Dit lyk asof die huwelik van die onlangs vrygelate Franse gyselaar in Colombia, Ingrid Betancourt, iets van die verlede is.
Haar man Juan Carlos Lecompte het aan 'n Colombiaanse koerant erken dat Ingrid se liefde vir hom gedurende haar sesjaarlange aanhouding deur rebelle kon verdwyn het.
Ten tye van die G8-vergadering in Japan, het die Britse eerste minister Gordon Brown gister na die regering van Zimbabwe as 'n kriminele kabaal wat die mag gesteel het, verwys.
Brown is bemoedig deur die G8-leiers se besluit om sanksies teen Harare te ondersteun. Hy het gesê dat hy hoop dat die hele internasionale gemeenskap dit nou moontlik sal vind om die onwettige bewind in Zimbabwe te verwerp en om die druk van die wêreld duidelik te maak sodat daar so gou moontlik na 'n oorgang in Zimbabwe beweeg kan word.
Die sanksies waartoe die G8 hulself verbind het sluit sulke maatreëls in soos 'n wapenboikot en die bevriesing van Mugabe en dertien van sy binnekringlede se bates.
'n Bende skakers het hulle Moses Dinsdagaand in Kemptonpark teëgekom toe hulle moes bes gee in 'n skietgeveg.
Hulle het twee jong dames by 'n motorhek voorgelê.
Die vriend van een van die twee vroue sê hy het 'n voorgevoel gehad en hy het vir hulle in die huis gewag met sy pistool in die hand.
Nadat hy skote gehoor het, het hy uitgestorm en gesien hoe die verdagtes op die vroue skiet.
Hy het die skakers probeer verdryf deur 'n waarskuwingskoot af te vuur.
Toe die skakers op hom geskiet het, het hy hulle vuur beantwoord.
Twee verdagtes het hulleself uit die voete gemaak in 'n voertuig. Een het weggehardloop en 'n vierde het homself doodgeskiet toe die sekuriteit opgedaag het.
Die lyk van die verdagte wat weggehardloop het, is gisteroggend in 'n boom gevind.
Die jaarlikse groei in eiendomspryse in Brittanje het verder afgeneem gedurende Mei, volgens statistiek wat gister deur die regering vrygestel is.
Op ʼn jaar tot jaar grondslag , het huispryse met slegs 3,7% gegroei, teenoor 4,9% die vorige maand. Vir die maand van Mei het huispryse met 0,3% gedaal, en staan die gemiddelde huisprys nou op £218,151.
Daar is nou baie druk op die Bank van Engeland om rentekoerse te verlaag, maar vanweë stygende inflasie sal rentekoerse heel waarskynlik nie vinnig daal nie.
Volgens ander opnames is die afname in eiendomspryse nog skerper. Nationwide Building Society het ʼn 6,3% jaarlikse afname in huispryse gerapporteer in Junie, die swakste vertoning sedert Desember 1992.
Ten minste twee polisiemanne is dood toe gewapende aanvallers buite die Amerikaanse ambassade in Istanboel op hulle losgebrand het, berig CNN in Turkye.
Televisiebeelde het vier liggame op die grond voor die ambassadestruktuur se hoë muur getoon.
Die Amerikaanse ambassade het gesê dat dit van 'n voorval naby die Istanboelkonsulaat bewus is, maar het nie verdere besonderhede verskaf nie.
Turkye het oor die jare gewapende aanvalle van 'n verskeidenheid groepe verduur, waaronder Maoïste, Trotskiïste, Koerdiese separatiste en Islamitiese militantes.
Die Nasionale Vervolgingsgesag het vandag aangekondig dat New Clicks Holdings wat as Musica handel dryf daaraan skuldig bevind is dat hy in vervalste goedere handel gedryf het, in 'n saak wat suksesvol deur die Gespesialiseerde Handelsmisdaadeenheid vervolg is.
Musica het speletjiesprodukte van Sony wat egter deur 'n plaaslike beslote korporasie pleks van die gemagtigde agent Ster-Kinekor verkoop is, aangekoop.
Die vonnisoplegging sal op 6 Augustus 2008 plaasvind.
Weens slegte weer het Cosatu besluit om sy beplande opmars na die parlement om beswaar te maak teen stygende elektrisiteits- en voedselpryse te kanselleer. Cosatu het vroeër aangekondig dat die betogings in Kaapstad en Durban as 'n volle eendagstaking gesien moet word.
Hy het gesê die organiseerders is ingelig dat die luisprekerstelsel wat op vragmotors gemonteer is in die reën die gevaar van elektriese skokke vir die sprekers inhou en daarom is besluit om die buitemuurse betoging af te las.
Suid-Afrika se reële bruto nasionale produk teen markpryse het op van kwartaal tot kwartaal op 'n seisoenaangepaste jaargrondslag met 2,1% in die eerste kwartaal van 2008 gestyg vanaf 5,3% in die vierde kwartaal van 2007.
Dis die laagste groeie sedert die derde kwartaal van 2001 toe die seisoenaangepaste reële BNP 1,1% was.
Die nie-seisoenaangepaste jaar-tot-jaar BNP in die eerste kwartaal word egter op 4,0% beraam teenoor 4,6% in die vierde kwartaal.
Tieners boots die Israeli-Palestynse oorloë na in arm Paryse voorstede soos wat rassespanning in Frankryk verhoog.
Verlede maand is 'n 17-jarige Joodse seun bewusteloos geslaan deur 'n bende swart en Arabiese tieners. Die polisie is steeds op soek na die aanvallers.
Die noordelike voorstede het die hoogste werkloosheidsyfer in Parys, met die jongste bevolking, asook hoë konsentrasies Arabiere en swartes in gesubsidieerde woonstelblokke.
Rusland het 'n nuwe nasionale vakansiedag verklaar om die dalende bevolking te stuit. Dit word die dag van die gesin, liefde en getrouheid
genoem.
Die nuwe vakansiedag het ten doel om paartjies aan te moedig om nie net kinders te hê nie, maar ook om die kinders van 'n stabiele gesinslewe met twee ouers te voorsien.
Die regering wil moraliteit en optimisme oor Rusland se toekoms bevorder.
Volgens die Kremlin is die dag die breinkind van Swetlana Medwedef, Rusland se presidentsvrou.
Die nuwe vakansiedag word op die dag van die beroemde Russies-ortodokse heiliges Fewronia en Pitor gehou.
Hulle word as die beste voorbeeld van 'n gelukkige huwelik beskou.
