasolburg-munisipaliteite.

Dit gaan egter nie oor die beplande herafbakening nie, maar dat die huidige ANC-leierskap groot geldelike voordeel sal trek uit ‘n samesmelting.

Die opstand is waarskynlik te wyte aan die naderende Vrystaatse leierskonferensie, nadat die eerste een, wat in Junie verlede jaar gehou is, deur die konstitusionele hof ontbind is.

Die nuwe konferensie sal op 23 Februarie in Parys plaasvind.

EU staak verskeping van chemiese doodstrafmiddels

Viëtnam sal in die toekoms sy eie chemiese middel vir teregstellings vervaardig nadat fabrieke in die Europese Unie die verskeping daarvan belet het weens teenkanting teen die doodstraf, het die Associated Press Donderdag berig.

Dié land het die gebruik van vuurpelotons in 2011 gestaak weens kommer dat dit die soldate traumatiseer. Die regering het verlede jaar gesê 532 mense kon nie tereggestel word nie omdat middels vir die dodelike inspuiting nie beskikbaar is nie.

Volgens ‘n berig in die Laborer-koerant het die minister van openbare sekuriteit, Tran Dai Quang, gesê Viëtnam sal sy eie middels vervaardig. Die berig het nie verder uitgebrei nie.

Fabrieke in die Europese Unie is die hoofverskaffer van chemiese middels vir teregstellings.

Verskeie state in Amerika beweer ook dat besware van EU-fabrieke dit moeilik maak om die middels te bekom.

ANC kritiseer bank se negatiewe houding

Die presidensie het Woensdag teleurstelling en verbasing uitgespreek oor FNB se advertensieveldtog.

“Ligsinnige advertensies wat ‘n haat vir die regering of die regerende party uitspreek sal ons nie help om die land se ontwikkelingsdoelwitte te bereik nie,” het hy in ‘n verklaring gesê.

“Die presidensie is teleurgesteld en verras deur die eensydige veldtog.”

Die veldtog bestaan uit verskeie video’s van kinders in skooluniforms wat hul hoop vir die land uitspreek.

“Die land word deur armoede oorrompel… terwyl [pres.] Jacob Zuma sy huis laat opknap,” het een jeugdige van KwaZulu-Natal gesê.

‘n Universiteitstudent van Gauteng het gesê: “Die regering dink net aan hulself… Ek is van ‘n plattelandse gebied en die regering sien nie wat gebeur nie.”

Collins Chabane, die minister in die presidensie, het gesê die huidige globale ekonomiese krisis bedreig werke en mense se lewensbestaan.

“Nou is die tyd vir alle sektore van die samelewing om saam te staan om die uitdagings van armoede, ongelykheid en werkloosheid te teiken. Dit is ons gemeenskaplike vyand as die mense van Suid-Afrika.”

Hy sê sterk vennootskappe met die Nasionale Ekonomiese Ontwikkelings- en Arbeidsraad (Nedlac), die regering-, arbeid-, sake- en gemeenskapsektors is nodig om gesamentlike groei te bevorder.

Hy sê probleme in die mynsektor en werksverliese is waarop mense moet fokus.

“Daardie is die kwessies waarop ons ons aandag moet vestig, hoe om vas te klou aan die werke wat ons het, terwyl ons nuwes skep, eerder as om voort te gaan met die gevaarlike veldtog om negatief oor die land te praat tydens ‘n globale ekonomiese krisis.”

Treine aan die brand gesteek

Twee treinwaens is by die Croesus-treinstasie in Johannesburg aan die brand gesteek, het Metrorail Woensdag gesê.

Die waens was deel van ‘n trein wat Dinsdagaand na Braamfontein op pad was, het ‘n woordvoerder van Metrorail, Lawrence Venkile, gesê.

“Geen beserings is aangemeld nie, maar voorlopige ondersoeke dui dat brandstigting die oorsaak kon wees.”

Drie treinwaens is Dinsdagmiddag by die Woodstock-stasie in Kaapstad vernietig. Vier pendelaars is beseer en is na die Groote Schuur-hospitaal geneem.

Metrorail sê beide brande was waarskynlik weens brandstigting.

Mosenngwa Mofi, uitvoerende hoof van Metrorail, sê die maatskappy doen ‘n beroep op hulp van alle wetgewers om ‘n einde te bring aan die vernietiging van sy bates.

топкарго

Anti-apartheidshospitaal sluit

Personeel by die McCord-hospitaal in KwaZulu-Natal het kennisgewings ontvang dat die hospitaal in Maart gaan sluit, berig die Sunday Times.

Dít volg ná die provinsiale departement van gesondheid se aankondig dat hy nie meer jaarliks die hospitaal van ‘n subsidie sal voorsien nie.

“McCord het nie ‘n aanduiding ontvang dat sy befondsing hernu gaan word nie. Weens dié verlies verloor McCord sy lisensie om as ‘n staatsondersteunde hospitaal te bedryf en sal dit nie kan bekostig nie,” het Kevin Smith, hoof-uitvoerende beampte van die hospitaal, gesê.

Patrick Bond, direkteur van die Centre for Civil Society aan die Universiteit van KwaZulu-Natal, sê die sluiting van McCord is ‘n aanklag teen die Suid-Afrikaanse sowel as die Amerikaanse regerings.

“Dit is regtig skokkend … dit weerspieël ‘n kombinasie van die absolute onsensitiwiteit van die eerstens die Obama- en dan die Zuma-administrasies,” het hy gesê. “Ironies genoeg, was McCord een van die hoogste profiel Vigs-klinieke wat mense soos Paul Farmer – ‘n beroemde Harvard dokter – en Jim Yong Kim, nou Wêreldbankvoorsitter, hier in Durban gevier het deur hul Partners in Health-netwerk.”

Die Amerikaanse president se Noodplan vir Vigs, die PEPFAR-program, het voorheen McCord as ‘n begunstigde ingesluit.

Suid-Afrika het in die loop van 10 jaar byna R25 miljard van PEPFAR ontvang, om MIV/Vigs-voorkoming, sorg en behandeling te ondersteun. Maar verlede jaar het die Obama-administrasie planne aangekondig om befondsing vir PEPFAR te sny om op tuberkulose en malaria te konsentreer.

McCord is een van die grootste hospitale in KwaZulu-Natal en bestaan uit 140 beddens en 400 personeellede. Die hospitaal bedryf ook die land se grootste MIV-sorg- en behandelingsprogram.

Volgens die koerant sal alle gesondheidsdienste by die hospitaal op 31 Maart opgeskort word.

Pasiënte sal na ander staatsondersteunde hospitale in Durban verwys word.

Sibongiseni Dhlomo, provinsiale minister van gesondheid, wou nie kommentaar lewer oor die kwessie nie.

Die hospitaal se geskiedenis is nóú verweef met die stryd teen apartheid, “vir die Zoeloe-mense”. McCord het in die verlede onder skoot gekom weens hul minagting van die Groepsgebiedewet. Onder die Wet het Verwoerd die hospitaal uitgesonder as problematies.

In Februarie 1963 het die Post-koerant ‘n voorblad gedra wat na die hospitaal as die “People’s Hospital” verwys, in kritiek teen die voorstel dat hulle na ‘n tuisland behoort te verskuif.

Dié Durbanse hospitaal het toe volgens sy ondersteuners “alle rassistiese teorieë verkeerd bewys”.