Etiket: Lesufi

Brief: Oor Lesufi-pop en ‘rassisme’

Na aanleiding van die Lesufi-pop wat blykbaar oornag sy verskyning gemaak het in Pretoria en die etiket van “rassisme” wat nou weer om volksgesindes se nekke gehang word, die volgende.

Behalwe die feit dat die geskreeuery oor “rassisme” nou uiters vervelig raak, besef geagte mnr. Lesufi skynbaar nie dat hy besig is om mee te doen aan volksmoord nie. Hy is besig om ‘n internasionale konvensie ten opsigte van volksmoord te oortree.

In die Suid-Afrikaanse Regskommissie se werkstuk oor Groeps- en Menseregte, Werkstuk 25, verskyn daar op p 334 die volgende oor Volksmoord:

11.28  ‘Sedert die stigting van die VVO is vier belangrike konvensies aangegaan wat minderhede beskerm, te wete:

i) Die Volksmoord-konvensie van 9 Desember 1948 (Die Konvensie met betrekking tot die Voorkoming en Bestrawwing van die Misdaad van Volksmoord)

11.29 Die Konvensie bepaal dat aantasting van ‘n nasionale, etniese, rasse- of religieuse groep met die doel om dit ten dele of in die geheel te vernietig strafbaar is. Onder volksmoord word nie alleen gereken die doodmaak van lede van die groep nie, maar ook die berokkening van ernstige liggaamlike of sielkundige leed aan lede van die groep…’

Kan die afdwinging van ‘n ander taal van onderrig of die gedwonge integrasie van rassegroepe nie gereken word as ten minste “ernstige sielkundige leed” wat die lede van ‘n bepaalde bevolkingsgroep aangedoen word nie?

Mnr. Lesufi moet maar hand in eie boesem steek. Wat is sy beheptheid met die onderdrukking van die taal Afrikaans? Voel hy magtig en meerderwaardig? Voel hy minderwaardig?

Die “ongelykhede van die verlede” kan nie “reggestel” word deur Afrikaans te probeer doodmaak nie. Mnr. Lesufi en sy administrasie moet daarop konsentreer om probleme in eie geledere reg te stel bv. swak opgerigte put-toilette* en wanadministrasie wat aanleiding gee tot die afbrand van bestaande infrastruktuur.

—Elma Potgieter

*In die laerskool in Noordwes was ek in ‘n skool met put-toilette en geen kind het ooit in daardie put-toilette geval nie.

Media en Lesufi orkestreer steeds haat teen Hoërskool Overvaal oor Afrikaans en ‘witheid’

Vandag het hernieude geweld, brandstigting en voorvalle van anti-blanke rassehaat in die omgewing van die Hoërskool Overvaal uitgebreek, ná die geslaagde hofbevel wat die skool teen Panyaza Lesufi, LUR vir onderwys in Gauteng, verkry het. Op die voorblad van The Star, ‘n koerant wat reeds geslagte lank anti-Afrikaanse propaganda publiseer, het ‘n uiters eensydige berig verskyn met die titel Pupils rejected by #HoërskoolOvervaal now at another school: Lesufi.

Dinsdag op RSG se “Praat Saam”-program het sowel Pieter du Toit van die links-liberale webblad Huffington Post as die Beeld-rubriekskryfster Christi van der Westhuizen teen die Hoërskool Overvaal uitgevaar en “witheid” die skuld gegee vir die rassespanning rondom die skool.

Gister en vandag het lede van die EFF en die ANC voor die skool betoog en slagspreuke geskreeu dat alle blankes die land moet verlaat of selfs doodgemaak moet word.

Een van die opgeruide swart betogers het luidkeels gekla: “Daar is wit onderwysers daarbinne!”

Die studente-organisasie COSAS het gedreig om die skool “toe te maak” en het tydens ‘n onderhoud met die TV-kanaal ANN7 gesê dat Lesufi die skoolbeheerraad moet afdank en eenvoudig beheer van die skool behoort oor te neem.

Verskeie anti-Afrikaanse betogers is ook vandag in hegtenis geneem nadat hulle ‘n petrolbom na ‘n polisievoertuig geslinger het.

Oorwinning vir Afrikaans in Hoërskool Overvaal-saak

In sy uitspraak vanmiddag het regter Bill Prinsloo gesê dat die besluit van Afrikaanshater Panyaza Lesufi en die Gautengse onderwysdepartement om eensydig die taalbeleid van Hoërskool Overvaal te verander “teen die wettigheidsbeginsel indruis”. Hy het ook bevind dat die twee Engelse skole in die omgewing wat teenstrydige verklarings oor hul kapasiteit afgelê het en eintlik namens die departement gelieg het, slegs die skool se saak versterk het.

“Ek vind dit wesentlik onwaarskynlik dat twee hoogs gekwalifiseerde, ervare skoolhoofde so ‘n growwe fout kan maak as hulle ‘n verklaring opstel,” het die regter in sy uitspraak gesê.

Beide Engelse skole in die omgewing, General Smuts en Phoenix High School het oor genoegsame plek vir meer as 55 leerlinge beskik, maar het hul aanvanklike verklarings in opdrag van Lesufi en sy departement gewysig toe die departement besef dat hulle die saak teen Overvaal sou verloor indien dit op die lappe kom dat die Engelse skole nog plek vir die leerlinge gehad het.

Volgens regter Prinsloo, “het die departement sy reg om die skool se kapasiteit te verifieer, nooit sinvol uitgeoefen nie. Indien hulle enige moeite gedoen het, sou hulle die oorweldigende kapasiteit vir nog leerlinge by die twee ander skole ontdek het.”

Regter Prinsloo het verder bevind dat Lesufi en sy distriksdirekteur “geen ag geslaan het op die kapasiteit van die skool om die leerlinge te akkommodeer vergeleke met die twee ander skole in die gebied nie”. Weens haar rol in die debakel, en dat sy wesentlik besig was om die gereg te dwarsboom, het regter Prinsloo aanbeveel dat sy aan professionele tugstappe onderwerp behoort te word.

Die regter het ingeslyks WhatsApp-boodskappe aan die twee Engelse skoolhoofde as getuienis in die hof toegelaat. In die boodskappe word een van die hoofde gedreig dat hy afgedank sal word as hy nie sy verklaring verander om te sê dat daar nie meer plek by sy skool is nie. Daarmee het die onderwysdepartement die skoolhoof gedwing om meineed te pleeg.

Regter William Prinsloo het ‘n bestraffende kostebevel teen die Gautengse Onderwysdepartement uitgereik en bevind dat Hoërskool Overvaal nie die Engelse leerlinge hoef in te neem nie.

In sy reaksie op die uitspraak, het Panyaza Lesufi gesê dat hy die skool se beheerraad teen Maartmaand gaan afdank en met die belastingbetaler se geld teen die uitspraak gaan appelleer.

Volgens ‘n joernalis, Barry Bateman, het van die swart ouers na afloop van die hofsaak in Pretoria gedreig om die skool af te brand, omdat hulle dit as “rassisties” beskou.