Hierna het die skool hom noodgedwonge tot die hof gewend in ’n aansoek om die besluit van ’n komitee, wat deur die onderwysdepartement aangestel is om die skool se taalbeleid te bepaal, tersyde te stel.
Die voorsitter van die skool se beheerliggaam, mnr. Johan Ernst, het gister die uitspraak verwelkom. “Ons is bly dat die tradisies van die skool bevestig is en beskou hierdie as ’n sterk uitspraak vir die reg wat Afrikaans het.”
Regter Bill Prinsloo het die uitspraak gelewer en gelas dat die huidige dubbelmediumtaalbeleid onnmiddellik opgeskort word hangende ’n finale hofbevel. Die regter het Hoërskool Ermelo beskryf as “’n ou, bekende skool wat oor dekades sy leerlinge in Afrikaans opgevoed het en landwyd ’n baie goeie reputasie het rakende akademiese uitnemendheid, sport en kulturele prestasies”.
Hy het voorts gesê dat die hoof van die Oos-Transvaalse onderwysdepartement op “onbehoorlike wyse sy wil op die skool wou afdwing en daar is sterk aanduidings dat die komitee nie onafhanklik gefunksioneer het nie, maar in opdrag van die departementshoof. Dit dui op onreëlmatigheid.”
Hoërskool Ermelo moes vyf jaar gelede insgelyks hof toe gaan toe die onderwysdepartement die hoof en onderhoof geskors en sy beheerliggaam ontbind het. Toe het die departement die saak met koste verloor.