Barack Obama en Dmitri Medwedef het Maandag in die Kremlin ooreengekom om die twee lande se kernarsenale met byna ’n derde te verminder. Obama se tweedaagse besoek aan Moskou het Woensdag ten einde geloop.
Agt verdere voorlopige verdrae is ook deur die leiers van Amerika en Rusland onderteken.
Medwedef het ingestem om 4 500 Amerikaanse militêre vlugte per jaar oor Russiese grondgebied toe te laat om NAVO-voorraad aan Afganistan te lewer.
President Obama en premier Wladimir Poetin het klem gelê op hulle goeie verhoudinge maar ten spyte daarvan is geen handelsooreenkoms bereik nie. Amerika se plan om ’n missielafweerstelsel in Tsjeggië en Pole op te rig is tydens die ontmoeting nie besleg nie.
Die Russe is fel gekant teen die beoogde missielafweerstelsel.
Obama het Michail Gorbatsjof en opposisieleiers ontmoet voor sy vertrek na die G8-spitsberaad in Italië.