‘n Nuwe mensspesie is in Rusland ontdek nadat DNS-toetse op ‘n vingerbeen gedoen is.
Die been is in Siberië opgegrawe, het wetenskaplikes in Duitsland Woensdag gesê.
Die mens, wat omtrent 30 000 jaar gelede geleef het, het nie aan die Homo sapiens-spesie behoort nie – die enigste vorm van menslike lewe vandag.
Die persoon was ook nie ‘n Neanderdalmens, ‘n spesie wat 35 000 jaar terug uitgesterf het, nie.
Die Max Planck-instituut vir evolusionêre antropologie in Leipzig het die ontdekking gemaak, wat in Donderdag se wetenskapsjoernaal Nature verskyn.
Die bevinding versterk die moontlikheid dat daar nóg ‘n emigrasie van voorouers uit Afrika was, waar alle Homo-spesies se wortels lê.
Wetenskaplikes het voorheen geglo dat slegs Homo sapiens, Neanderdalmense en Homo erectus (’n voorsaat van die moderne mens) dié langafstand hervestiging kon maak.