‘n Militêre hof in Heidelberg het Dinsdag klagtes van openbare geweld teen soldate stil-stil laat vaar.
Die oproerige soldate het in Augustus 2009 onwettig na die Uniegebou opgeruk en chaos veroorsaak om ‘n salarisverhoging van 30% te eis.
“Die klagtes van openbare geweld is van die hofrol geskrap,” het brig.genl. Xolani Mabanga volgens Sapa verklaar.
“Die direkteur van militêre vervolging is van voorneme om die aanklagtes teen die beskuldigdes terug te trek.”
Die 35 soldate word ook daarvan beskuldig dat hulle gedros het, maar die saak is tot Woensdag uitgestel.
Ongeveer 1 000 soldate het op 26 Augustus 2009 aan ‘n optog in Pretoria deelgeneem.
‘n Waterkanon, rubberkoeëls en traangas moes uiteindelik deur die polisie ingespan word om die oproerige soldate te verjaag toe hulle oor versperrings by die Uniegebou geklouter het.