‘n Swart ma, 24, van Mpumalanga is in hegtenis geneem nadat sy glo haar eenjarige kind gewurg en doodgebyt het.
Die beskuldigde, wie se naam nie bekend gemaak mag word totdat sy in die hof verskyn het nie, is Woensdagoggend by haar huis in Zibokwane in hegtenis geneem.
Lede van die gemeenskap het berig dat sy haar dogter in die vroeë oggendure aangeval het.
“Ons het ‘n vrou in hegtenis geneem wat vermoedelik haar dogter vermoor het,” het Mzwandile Nyambi, woordvoerder van die polisie, gesê. “Die vrou is vermoedelik geestelik versteurd.”
Die dogtertjie het op die grond gelê toe die polisie by die toneel opgedaag het. Sy het bytmerke aan haar bors en krapmerke in haar nek gehad.
“Die beskuldigde is onder polisiebewaking na ‘n plaaslike hospitaal geneem,” het Nyambi bygevoeg.
Velisiwe Mdaka, Tonga-stasiebevelvoerder, het die gemeenskap versoek om na verstandelik gestremde persone om te sien om soortgelyke voorvalle te voorkom.
Die vrou sal na verwagting in die hof verskyn sodra sy uit die hospitaal ontslaan word.