‘n Dwaas vind altyd ‘n groter dwaas om hom te bewonder.
– Nicolas Boileau-Despréaux, L’art poétique
Skrywer: Dan Roodt
Het die Afrikaner ‘n bang volk geword?
Vir ‘n geruime tyd begin die frase “bang volk” al hoe meer in my kop draai as gevolg van die menings wat ek op alle gebiede waarneem.
Ons mense wil nie die swartes aanstoot gee deur die waarheid te propageer nie; nou word die leuen aangehang en die waarheid verkrag op ‘n volstruismanier om by ons gewetes verby te kom.
Ons wil nie die swartes aanstoot gee deur openlik vir ons eie lief te wees nie al beteken dit noodwendig dat ons nie ander haat nie, want die risiko is te groot dat dit dalk verkeerd geïnterpeteer kan word.
Ons loop by ons eie mense se ellende verby en help die regering om sy verantwoordelikheid na te kom in ‘n kruiperige soeke na die regering se guns.
Ons word uitgemoor teen ‘n geweldige tempo op die wreedste maniere denkbaar en ons blaas ‘n bietjie tot die volgende blaas met die volgende moord.
Hierdie regering het die afgelope 17 jaar nog niks tot stand gebring nie, net dit waarvoor ons gewerk het afgeneem. Hulle hou aan met afneem sonder om iets self tot stand te bring en wat doen ons? Blaas en raas tot die volgende blaas en raas by die volgende vergryp.
Die belasting wat ons aan die regering betaal, word gesteel en uitgebras; ons mor darrem ‘n bietjie en dan kyk ons maar anderpad.
Ons is bang vir die plaaslike en buitelandse menings en kruip vir goeie wil. Ons kerke doen lustig mee deur die Bybel te misbruik met geïsoleerde versies buite konteks om hulle verraad te verskans.
Intussen trap en verguis en verraai ons Afrikaners mekaar om die skyn van ‘n ruggraat te akkomodeer.
Wat ‘n volk van ruggraatlose swakkelinge het ons nie geword nie, ons verdien niks meer as wat aan ons uitgedeel word nie!
Ek moet aan FW de Klerk en die benewelde Pik Botha die eer betoon wat hulle toekom – hulle het ons Afrikanervolk op een slag effektief die doodskoot gegee.
Israeli wen Nobelprys vir chemie
Die Israeliese wetenskaplike Daniel Shechtman het Woensdag die 2011 Nobelprys vir Chemie gewen vir sy ontdekking van quasikristalle, ‘n mosaïek-agtige chemiese struktuur wat navorsers voorheen gedink het onmoontlik is.
Die Koninklike Sweedse Akademie van Wetenskappe, het gesê Shechtman se ontdekking in 1982 die manier waarop chemici na vaste stowwe kyk, fundamenteel verander. Sy ontdekking het aanvanklik sterk besware van die wetenskaplike gemeenskap uitgelok, en hulle het hom selfs uit sy navorsingsgroep uitgeskop.
Sedertdien, het ‘n Sweedse maatskappy bevind dat quasikristalle een van die mees volhoubare vorme van staal is, wat nou gebruik word in produkte soos skeermeslemmetjies en dun naalde wat spesifiek vir oogchirurgie gebruik word.
Wetenskaplikes eksperimenteer ook met die gebruik van quasikristalle in omhulsels vir braaipanne, hitte-isolasie in enjins, en in lig-emissietoestelle, of LEDs.
Quasikristalle is in die natuur ontdek, in Rusland, vir die eerste keer in 2009.
“Dit voel wonderlik,” sê Shechtman, ‘n 70-jarige uitsonderlike professor by die Israelse Instituut van Tegnologie in Haifa. Hy sal die $1,5 miljoen se toekenning saam met die ander Nobelpryswenners op 10 Desember in Stockholm ontvang.
Zuma wil Khoi en San herstel
Suid-Afrika moet die status van die Khoi- en San-mense ten volle erken, het president Jacob Zuma Woensdag gesê.
“As ‘n demokratiese regering, ons kan nie versuim om hul uitdagings aan te spreek nie,” het hy gesê in ‘n voorbereide toespraak aan die Nasionale Huis van Tradisionele Leiers in Pretoria.
Hy het gesê uit die tyd van kolonisering, met die besetting van Europese regerings, het hulle probeer om die samelewing te oorheers. Een van die resultate, wat nie in geskiedenisboeke gedokumenteer is nie, was die uitwissing van die Khoisan.
“Gedurende die loop van kolonisering is hulle ondermyn en hul karakter en waardigheid byna vernietig.”
Zuma het gesê ‘n omvattende nasionale Tradisionele Sake Wet is opgestel om alle aspekte van tradisionele leierskap, insluitende die sake van die Khoisan te dek.
“Ek… hoop dat die wetsontwerp fundamenteel sal aandag gee aan die lang historiese uitdaging vir die Khoisan.”
Zuma het gesê die wetsontwerp is ‘n duidelike aanduiding van hoe die regering tradisionele leierskap ernstig bejeën. Sodra belanghebbende partye hulle insette gegee het en die wetsontwerp deur die Parlement aangeneem is, sal die wet deur die President onderteken word.
“Ons het ‘n entjie aanbeweeg en is vasbeslote om baie verder te gaan in die herstel van die status van tradisionele leiers wat deur werklik baie van ons mense eerbiedig word,” het Zuma gesê.
Hervormdes sê apartheid was verkeerd
Dr. Johan Otto, voorsitter van die komitee van beswaardes in die Hervormde Kerk, sê hy is uiters ontsteld oor die besluite van die buitengewone algemene kerkvergadering wat bevestig het dat apartheid nie teologies geregverdig kan word nie.
Die twee hoofbesware van lidmate is Woensdag met ‘n groot meerderheid van 67% en 78% onderskeidelik verwerp. Daarvolgens is verlede jaar se besluit nie onregmatig geneem nie en stel dit geen nuwe belydenisskrif daar nie.
Die vergadering het ook sy standpunt oor apartheid nuut verwoord om kritiek daarteen te ondervang.
Otto sê dat hy steeds binne die Hervormde Kerk wil bly en nie ‘n skeuring wil veroorsaak nie.
Die nuwe besluit, wat die buitengewone vergadering aanvaar het, lui: “Die Nederduitsch Hervormde Kerk van Afrika verklaar dat die politieke beleid van apartheid wat toegepas is in die Republiek van Suid-Afrika, nie teologies geregverdig kan word nie en herroep hiermee alle goedkeurings in die verlede van die beleid in uitsprake deur en namens die kerk. Dit was in stryd met die evangelie van Jesus Christus.”
Dr. Kobus Gerber, lid van die Wêreldgemeenskap van Gereformeerde Kerke se uitvoerende komitee, sê die Hervormde Kerk sal nou as lid toegelaat kan word tot dié liggaam.
Onteiening: Nuwe wet kom
‘n Nuwe onteieningswetsontwerp gaan teen Maart volgende jaar voor die parlement dien. Dit sal die ANC in staat sal stel om eiendom in openbare belang te konfiskeer.
‘n Vorige onteieningswetsontwerp is in Augustus 2008 onttrek ná kwaai teenstand. Kommersiële banke, wat in só ‘n geval aan hoë risiko blootgestel sal word, het dié stap toe as ongrondwetlik beskryf.
Die bestaande Wet op Onteiening van 1975, sê die ANC, vertraag grondhervorming.
Mandla Mabuza, waarnemende direkteur-generaal, sê in die departement van openbare werke se verslag dat wye konsultasies intussen weer met ‘n verskeidenheid belangegroepe gehou is.
Volgens Beeld, weet die landbou-organisasie Agri SA niks hiervan nie en is hulle nie weer geraadpleeg nie.
Me. Annelize Crosby, Agri SA se beleidsadviseur, sê egter hulle is in beginsel nie teen onteiening gekant indien die markwaarde van eiendomme die vertrekpunt bly nie.
Sexwale kies Malema se kant
Tokyo Sexwale, minister van huisvesting, het Woensdag gesê ANC-amptenare, ook pres. Jacob Zuma, moet daarop let dat hulle dalk verkeerd kan wees om Julius Malema aan te kla.
“Geen dissiplinêre aksie moet om politieke of persoonlike redes geneem word nie. Dit is ‘n hofproses, nie ‘n vervolging nie,” het Sexwale gesê.
“Daar is altyd ‘n moontlikheid dat die aanklaer verkeerd kan wees.”
Malema en sy adjunk, Floyd Shivambu, word daarvan beskuldig dat hulle die ANC se naam deur die modder gesleep het toe hulle onlangs gedreig het om die regering van Botswana omver te werp.
Die ander leiers wat aangekla word sluit in Sindiso Magaqa, sekretaris-generaal; Ronald Lamola, adjunkpresident; Pule Mabe, tesourier; en Kenetswe Mosenogi, adjunk- sekretaris-generaal.
Die ses word ook daarvan beskuldig dat hulle verdeeldheid in die ANC saai.
Sexwale het gesê hy is deur Malema gevra om in die verhoor te getuig, maar kies nie kant nie.
Daar is wyd berig dat Sexwale en ander ANC-leiers saamsweer om Zuma uit die kussings te lig.
‘n Voorbeeld vir Afrikaners
Vader Phillip Vietri, ’n Rooms-Katolieke priester by die Oratorium van Sint Philip Neri in Port Elizabeth, is onbeskaamd pro-Afrikaans, al het hy Engels grootgeword. As hy in ’n winkel of bank nie in Afrikaans bedien word nie, dring hy daarop aan om met die bestuurder te praat. In ’n interessante artikel wat op praag.co.uk verskyn, vertel hy waarom hy vir Afrikaans en Afrikaners gekies het.
Klik hier.
VF+ wil met Tutu skakel om Dalai Lama-koalisie te vorm
Die VF Plus gaan met biskop Tutu skakel en voorstel dat hy ‘n Dalia Lama-koalisie vorm wat weer die Dalia Lama na Suid-Afrika nooi.
Volgens die regering het hulle nooit die Dalai Lama se visum afgekeur nie, maar was dit nog onder oorweging. As dit korrek is kry die regering ‘n tweede geleentheid om die visum goed te keur. As die regering nie van plan is om ‘n visum aan die Dalai Lama toe te staan nie, kan daar ook hieroor duidelikheid kom.
So ‘n Dalai Lama-koalisie moet nie ‘n politieke liggaam wees nie, maar bestaan uit organisasies en vriende wat die Dalai Lama goedgesind is en instaan vir die reëlings van so ‘n besoek.
So ‘n besoek kan nie-amptelik wees of saamval met Internasionale Menseregtedag op 10 Desember vanjaar. Dit is in belang van Suid-Afrika se buitelandse beeld dat daar duidelikheid oor hierdie saak kom. Dit is betekenisvol dat die Dalai Lama Brasilië, wat ook lid van die Brics-lande is, in September 2011 besoek het.
Malema gehospitaliseer
Julius Malema, president van die ANC-Jeugliga, is in ‘n privaat-hospitaal in Polokwane opgeneem, het die SABC Woensdag berig.
Hy ly aan “griepsimptome”, het die uitsaaier gesê.
Malema het sy regsverteenwoordigers in kennis gestel dat hy nie Donderdag in Johannesburg sy dissiplinêre verhoor van die ANC sal bywoon nie.
Malema, Floyd Shivambu, Sindiso Magaqa, Ronald Lamola, Pule Mabe en Kenetswe Mosenogi is die ANCJL-lede wat verskeie dissiplinêre aanklagte in die gesig staar.
Onder meer is hulle aangekla ná opmerkings dat die ANCJL sou help om ‘n bewindverandering in Botswana te bewerkstellig.
Die ses lede het aan die ANC om verskoning gevra en het hul verklaring teruggetrek. Hulle word ook daarvan aangekla dat hulle onmin gesaai het in die ANC se geledere.