Etiket: swendelaar

Graanswendelaar vas

‘n Man wat graanboere in die Vrystaat, Noordwes en Noord-Kaap glo uit R7,6 miljoen met graantransaksies verkul het, verskyn na verwagting vandag weer in die Odendaalsrus-landdroshof.

Gavin Stanley (46) is vroeër op borgtog van R50 000 vrygelaat.

S’fiso Nyakane, woordvoerder van die Valke in die Vrystaat, sê die beweerde bedrog het in 2013 plaasgevind. Vyf graanboere van die Noordwes, Vrystaat en Noord-Kaap is na bewering deur Stanley bedrieg.

Stanley het glo voorgegee dat hy ’n koper het wat bereid was om goeie pryse vir graan te betaal. Die boere het glo ooreengekom dat Stanley die graan kon oplaai, waarna hy na bewering verdwyn het.

Volgens die aanklagte teen hom het hy in al die gevalle boere op dieselfde wyse bedrieg.

Bron: OFM Nuus

Ghanese asielsoeker vas na swendelary

‘n Ghanese burger, en boonop ‘n asielsoeker daarby, is in hegtenis geneem nadat hy glo inwoners uit hul pensioengeld bedrieg het.

Kapt. Stephen Thakeng, polisiewoordvoerder, het aan Volksblad gesê die swendelaar, bekend as Dr. Mama, gee voor hy kan met die voorvadergeeste praat.

Hy steel goedgelowiges se pensioengeld met beloftes dat hy dit in miljoene rande sal verander, sê klaers.

‘n Mynwerker het na ‘n “ritueel” sy werk bedank om sy pensioengeld te kan opeis en die R342 000 aan Dr. Mama gegee.

‘n Egpaar van Theunissen het glo ook hul huis verkoop en al die geld aan die Ghanees oorhandig in die hoop om ryk te word.

Hy is intussen in hegtenis geneem. Die polisie het die publiek gevra om na vore te kom as hulle deur die swendelaar ingedoen is.