Die akteur, Patrick Swayze, het na ‘n tweejaarlange stryd teen pankreaskanker gesterf.
Swayze se openbare beeldhanteerder, Annett Wolf, het gesê die 57-jarige akteur het gister met sy gesin aan sy sy gesterf. Hy het sy siekte verlede jaar openbaar gemaak maar steeds bly werk terwyl hy behandeling ondergaan het.
Swayze het in 1987 ‘n internasionale ster geword vir sy rol in “Dirty Dancing,” ‘n rolprent wat gehandel het oor die volwassewording van ‘n meisie tydens ‘n somerkamp. In 1990 het die rolprent “Ghost” sy sterstatus bevestig.
Swayze het bly werk, selfs nadat hy in Maart verlede jaar dit bekend gemaak het dat hy aan kanker ly. Hy het verskyn in “The Beast,” ‘n dramareeks, en het gesê hy en sy vrou werk aan ‘n memoir.