компрессор воздушный высокого давленияФільчаков Олександр Васильович
Skrywer: Dan Roodt
Grensbeheer gaan glo opgeskerp word
‘n Bykomende miljard rand is hierdie jaar in die begroting opsygesit om beter grensbeheer toe te pas. R600 miljoen hiervan is in die volgende drie jaar beskikbaar gestel om meer soldate op die land se grense te ontplooi, en om grensbeheer-fasiliteite en -toerusting op te gradeer en te onderhou, het Pravin Gordhan gesê.
Lees verder.
Werk sonder groei, hoe nou?
Die regering gaan moeilik die gestelde teiken van 5 miljoen werkgeleenthede bereik as die groeikoers in die volgende paar jaar nie dramaties toeneem nie. Ten einde 5 miljoen werkgeleenthede te skep, moet Suid-Afrika vir 10 jaar ‘n groeikoers van 6% tot 7% handhaaf. Die huidige groeikoers is 2,8% en die Minister van Finansies projekteer dat dit tot 4% in die toekoms kan groei. Dit is nie genoeg nie.
Die begroting het ook geen verbeeldingryke aansporingsmaatreëls bevat wat werkgewers groot hoeveelhede nuwe werkgeleenthede sal laat skep nie. Die belastingverligting vir klein sake-ondernemings word verwelkom maar sonder byvoorbeeld verbeeldingryke verslapping van dempende arbeidswetgewing vir hierdie ondernemings gaan dit nie werklik lei tot die skep van grootskaalse nuwe werkgeleenthede nie.
As gevolg van die resessie het die regering verlede jaar R70 miljard minder belasting geïn as wat verwag is. Die belastinginkomste het vanjaar grootliks herstel sonder dat dit nodig was om drastiese belastingmaatreël, soos in sommige ander lande, aan te kondig. Hiervoor en vir die wyse waarop die minister van Finansies Suid-Afrika binne vyf kwartale deur die resessie gekry het, kan die minister van Finansies wel bedank word.
Die VF Plus betreur dit dat geen spesifieke maatreëls aangekondig is om senior burgers teen die huidige lae rentekoerse te beskerm nie. Senior burgers wat van beleggings afhanklik is vir inkomste, se inkomste is die afgelope tyd gehalveer deur die lae rentekoerse terwyl inflasie oor dieselfde tydperk met 12% toegeneem het. Die ondersoek na bankkoste word wel deur die VF Plus verwelkom en dit mag senior burgers help.
Die minister van Finansies het moeilik implementeerbare sake soos die Nasionale Pensioenskema en die gesondheidsversekeringskema vermy deur telkens aan te kondig dat daar nog beraadslaging daaroor gaan plaasvind. ‘n Paar miljoen belastingbetalers in Suid-Afrika dra tans 50 miljoen inwoners. Die VF Plus glo dat voordat die Suid-Afrikaanse belastingbasis nie groter is nie, sulke skemas ‘n onbekostigbare luukse vir die land is.
Die vermeerdering van die polisiemag van 190 000 na 202 000 word verwelkom. Dit gaan ongelukkig nie die misdaadprobleem oplos nie. Wat Suid-Afrika kort is beter opgeleide polisielede, spesialis-eenhede, beter forensiese- en speurdienste. Groter getalle polisie alleen is nie die antwoord nie.
Umalusi stel nog inligting oor matriekuitslae vry
Die VF Plus het kennis geneem van die verslag wat vandag vrygestel is tydens ‘n mediakonferensie by Umalusi se hoofkantoor. Die bekendstelling van die inligting kom nadat die VF Plus en Media24 aansoek gedoen het by Umalusi om alle relevante inligting te verskaf rakende die standaardisering van die 2010-matriekvakke in terme van die Wet op Bevordering van Toegang tot Inligting.
Volgens adv. Anton Alberts, VF Plus-parlementêre woordvoerder oor Basiese Onderwys, is daar ‘n presedent geskep deur die suksesvolle aansoek deur beide die VF Plus en Media24 waardeur Umalusi gedwing is om die inligting bekend te stel. “Umalusi het self tydens die mediakonferensie erken dat volgens hulle kennis is hulle die enigste standaardiseringsorganisasie wat sodanige inligting bekend maak aan die publiek. Dit is ‘n bewys van die deursigtigheid van Suid-Afrika se onderwysprosesse,” het Alberts bygevoeg.
Daar is verskeie aanpassings gemaak in sekere vakke en die VF Plus bestudeer nog die hele verslag ten einde te bepaal tot hoe ‘n mate die aanpassing by die onderskeie vakke aanleiding gegee het tot die hoër slaagsyfer van verlede jaar. Die vak waarin die hoogste aanpassing gemaak is, blyk Wiskunde te wees met ‘n opwaartse aanpassing weens die moeilikheidsgraad. Die VF Plus sal die impak van al hierdie aanpassings evalueer en aan die hand daarvan kyk waarom die slaagsyfer soveel hoër is as in 2009.
“Umalusi het wel hulle spyt uitgespreek omdat soveel spekulasie ontstaan het rondom die uiteindelike slaagpersentasie van 2010 en het verskeie kommentatore as roekeloos bestempel. Dit is egter hulle eie skuld aangesien daar nie genoeg inligting was om die anomalieë logies te verduidelik nie en dis nou eers moontlik nadat die inligting weens die aansoek van die VF Plus en Media24 geslaag het,” het Alberts gesê.
Die VF Plus is dit eens met Umalusi dat die departement van basiese onderwys nog baie werk het om te doen om die standaard van Suid-Afrikaanse skole en vakke te verhoog en dat dit ‘n absolute prioriteit moet wees vorentoe.
Gemengde reaksie op begroting
Die Automobiel Assosiasie het die aankondiging in die begrotingsrede verwelkom dat miljarde rand bewillig is vir instandhouding van paaie en openbare vervoer. ‘n Woordvoerder, Gary Ronald sê R1,5 miljard sal aan die provinsies gaan vir padinstandhouding en ‘n verdere R2,5 miljard sal aan munisipaliteite gegee word vir openbare vervoerstelsels en infrastruktuur. Hy sê egter hy is teleurgesteld dat die voorgestelde toltariewe in Gauteng nie in die begrotingsrede genoem is nie.
Die minister van Finansies – Pravin Gordhan – het ook nuwe maatreëls aangekondig om bedrog met regeringstenders uit te skakel. Hy het in sy begrotingsrede gesê dat meer as 50 ondersoeke tot gevolg gehad het dat 65 mense in hegtenis geneem is. Hy sê die Inkomstediens is besig om toe te slaan op belasting en doeane-oortredings. Dit sluit ‘n nuwe metode in waarop sigarette gemerk word, terwyl onwettige klere en tekstiel-invoere ook vasgevat word.
Vroeë aanduidings is dat finansiële markte Suid-Afrika nie van staatskuld ontslae gaan raak nie, ná Gordhan ‘n groter as verwagte begrotingstekort voorspel het. Gordhan beraam ‘n begrotingstekort van 5,5% van die bruto binnelandse produk. Vóór die begrotingsrede het ekonome verwag dat die minister ‘n tekort van sowat 4,5% sal voorspel. Ekonome sê die markte is nie paniekerig nie weens die aanvaarbare vlakke van Suid-Afrika se skuld.
In reaksie op die begrotingsrede sê ‘n ekonoom van Investec, Brian Kantor Suid-Afrika moet op die private sektor steun om werk te skep. Hy sê die uitdagings wat die land in die gesig staar is dat die arbeidsmark te voorskriftelik in sy eise is. Kantor sê soveel soos Gordhan se toespraak op werkskepping gefokus het, sou dit verkieslik wees as daar aangedui is in watter sektore geleenthede geskep gaan word.
Krokodille vreet eienaar op
‘n Man is deur krokodille opgevreet toe hy by ‘n Rustenburgse krokodilplaas in ‘n dam geval het, het die polisie in Noordwes Woensdagaand bekend gemaak.
“Die eienaar van die krokodilplaas was glo besig om ‘n waterpyp reg te maak toe hy in die dam geval het,” het lt. kol. Sabata Mokgwabone, polisiewoordvoerder, gesê.
“Die slagoffer se werknemers was naby en het probeer om die krokodille met vleis weg te lok, maar dit was te laat,” het Mokgwabone bygevoeg.
Volgens Mokgwabone is dit nie duidelik hoeveel krokodille in die dam was toe die voorval gebeur het nie.
Pasop vir die voëltjie!
Verkeerde demokrasie
Die VSA mag dalk net nie die soort demokrasie in die wêreld kry waarvoor hulle gewens het nie. Selfs op die tuisfront in die deelstaat Wisconsin is daar populistiese roeringe. Wisconsin is waar vakbonde die diepste ingegrawe is, maar dit lyk asof die Republikeine die taai unie-greep gaan loswikkel.
Populistiese winde van onrus wat oor die Midde-Ooste waai, kan egter Amerikaanse militêre afhanklikheid van Arabiese regimes knou. Die voorkeurtoegang tot vliegvelde en hawens van Kaïro tot Katar lyk skielik nie meer so vanselfsprekend nie.
Die VSA se dominante rol in die streek hang af van ‘n komplekse netwerk van ooreenkomste met vriendelike Arabiese lande wat toelaat dat Amerikaanse magte olieskeepsroetes in die Golf patrolleer, Islamitiese militantes in bedwang hou en ‘n wakende oog oor Iran verseker.
Ongeveer 27 000 Amerikaanse troepe is ontplooi op ‘n verskeidenheid van basisse en plekke in die Golf, tesame met ‘n gebiedsmag van 50 000 man in Irak en duisende meer aan boord van skepe, volgens ‘n Amerikaanse militêre amptenaar wat anoniem wil bly.
Groot vliegvelde in Katar en die Verenigde Arabiese Emirate, ‘n groot basis in Koeweit en die VSA-vloot se vyfdevloothoofkwartier in Bahrein, dien as belangrike punte om enige optrede van Iran binne ‘n kort tydjie met swaar Amerikaanse vuurkrag te kan neutraliseer.
In Bahrein is ongeveer 4 000 Amerikaners gestasioneer as deel van die Amerikaanse vloot se vyfdevloothoofkwartier.
Met ‘n vloot van vliegdekskepe, torpedojaers en amfibiese skepe tot sy beskikking, hou die vyfde vloot toesig oor ‘n gebied wat strek van die Rooi See, tot aan die Golf en die Arabiese See.
Die Pentagon het verlede week die bedreiging van die onrus in Bahrein en elders onderspeel, en meen die geweld het nie die vloothoofkwartier of ander basisse ontwrig nie.
Voormalige amptenare sê die vloot kan die bevelspos elders heen skuif as dit daarop aankom.
Geen enkele basis of ooreenkoms verteenwoordig ‘n achilleshiel op sy eie nie, maar as ‘n geheel is die netwerk ‘n belangrike spil vir Amerikaanse militêre mag, sê Dawid Aäron, ‘n voormalige diplomaat en ‘n senior navorser by die invloedryke Rand Corporation.
Op die spel hier is ‘n vermoë om Amerikaanse bondgenote te verseker hulle sal teen Iran beskerm word. Amerikaanse vlootskepe geniet byvoorbeeld topprioriteit in die Suezkanaal. Om sulke spesiale regte te verloor, sal die koste en tyd dramaties verhoog vir Amerikaanse troepe en sal hulle dus inboet aan militêre mobiliteit.
In 2003 het die Amerikaanse magte hulle teenwoordigheid in Saoedi-Arabië – te midde van die Irakinval – heelwat afgeskaal en lugbedrywighede na Katar en Oman verskuif.
Sommige basisse is steeds geheim, insluitende Al Dhafra in die Verenigde Arabiese Emirate, wat die Pentagon nie amptelik erken nie. Dit word vir geheime sendings in Irak en Afghanistan gebruik.
Nog 2 dae voor PRAAG-kongres
Daar is nog enkele plekke beskikbaar by die PRAAG-kongres wat Vrydagmiddag 25 Februarie en Saterdagoggend 26 Februarie in die noorde van Johannesburg gehou word. Klik hier vir volle besonderhede.
Veiligheidsmagte gryp in om Zuma te beskerm
President Jacob Zuma is Dinsdag in die Ivoorkus deur ontstoke jeugdiges, ondersteuners van presidentskandidaat Alassane Ouattara, oorval.
Meer as twee dosyn pro-Ouattara jeugdiges het op Jacob Zuma se motor toegesak en Suid-Afrikaanse veiligheidsmagte moes ingryp om die president te beskerm. “Zuma, Zuma, vertel die waarheid,” het die jeugdiges geskree.
Zuma word gesien as ‘n ondersteuner van die ongewilde president Laurent Gbagbo wat die verkiesing teen Ouattara verloor het en nogtans weier om uit te tree as leier van dié Wes-Afrika-land.
Zuma is deel van ‘n raadgewende paneel wat lande soos Tsjad, Mauritanië en Tanzanië insluit. Ouattara word in dieselfde hotel waar die paneel vergader, deur Verenigde Nasies-troepe opgepas ‘n dag ná die vergadering met sy teenstander Gbagbo.
Gbagbo weier om af te stap ten spyte van VN-gesertifiseerde uitslae wat toon dat hy op 28 November die verkiesing prysgegee het. Intussen steur Gbagbo homself nie aan Westerse sanksies en internasionale isolasie wat die ekonomie vernietig nie. Hy het reeds die weermag aangewend om opstande te onderdruk.
Die Afrika-Unie erken amptelik Ouattara se oorwinning, maar is verdeel tussen die lande teen Gbagbo, veral in Wes-Afrika, en lande soos Suid-Afrika, wat Gbagbo ondersteun.
Sowat 300 mense is dood sedert die verkiesing en die onrus het kakaopryse tot die hoogste vlak in meer as drie dekades gedryf. Die Ivoorkus is die wêreld se grootste kakaoprodusent.
Burkina Faso se president Blaise Compaore, wat ook op die paneel dien saam met Zuma, het weggebly as gevolg van dreigemente teen hom.
Die kommersiële hoofstad Abidjan was meestal kalm Dinsdag, nadat inwoners groot ontploffings oornag gerapporteer het.
Geweervuur is later in die pro-Ouattara-voorstad van Abobo gehoor. Minstens ses mense wat probeer het om te protesteer teen Gbagbo is Maandag vermoor deur die veiligheidsmagte, het getuies gesê.