Mantashe klap die sweep

Die ANC-Jeugliga moet die besluit om sy leier, Julius Malema, te skors gehoorsaam, het Gwede Mantashe, sekretaris-generaal van die ANC, Donderdag gesê.

“Sodra ‘n besluit deur ‘n hoër liggaam geneem is, is dit bindend vir alle laer vertakkings. Of jy nou dink dit is laf of oningelig, dit is ‘n besluit en dit kan nie geweier word nie,” het hy gesê.

Mantashe, wat ook die voorsitter van die SAKP is, het gepraat by ‘n vergadering van die Jong Kommunisteliga by die Universiteit van die Witwatersrand in Johannesburg.

Hy het gesê die ANC-Jeugliga wat in 1944 gestig is, verteenwoordig ‘n “meningsvormer” binne die ANC.

“Jy kan nie sommer sê jy is ‘n meningsvormer nie, jy moet dit verdien. Die Jeugliga van 1944 het die intellektuele kapasiteit en die analitiese vaardigheid gehad om die ANC in ‘n spesifieke rigting te beïnvloed.”

Hy het gesê die mengsel van generasies in die ANC is nie die funksie van “verjaardae” nie, maar eerder ‘n mens se bydrae tot die party.

“Dit is nie ‘n Jeugliga wat sê maak plek, ons het gearriveer nie,” het hy gesê.

“Jy moet opkom deur die struktuur van die moeder-liggaam deur jou bydrae, nie omdat jy sê ‘dis nou ons beurt’ nie.”

Hy het gesê die ANC het verskeie lede in die 60’s en 70’s geskors nadat hulle nie wou instem om nie-swart toe te laat om by die party aan te sluit nie.

“Hulle is ná ses jaar geskors. Mense vra, ‘waarom neem julle so lank om ontwrigtende lede te skors?’. Die ANC is ‘n olifant wat stadig beweeg… ons skors nie sommer nie.”

Vroeër Donderdag het Ronald Lamola, adjunkpresident van die ANC-Jeulgiga, gesê Malema kan nie deur enigiemand behalwe die strukture van die liga uit sy posisie verwyder word nie.

“Dit is slegs die interne prosesse van die ANCYL wat kan besluit om leierskap van die ANCYL te kies of te skors,” het Lamola aan verslaggewers by Luthuli-huis in Johannesburg gesê.

“Die ANCYL sal nooit saamstem dat sy leiers aan onregverdige behandeling blootgestel word of geskors word vir eng politieke doeleindes nie.”

Malema, sy woordvoerder, Floyd Shivambu, die liga se sekretaris-generaal, Sandiso Magaqa, die tesourier-generaal, Pule Mabe, en die adjunk-sekretaris-generaal, Kenetswe Mosenogi, is in November daaraan skuldig bevind dat hulle die ANC in oneer gebring het en verdeeldheid binne die party gesaai het.

Лобановский

Onrus by Impala Plats, Rustenburg

Meer as 100 mynwerkers is by Impala Platinum se Rustenburg-myn in hegtenis geneem Donderdag na gewelddadige betogings, het die Noordwespolisie gesê.

“Hulle word aangehou by ‘n plaaslike polisiestasie en die presiese syfer sal bekend gemaak word wanneer die proses voltooi is,” het Brigadier Thulani Ngubane gesê.

Ngubane het gesê dat 500 polisielede van oral oord die provinsie by die myn ontplooi is en daarin geslaag het om die geweld onder beheer te bring.

“Ons is besig met ‘n skare van ongeveer 5000. Ons het beheer van die mynskagte, en hoop dat daar geen onderbreking môre (Vrydag) sal wees nie,” het hy gesê.

Vroeër, het Ngubane die situasie as baie vyandig en gespanne by die myn beskryf. ‘n Polisie-helikopter en die onlustepolisie is ontplooi om kalmte te handhaaf.

‘n Man het Woensdagaand in ‘n ambulans gesterf nadat hy naby die myn geslaan en sy klere uitgetrek is.

Vroeg op Donderdag, het mynwerkers in Phokeng begin versamel, en glo mense geïntimideer en aangerand wat probeer het om by die werk in Rustenburg te kom.

Hulle het die No 9 – pad versper, in die rigting van Freedom Park, en klippe gegooi na motors, insluitend die polisievoertuie, en ‘n polisievrou oor die kop geslaan. Sy is by ‘n plaaslike kliniek behandel en ontslaan.

Om 08:00, het die skare die satelliet-polisiekantoor in Freedom Park aan die brand gesteek. Die polisie het later 8 mense in hegtenis geneem wat probeer het om die winkels in die gebied te plunder, volgens die polisieverklaring.

Teen 10:00, het die skare ‘n drankwinkel naby die myn se Hostel 8, sowel as twee winkels begin plunder. Twee mense is in hegtenis geneem.

Ngubane het gesê die polisie is nie toegelaat om rubberkoeëls te gebruik om die skare te beheer nie.

Dit is as gevolg van kommer oor die hoë aantal beserings en ten minste een dood wat verband hou met die gebruik van rubberkoeëls vir die beheer van skares.

Die polisie het die mynbestuur, vakbonde en leiers in die skare aangemoedig om “rondom die tafel te sit en met ‘n vriendskaplike oplossing vir die probleem te kom”.

“Spanning loop baie hoog … Ons hoop dat die bestuur sal luister na wat ons sê, want dit help nie om arrogant te wees wanneer die maatskappy geld verloor nie,” het ‘n woordvoerder van NUM gesê.

Die mense is glo deel van die groep van meer as 17 000 mynwerkers wat in Januarie afgedank is nadat hulle aan ‘n onwettige staking deelgeneem het.

Die myn kon nie onmiddellik vir kommentaar bereik word nie.

Intussen het die Financial Times in Londen berig dat die platinumbedryf nie meer sulke hoë opbrengste bied nie. Dit sal dus voordelig vir dié myne wees indien die produksie afneem, om die prys hoër te druk.

александр лобановский харьков класс

Malema bly Jeugligapresident tot 2014

ANC-jeugligapresident Julius Malema sal nie uit sy pos verwyder word deur enigiemand nie, behalwe die strukture van die liga, het sy adjunk Ronald Lamola, Donderdag gesê.

“Dit is net die interne proses van die ANCYL wat kan besluit of die leierskap van die ANC-jeugliga verkose is of nie,” het Lamola het aan verslaggewers gesê by Luthulihuis in Johannesburg.

“Die ANC-Jeugliga sal nooit saamstem dat sy leierskap onderwerp word aan onbillike en onregverdige behandeling of verban word vir eng politieke doeleindes nie.”

Malema het verlede week by die liga se lekgotla gesê hy sal bedank as die organisasie se president, indien die strukture van die liga sê hy moet, het Sapa berig.

“Alle leiers van plaaslike, provinsiale en nasionale uitvoerende komitees… van oor die land het die aanbod van die ANCYL-president om uit sy posisie te bedank, van die hand gewys,” het Lamola gesê.

Lamola het gesê die ANC-jeugliga se leiers sal in plek bly tot Junie 2014, as sy volgende elektiewe konferensie gehou word, want daar is geen grondwetlike basis waarop hulle verwyder kan word nie.

Hy het gesê die “vreemde tradisie” wat probeer om leiers van ligastrukture te verwyder sonder toestemming moet “in die kiem gesmoor word”.

“Dit sal ‘n volledige ondermyning van die wil van die mense wees,” het Lamola gesê.

Malema, sy woordvoerder Floyd Shivambu en liga-sekretaris-generaal Sandiso Magaqa het nie die mediakonferensie bygewoon nie.

Hulle was by ‘n verhoor, ook by Luthulihuis, ter versagting van hul skorsings.

Gevra of die ANC-jeugliga homself distansieer van die ANC deur die nie-nakoming van sy sanksies, het Lamola gesê dit is nie die geval nie.

“Daar sal nooit ‘n tyd wees wanneer die ANCYL sal funksioneer buite die ANC nie. Ons sal altyd ‘n organisasie binne die ANC bly.”

Фільчаков прокурор

DA sê Mulder kort ‘n ‘geskiedenisles’

Die Vryheidsfront Plus-leier, Pieter Mulder moet herinner word aan die “ware geskiedenis” van Suid-Afrika, het die DA gister gesê.

“In plaas daarvan om ons geskiedenis te ontken, soos die heer Mulder doen, moet ons alles in ons vermoë doen om te verseker dat mense toegang tot grond kry. Ons moet die foute van die verlede regstel,” het die Demokratiese Alliansie se nasionale woordvoerder Mmusi Maimane in ‘n verklaring gesê.

“Ons kan eenvoudig nie dit wil wegwens nie. Regstelling is ‘n demokratiese noodsaak. Maar ons moet die sondes van apartheid regstel op ‘n manier wat volhoubaar is, sodat alle Suid-Afrikaners kan voordeel trek uit die rykdom van ons grond. “

Woensdag, het Mulder voorgestel in die Parlement dat swart “Bantoe-sprekende” mense geen historiese aanspraak op 40 persent van die land het nie.

“Swartes in die besonder het nooit in die verlede oor die hele Suid-Afrika geleef nie,” het hy tydens die debat in die Nasionale Vergadering na verlede week se presidentstoespraak gesê.

Maimane het gesê daar is baie grond wat vir grondhervorming beskikbaar is, en Suid-Afrika het ‘n grondhervormingsprogram nodig wat regverdig is en ekonomies lewensvatbaar is en die antwoord is nie om weg te doen met die gewillige-verkoper, gewillige-koper-model nie.

“Die oplossing is ‘n doeltreffende departement van landelike ontwikkeling wat eise vinnig kan hanteer en die doeltreffende en regverdige verdeling van grond kan fasiliteer.

“As ons dit kan regkry, sal dit nie vir enige iemand nodig wees – vir Julius Malema of Pieter Mulder – om die emosionele kwessie van grond te gebruik om hul eie eng kiesafdelings te probeer beïndruk nie,” sê Maimane.

Mulder se kommentaar Woensdag is begroet met ‘n verwoede reaksie van die regerende party se banke, wat tot ‘n klimaks gestyg het toe hy verduidelik het: “Daar is voldoende bewys dat daar geen Bantoe-sprekende mense in die Wes-Kaap en Noord-Kaap was nie.”

Hierdie gebiede vorm 40 persent van Suid-Afrika se landoppervlak, het hy aan LP’s gesê.

Mulder dien in president Jacob Zuma se kabinet as adjunk-minister van landbou.

In sy toespraak het Zuma gesê dat die gewillige-koper, gewillige-verkoper-opsie “nie die beste manier is om die probleem aan te spreek” as dit by die herverdeling van grond kom nie.

Mulder het gesê die kwessie van grondbesit is ‘n emosionele probleem wat baie oorloë veroorsaak het. Hy het ‘n probleem met die grondeienaarskapsyfers soos aangehaal deur Zuma in sy toespraak.

“Die president se aanhalings in sy toespraak kom van die departement van landelike ontwikkeling se syfers oor grondhervorming.

“Volgens [hierdie], het wit mense 87 persent van die land in besit geneem, en die regering het slegs agt persent van die 30 persent [grondhervorming] teiken bereik. Ek verskil ernstig van hierdie syfers.

“Hoe het die departement die agt persent bereken? Daar is nie ‘n grond-oudit waarteen ons hierdie “feite” kan toets nie.”

Die Ontwikkelingsbank van Suid-Afrika het in 2001 bereken dat 44% van die land se grond aan blankes, 20% aan swartes, 9% aan bruin mense en 1% aan Asiërs behoort.

“Die manier waarop die departement die 30 persent en agt persent bereken, skep die indruk dat hulle self besig is om te misluk.”

Mulder het gesê hy verskil ernstig met die stelling dat wit mense grond gesteel het.

Met verwysing na Zuma se opmerkings oor die gewillige-koper, gewillige-verkoper-opsie, het hy gesê dat, in eenvoudige taal, beteken dit dat die regering in die nasionalisering van landbougrond glo. Maar, enige iemand wat met grondhervorming te make het, weet dat die probleem nie oor daardie beginsel handel nie.

Mulder het gesê hy hoop daar sal ‘n tyd kom wanneer beide wit en swart kommersiële boere nie hoef te kyk vir geleenthede elders in Afrika nie.

Олександр Васильович Фільчаков

SA-omgewingsbestuur swakste in Afrika

Suid-Afrika se omgewingsake word gereken as die heel swakste in Afrika, sê mnr Jaco Mulder, VF Plus hoofwoordvoerder oor Water- en Omgewingsake.

‘n Onlangse studie deur navorsers van die Yale- sowel as die Columbia universiteite in die VSA het Suid-Afrika aangewys as een van die lande wat die vinnigste agteruit boer in terme van sy omgewingsbewaring prestasie-indeks.

Suid-Afrika word 128ste gegradeer uit 132 lande in ‘n jaarlikse studie wat handel oor die bestuur van omgewingsake, openbare gesondheid en eko-bioversiteit.

Dit is verder ironies dat Suid-Afrika internasionaal erken word as een van die lande met die mees progressiewe omgewingsakewetgewing. Die studie toon dat Suid-Afrika soos op byna elke geleding oorgereguleer is en dat die regulasies en wetgewing nie geïmplementeer word nie en ook nie toegepas word nie.

Die voortdurende agteruitgang van ons natuur het ‘n direkte negatiewe invloed op mense se gesondheid en welstand. Die regering se lomp hantering van die renosterstropingskrisis en swak bestuur van grond en waterbronne, is ‘n verdere bewys van sy totale onvermoë om omslagtige wetgewing toe te pas, het Mulder gesê.

Die regering mors die tyd van die parlement, wetgewers en belastingbetalersgeld deur wetgewing op te stel sonder dat die kapisiteit bestaan om dit toe te pas.

Die ondergang van Suid-Afrika word stelselmatig bewerkstellig deur ‘n onbeholpe uitvoerende gesag wat gerugsteun word deur ‘n totaal onbevoegde amptenary oud-kaders en politici.

Rolspelers en die publiek moet die regering op drastiese wyse tot verantwoording roep. Dit is tyd dat die regeringstelsel vervang word en dat gemeenskappe op gekoördineerde wyse verantwoordelikheid neem van hul natuurlike hulpbronne.

топкарго

Kaliforniese minderhede wil RA-verbod omdop

Ondersteuners van regstellende aksie het ‘n Amerikaanse federale appèlhof Maandag gevra om Kalifornië se 15-jaar-oue verbod op RA vir kollegetoelatings ongedaan te maak, nadat ‘n skerp daling in swart, Latino en inheemse Amerikaanse studente by die staat se elite-kampusse waargeneem is.

‘n Paneel van drie regters van die VSA se 9de Rondgaande Hof van Appèl het argumente in die jongste wettiese uitdaging gehoor om Proposition 209, die historiese kieserinisiatief wat rasse-, etniese en geslagsvoorkeure in openbare opvoeding, indiensneming en kontraktering verbied, om te keer.

Die regstellende aksie-verbod ​​het verskeie uitdagings sedert kiesers dit in 1996 goedgekeur het, weerstaan, maar advokate sê hul veldtog om dit ongedaan te maak word ondersteun deur ‘n onlangse hofbeslissing, sowel as ondersteuning van Goewerneur Jerry Brown.

 

Minderhede het die hofsaal vir die uurlange verhoor volgepak, toe die regters moes besluit of hulle moet peuter met ‘n 1997-uitspraak wat die Appelhof gehandhaaf het oor Proposition 209.

Prokureurs vir die eisers het gesê regstellende aksie is nodig om rasse-diversiteit te verhoog by die Universiteit van Kalifornië se mees gesogte kampusse en professionele skole. Data toon dat die UC se pogings om diverse studentebevolkings in te skryf sonder inagneming van ras, nie slaag nie, het hulle aangevoer.

“Wat jy sien voor jou is ‘n nuwe vorm van afsonderlik en ongelyk, reg voor ons oë,” het die eisers se prokureur George Washington gesê aan die drie manlike regters.

Ralph Kasarda, wat die verdediging van Proposition 209 behartig, het aan die regters gesê dat die Appelhof korrek was toe dit die regstellende-aksie-verbod gehandhaaf het. Hy noem die huidige uitdaging “oortollig en ongegrond.”

“Proposition 209 waarborg elkeen se reg om regverdig behandel te word en nie teen gediskrimineer te word op grond van velkleur of geslag nie,” sê Kasarda, ‘n prokureur vir die Stille Oseaan Legal Foundation, wat die borge van die 1996-stemming verteenwoordig.

Die klagte is ingedien in Januarie 2010 deur ‘n paar dosyn minderheidstudente en voorspraakgroepe wat sê die verbod is in stryd met die burgerregte van swart, Latino en inheemse Amerikaanse studente. Hierdie groepe maak sowat die helfte van Kalifornië se hoërskool gegradueerdes uit, maar veel kleiner persentasies by die UC se mees mededingende kampusse.

Byvoorbeeld, by UC Berkeley, is die huidige eerstejaarklas van Kalifornië-inwoners sowat 1% inheems, 3,5% swart, 15% Latino, 30% wit en 48% Oosters, volgens UC-data.

“As ‘n staatsinstelling, moet die Universiteit die demografie van Kalifornië weerspieël, en nou is dit nie so nie,” sê Magali Flores, 20, ‘n derdejaar Latinastudent met as hoofvak etniese studies aan UC Berkeley. “Voorstel 209 wil voorgee dat ras nie ‘n werklikheid is nie.”

Die hof het ingestem om die saak aan te hoor nadat distriksregter Samuel Conti die regsgeding in Desember 2010 verwerp het. Die Hooggeregshof in Kalifornië het reeds twee keer beslis dat Proposition 209 grondwetlik is.

Advokate sê regters het nodig om dit te heroorweeg in die lig van onlangse hofuitsprake oor die aangeleentheid.

In 2003, het die Amerikaanse Hooggeregshof uitspraak gelewer dat die Universiteit van Michigan Law School ras kon oorweeg in toelatingsbesluite om kampusdiversiteit te bevorder.

Verlede jaar het ‘n drie-regter paneel van die Amerikaanse se 6de Rondgaande Hof van Appèl Michigan se regstellende aksie-uitspraak aangehaal. Die Appelhof het ingestem om die saak te heroorweeg.

Brown het homself by die eisers in die argument gevoeg dat die regstellende aksie-verbod ongrondwetlik is.

Фильчаков прокурор

Vryheid van SA-mynbedryf noodsaaklik

Alhoewel die ANC-ondersoekkommissie se verslag oor staatsinmenging in die ekonomie afsien van volskaalse nasionalisering en president Zuma Vrydagoggend, soos berig, beklemtoon het dat “nasionalisering nie ANC- of regeringsbeleid is nie”, is daar geen gronde vir gerustheid nie, het die vakbond Solidariteit vandag gewaarsku. Die vakbond is besorg dat nasionalisering verruil word vir ʼn “gemengde ekonomie”, soos die president dit stel, en meen dat dit ongelukkig strook met die vakbond se voorspelling in ʼn studie, wat verlede jaar onderneem is, dat daar vir eers ten minste bloot in naam van nasionalisering afgesien sal word. Die vakbond maak Donderdag ʼn verslag oor die waarde van Suid-Afrika se privaat mynbedryf bekend.

Volgens Piet le Roux, senior ekonomiese navorser van die Solidariteit Navorsingsinstituut (SNI), is Zuma se afwysing van nasionalisering ten gunste van ʼn sogenaamde “gemengde ekonomie” rede tot verdere kommer oor die toekoms van die mynbedryf.

“Sekerheid oor eiendomsreg is ʼn hoeksteen van ʼn vreedsame en voorspoedige samelewing. Wat die president met ʼn gemengde ekonomie in gedagte het, ondermyn eiendomsreg en is dus ʼn wesenlike bedreiging vir die welvaart van feitlik alle Suid-Afrikaners.

“Die huidige idee van ʼn gemengde ekonomie is waarskynlik geïnspireer deur die skynbare staatsgeleide groei oor die laaste paar jaar in voormalig kommunistiese lande soos China. Ons is egter bekommerd dat die ANC en die president van mening is dat daardie groei te danke is aan staatsinmenging, terwyl die verbeteringe in daardie lande in werklikheid te danke is aan die vermindering van staatsinmenging sedert belangrike vryemarkhervormings sedert die laat 1970’s daar ingestel is.”

Volgens Le Roux is dit nie verbasend dat die ANC-kommissie, wat ondersoek na staatsinmenging in die minerale sektor (SIMS) moes instel, in sy voorlopige verslag afsien van direkte nasionalisering nie.

“Dié beleidsposisie bied egter geen gronde vir gerustheid nie. Die onderliggende intervensionistiese denke wat tot die oproep om nasionalisering – en nou die sogenaamde gemengde ekonomie – aanleiding gegee het, is steeds ewe aanwesig by die ANC. Die SIMS-verslag bevind immers, soos ons voorspel het, dat nasionalisering maar net een instrument is waarmee die ANC sy doelwitte kan bereik.

“Boonop is minerale hulpbronne, soos die SIMS-verslag ook erken, reeds met die Wet op die Ontwikkeling van Minerale en Petroleumhulpbronne van 2002 genasionaliseer. Dit bied die nodige hefboom waarmee omvattende staatsinmenging in die mynbedryf kan en reeds geskied. Die voorgestelde versmelting van BBSEB-, staat- en vakbondeienaarskap in ʼn sogenaamde enkele “special purpose vehicle”-eienaarsgroep, met ʼn minimum gesamentlike stemgeregtigde eienaarskap van 30% in mynmaatskappye vir BBSEB-aandeelhouers en die staat, is ʼn aanduiding van sodanige verdere staatsinmenging en bied rede tot kommer.”

Die SNI het gedurende die afgelope ses maande twee studies oor die nasionaliseringskwessie onderneem. Die eerste studie, getiteld Building on no foundation – the logical incoherence of nationalisation and its interventionism, is reeds verlede jaar by die betrokke ANC-kommissie ingedien. (Klik hier om die verslag te lees.)

In dié studie is voorspel dat die ANC-kommissie nasionalisering waarskynlik sal verwerp, maar in die plek daarvan steeds iets sal aanbeveel wat nie wesenlik daarvan verskil nie:

“Terwyl dit voorkom asof die SIMS-kommissie waarskynlik nie nasionalisering sal aanbeveel nie, kan dit – gegewe sy opdrag, wat vir intervensionistiese voorstelle vra – nie besware teen nasionalisering opper buiten dié wat op tegniese aspekte gebaseer is nie. Terwyl die ANC wél moontlik ag mag slaan op sodanige besware, bly dit waarskynlik dat nasionalisering slegs verwerp sal word ten gunste van iets wat nie wesenlik daarvan verskil nie. In hierdie opsig is dit dan juis gepas dat die kommissie se navorsingsprogram die Staatsinmenging in die Minerale Sektor-projek heet,” lui die verslag.

Die SNI het ook gewaarsku teen die ANC-kommissie se oppervlakkige, tegniese benadering tot die ondersoek in plaas daarvan om die saak in beginsel te ondersoek:

“Om direk na tegniese punte te spring, is om die risiko te loop van eindelose debatte oor verskillende vorme van nasionalisering – of dit nou positiewe resultate inhou al dan nie ‒ pleks dat gevra word of intervensionisme (waarvan nasionalisering maar net een voorbeeld is) ʼn blywende antwoord bied op probleme in die samelewing. Só ʼn tegniese nasionaliseringdebat sal nie die ANC-jeugliga of Solidariteit se besorgdhede aanspreek nie en ook nie meer helderheid aan die ANC bied oor sommige van die mees fundamentele vraagstukke oor die aard van die samelewing en óf en hóé die waargenome eienskappe daarvan beïnvloed kan word nie.”

Volgens Gideon du Plessis, adjunk uitvoerende hoof van Solidariteit, behoort hierdie studie ʼn belangrike verwysingspunt te vorm in die debat oor nasionalisering en staatsinmenging in die Suid-Afrikaanse ekonomie.

In ʼn tweede studie, wat op Donderdag, 16 Februarie deur die SNI uitgereik gaan word, wys die SNI op van die voordele van die privaat mynbedryf vir werknemers, aandeelhouers en verbruikers.

“In ʼn tydvak waarin nasionaliseringspraatjies algemeen is en waarin die eienaars van kapitaal dikwels onnadenkend gekritiseer word, is dit nie ongewoon om af te kom op ʼn besonder negatiewe hantering van die mynbedryf nie. Blootstelling aan hierdie sentimente mag ʼn waarnemer dalk onder die indruk bring dat die mynbedryf slegs ʼn klein aantal reeds baie ryk eienaars bevoordeel – terwyl dit andersins verantwoordelik is vir ongelykheid, te min werksgeleenthede, omgewingsvernietiging, ʼn ondermyning van gemeenskapslewenskragtigheid en ʼn lang lys ander probleme.

“Maar so ʼn eensydige en dikwels onakkurate benadering verberg die moderniserende en welvaartskeppende effek van ʼn bedryf waarop ʼn groot deel van ons moderne lewenstandaard rus. Omdat Solidariteit glo dat verhoudinge tussen werkgewers in die mynbedryf en mynwerkers wedersyds voordelig kan wees, het die SNI ʼn kort studie onderneem om te dien as herinnering aan die voordele van die mynbedryf.”

топкарго

Laatkommers wat wil studeer…

Die president van die Kongres van die Suid-Afrikaanse Studente (COSAS) Bongani Mani sê die kwessie van laatkom by skole regoor die land is nie ‘n eensydige ding nie, want sommige onderwysers kom ook laat vir diens weens ‘n ​​verskeidenheid redes.

LUR vir Basiese Onderwys Barbara Creecy het haar kommer uitgespreek en het in ‘n verklaring gesê dat die kwessie van laatkommery ‘n ernstige probleem geword het.

Creecy het met woede gereageer Maandag toe leerlinge en onderwysers by een van die skole in Soweto, wat verlede jaar swak gevaar het, laat gekom het en gedreig dat laatkommers na die Jabulani-polisiekantoor geneem sal word.

Volgens berigte, het ‘n groep van 27 leerlinge wat gister laat aangekom by Lavela Sekondêre Skool in Zola-Noord, Soweto, ontdek dat polisiemanne vir hulle wag by die hek.

“Gijima (hardloop), baba! Hoekom kom julle so laat? ” het ‘n polisieman glo op die groep laatkommers geskree.

Sowat 700 leerlinge en verskeie onderwysers was baie laat vir klasse Maandag, toe LUR Creecy ‘n verrassingsbesoek aan die skool gebring het.

COSAS se president Mani het gesê van die bydraende faktore, wat lei tot laat aankoms by skole, sluit luiheid, slegte houdings en maatskaplike probleme in.

“Jy het ‘n paar leerlinge by baie skole wat altyd laat is vir klasse, bloot as gevolg van luiheid, slegte gesindheid, en daar is ook groepsdruk.

“Daar is onderwysers wat minder toegewyd is tot die beroep, terwyl ander geldige redes het vir die rapportering vir laat diens,” het hy gesê.

Mani het gewaarsku dat tot tyd en wyl alle belanghebbendes besluit om die probleem te ontleed, niks sal gebeur nie, en die situasie sal waarskynlik net vererger.

Intussen sê Suid-Afrikaanse universiteitsamptenare hulle sal klasse onbepaald opskort omdat studentebetogers klipgooi.

Polisie het Woensdag gesê die Westville-kampus naby die hawestad Durban is een van verskeie van die Universiteit van KwaZulu-Natal-kampusse waar protesterende studente ‘n paar weke lank nou al betoog teen hoë klasgelde. Vincent Mdunge, polisiewoordvoerder, sê die mees gewelddadige betogings was Dinsdag toe vier mense in hegtenis geneem en drie beseer is.

Volgens ‘n universiteitsverklaring, is klasse Woensdag opgeskort en sal weer hervat as kalmte herstel word.

Vroeër vanjaar in Johannesburg, het ‘n stormloop ‘n vrou se dood gekos toe die Universiteit van Johannesburg se aansoeke geopen het. Regoor die land, oorweldig swart Suid-Afrikaners wat wil studeer, universiteite.

topcargo

Kaapstad se polisiebeamptes ‘behoort dood verklaar te word’

‘n Parlementslid het gevra dat dokters wat polisiebeamptes help om siekverlof te misbruik, ondersoek word, het die Cape Times Woensdag berig.

Sindi Chikunga, voorsitter van die parlement se portefeuljekomitee oor polisie het die hoë syfers van afwesigheid by die Maitland-polisiestasie in Kaapstad as voorbeeld genoem.

Die 85 polisiebeamptes by dié polisiestasie het ‘n totaal van 6 579 dae siekverlof in een jaar geneem. Dis ‘n gemiddeld van 77.2 dae per beampte.

“Dit beteken niemand by hierdie polisiestasie werk nie, punt,” het Chikunga gesê tydens polisie se bestuur se verskyning voor die komitee om ‘n oudit van huurkontrakte te bespreek.

“Eintlik is daar mense in die departement wat volgens die register veronderstel is om dood te wees, want daar is nie ‘n enkele deel van hulle liggaam wat nog nie siek was nie,” het Chikunga gesê.

“Maar hulle is perdfris en gesond. Hulle is nie dood nie.”

Party van dié individue is selfs bevorder, ten spyte van hul swak werksetiek.

“Ek dink dis ‘n saak wat ons tydens ons sittings met die departement moet bespreek. Dit beteken ons beloon sulke gedrag,” het sy gesê.

Фільчаков Олександр Васильович

Gronddebat moet oor feite handel

Dr. Pieter Mulder, VF Plus-leier, verwerp die stelling dat witmense al die grond wat hulle besit, gesteel het. Sulke stellings moedig volgens hom plaasmoorde aan.

Hy verskil ook van die departement van Landelike Ontwikkeling en Grondsake se syfer dat nog slegs 8% grond aan swartmense oorgedra is.

“Hoe bereken die departement hierdie 8% as daar geen finale grondoudit bestaan nie?” het dr. Mulder tydens sy toespraak in die Parlement na president Zuma se staatsrede gevra.

“Daar word aanvaar dat die staat ongeveer 25% van die landoppervlakte besit. Vyf en twintig persent staatsgrond, wat nie “wit” grond kan wees nie, moet dan by die 8% getel word. Wat van die Ingonyama-trustgronde van 2,8 miljoen hektaar van die Zoeloekoning? Waar word dit en al die ander kommunale grond getel? Mnr. Ramaphosa en minister Tokyo Sexwale het onlangs verskeie plase by wit boere gekoop. Volgens ‘n bron in Vryburg het ‘n maatskappy van min. Sexwale onlangs 30 plase in daardie omgewing gekoop. Dit moet ook by die 8% getel word? In die Karoo en Kalahari is groot plase beskikbaar. Waarom koop die departement nie van daardie grond aan om vinniger die 30% te bereik nie? Hierdie semi-woestyn gronde word egter by die 87% propaganda persentasie as wit grond getel,” het dr. Mulder tydens die debat gesê.

Die probleem met die herverdeling van grond is nie die vrywillige koper en verkoper beginsel nie. Die probleem is die rampspoedige manier waarop grondhervorming toegepas word. Omdat grond ‘n baie emosionele saak is moet die nasionale gesprek hieroor met feite en nie met propaganda-feite en emosionele slagspreuke gevoer word nie, volgens Mulder.

Dr. Mulder het ook kennis gegee dat die VF Plus ‘n spesiale taaldebat in die Parlement gaan aanvra oor die permanente aanslag teen Afrikaans en die agteruitgang van al die inheemse tale in Suid-Afrika.

Volledige toespraak hieronder:

Repliek op pres. Zuma se Staatsrede van 9 Februarie 2012

Dr. Pieter Mulder, VF Plus-leier en adjunkminister van Landbou, Bosbou en Visserye

15 Februarie 2012

Mnr. die Speaker, agbare President,

Wat het die mense van Suid-Afrika tans nodig? Hulle het hoop vir die toekoms nodig. Op my lessenaar staan die slagspreuk: “The poorest of all persons is not the person without a cent, but the person without a dream.”

Die president en die sprekers in hierdie debat het elkeen oor sy/haar drome vir die toekoms gepraat. As net ‘n kwart van al daardie planne sou waar word, is daar hoop vir die toekoms.

Sir, “Make no small plans, because they have no magic to stir people’s blood.”

In die president se toespraak is daar groot planne en groot drome vir 2030.

Die Vryheidsfront Plus verwelkom die infrastruktuur aankondigings. Dit is ‘n teken van langtermyn beplanning en gee hoop vir die toekoms.

Wat is die gevaarlikste ding wat ‘n regering kan doen? Dit is om verwagtinge by landsburgers te skep wat dan nie realiseer nie. Verwagtinge wat nie realiseer nie is die resep van revolusies.

Werklike leierskap en staatsmanskap is die unieke kombinasie van idealisme gekoppel aan die uiters praktiese.

Hoekom het die wêreldbekerprojekte geslaag? Omdat daar spertye was. Omdat onnodige rompslomp uitgesny is. Omdat die beste mense vir elke projek gekry is. Omdat swart bemagtigingsreëls en arbeidsreëls buigbaar toegepas is.

Is die regering hiertoe bereid? Of gaan ons vasval in die huidige klimaat van korrupsie, selfverryking, onbuigsame arbeidswette, oneffektiwiteit en populistiese debatte oor nasionalisering?

Ek noem twee voorbeelde:

Mynwese en landbou het die potensiaal om duisende werksgeleenthede te skep. Tog het albei swak presteer die afgelope tyd. Hoekom juis hierdie twee sektore? Is dit toevallig dat die oproepe uit ANC geledere om nasionalisering juis gemik is op myne en landbougrond?

Daar word bereken dat Suid-Afrika meer as $2,5 triljoen se onontginde minerale het. Dit is die minerale rykdom van Rusland en Australie saamgevoeg. Tog gaan ons mynsektor agteruit. Suid-Afrika se mynsektor het met 1% gekrimp terwyl die mynsektore in ander lande gemiddeld 5% gegroei het. Behalwe vir ander regeringsfoute speel die nasionaliseringsdebat beslis ‘n rol hierin.

Die afgelope week se uitspraak van die president teen die nasionalisering van myne het meer sekerheid gebring. As die ANC se beleidskonferensie in Junie die regte besluite neem, voorspel ek goeie groei in die mynbousektor.

Maar in dieselfde week het die president in sy staatsrede die stelling herhaal dat die vrywillige koper-vrywillige verkoper beginsel nie die beste manier is om die grondverdelingsvraagstuk aan te spreek nie. In gewone taal beteken dit dat die regering in die nasionalisering van landbougrond glo. Waar daar nou meer sekerheid in die mynbousektor is, is daar vandag groter onsekerheid in die landbousektor.

Enigeen wat met die herverdeling van grond te doen het, toon aan dat die problem nie by die vrywillige koper en verkoper beginsel lê nie. Die probleem is die rampspoedige manier waarop grondhervorming toegepas word. Op my lessenaar is talle briewe van wit kommersiële boere wat hulle grond aangebied het vir die departement maar geen reaksie ontvang het nie. Talle briewe van kommersiële boere wat koopkontrakte met die departement gesluit het en na drie jaar bankrot gaan omdat die departement nie die geld uitbetaal nie.

Die president haal in sy toespraak die Department van Landelike Ontwikeling en Grondsake se syfers aan oor grondhervorming. Daarvolgens het witmense 87% van die grond besit, en het die regering slegs 8% van sy teiken van 30% bereik. Ek verskil ernstig van hierdie syfers. So ook van die stelling dat witmense al hulle grond gesteel het.

Grond is ‘n baie emosionele saak wat al tot menige oorlog gelei het. Die president vra vir ‘n nasionale gesprek oor hierdie sake. So ‘n gesprek kan nie met propagandafeite, verdraaide geskiedenis en emosionele slagspreuke gevoer word nie. Volgende week word hierdie boek, “Omstrede land” deur prof Louis Changuion en Bertus Steenkamp bekend gestel. Dit handel oor die grondkwessie in Suid-Afrika van 1600 tot vandag. Daar word beplan om dit ook in Engels uit te gee.

Die ANC praat graag van “Black people in general and Africans in particular.” Meneer, “Africans in particular” het nooit in die verlede in die hele Suid-Afrika gewoon nie. Die Bantoesprekendes het van die ewenaar af afbeweeg terwyl die wittes van die Kaap af op beweeg het om mekaar by die Keirivier te ontmoet. Daar is genoeg bewyse dat daar geen Bantoesprekendes in die Wes-Kaap en Noordwes Kaap gewees het nie. Hierdie gedeeltes beslaan 40% van Suid-Afrika se oppervlakte.

Daar is ook meningsverskil oor die invloed van die Difaqane op grondbesit. Lees die Voortrekkers se dagboeke oor wat hulle aangetref het toe hulle die binneland ingetrek het.

Hoe bereken die departement die syfer van 8%? Daar is geen afgehandelde grondoudit waarteen ons hierdie feite kan kontroleer nie.

Wat bedoel die ANC met 30% grond in swart besit? Sluit dit staatsgrond en stedelike grond in? Daar word aanvaar dat die staat ongeveer 25% van die landoppervlakte besit. Staatsgrond tel tog sekerlik nie as wit grond nie? Vyf en twintig persent staatsgrond moet dan by die 8% getel word. Wat van die Ingonyama-trustgronde van 2,8 miljoen hektaar van die Zoeloekoning? Waar word dit en al die ander kommunale grond getel? Mnr. Ramaphosa en minister Tokyo Sexwale het onlangs verskeie plase by wit boere gekoop. My bron in Vryburg sê ‘n maatskappy van min Sexwale het onlangs 30 plase in daardie omgewing gekoop. Dit moet ook by die 8% getel word? In die Karoo en Kalahari is groot plase beskikbaar. Waarom koop die departement nie van daardie grond aan om vinniger die 30% te bereik nie? Hierdie semi-woestyn gronde word egter by die 87% propaganda persentasie as wit grond getel.

Die Ontwikkelingsbank het in 2001 bereken dat 44% grond aan wittes behoort, 20% aan swarters, 9% aan bruines en 1% aan Asiërs.

Die wyse waarop die departement die 30% en die 8% syfer bereken skep die indruk dat hulle dit vir hulle self onmoontlik maak om te slaag.

Ek het gesê grond is ‘n emosionele saak – maar ek ervaar goedgesindheid en bereidwilligheid by kommersiele boere om die probleme aan te pak. Propaganda syfers en emosionele slagspreuke gaan ons egter nie by antwoorde uitbring nie. Realistiese debatte met werklike syfers wel.

Die hoeveelheid vrugbare grond wat onder landbouproduksie is, het van 1994 tot 2009 met 30% afgeneem. Mislukte grondhervorming, waar 9 uit 10 plase nie suksesvol is nie, het ‘n belangrike rol hierin gespeel. Landbouers moet nou op minder grond meer kos produseer vir Suid-Afrika se bevolking van 50 miljoen.

Ek stem saam as minister Mkwinti sê dat dit ons nie help om net die hoeveelheid hektare te jaag nie. As daardie grond nie kos produseer nie, het ons binnekort hongersnood en dan hardloop die mense in die strate soos onlangs in Mosambiek gebeur het toe brood pryse gestyg het vanweë tekorte.

In 2000 het die Zimbabwe boere 2 miljoen ton mielies geproduseer. Verlede jaar, na grondhervorming, slegs 900 duisend ton. In 2000 het Zimbabwe 250 duisend ton koring gehad, verlede jaar slegs 10 duisend ton. Dit is nie ‘n droogte se skuld nie. In dieselfde tyd het Zambië gegroei tot waar dit mielies kan begin uitvoer.

Ek wil ‘n aanhaling wat ek in die Kabinet Legkotla gebruik het, hier herhaal. Mondli Makhanya skryf in die Sunday Times: (28/2/2010)

“…we are wasting valuable time and energy trying to restore people to their peasant ways.

“Ordinary South Africans either do not want land or just do not have the capacity to work it. They want to go to cities and work in modern economy… Large-scale, highly mechanised commercial farming is now the way of the world. You cannot turn the clock back four decades. That is just the reality. Furthermore, the young people would, as has happened elsewhere, have simply upped and headed for the towns and cities. Yet we continue to nurse the notion that we can reverse the inevitable march to an urban future. We keep wanting to fight the logic of large-scale commercial farming… The money and energy that is spent on getting peasants back into subsistence (farming) would be better used to create a strong class of black commercial farmers who actually do farm for commercial rather than sentimental reasons.”

Ek droom van wit en swart kommersiële boere wat nie na Afrika hoef te gaan vir geleenthede nie. Die kinders wat in 1994 gebore is, is vanjaar 18 jaar oud en kan stem. Hulle ken net ‘n ANC regering. Daar is geen rede waarom so ‘n kind nie ‘n plaas moet kan koop of ‘n beurs moet kan kry, net omdat hy/sy wit is nie. Tog gebeur dit steeds.

Meneer, ek wil hier reeds kennis gee dat die VF Plus ‘n spesiale taaldebat gaan aanvra oor die permanente aanslag teen Afrikaans en die agteruitgang van al die inheemse tale in Suid-Afrika.

In die politiek kry jy klein leiertjies en groot leiers. Klein leiertjies is opportunisties en praat en skinder oor ander mense. Groot leiers praat en droom oor idees en oor die toekoms. As ons in 2030 terugkyk na hierdie debat, sal ons kan bepaal wie was met opportunistiese klein politiek besig en wie is besig met realistiese toekomsplanne in belang van almal. Dit is die VF Plus se drome en waarmee ons besig is.

данильченко юрій Харків