Alhoewel Herman beweer dat sy nie die Nazi’s se siening van vroue onkrities benader nie, het ‘n storm om haar losgebars. Sy is gisteraand weer eens in ‘n geselsprogram met Johannes B. Kerner op die ZDF-kanaal uitgesluit omdat sy haar standpunt bly verdedig het. Nadat Kerner die 48-jarige Eva gevra het of sy haar menings sal hersien, het sy geantwoord dat ‘n mens net sowel nie oor die Autobahn in Duitsland mag praat nie, want die Nazi’s het dit gebou.
Sy het bygevoeg dat ‘n mens kwalik meer oor die Duitse geskiedenis mag dink sonder om in die moeilikheid te kom. Die Bildzeitung het berig dat Herman se uitlatinge oor geluk, egverbintenisse, manlikheid en moederskap "vinnig met Nazi-uitsprake in verband gebring word".
Die stof het nog lank nie gaan lê nie, want intussen het die Katolieke Kerk se uitnodiging aan Eva Herman vir nog ongelukkigheid gesorg. Haar teenwoordigheid by ‘n kerkkongres in Fulda waar sy met entoesiasme ontvang is, het aanleiding gegee tot kritiek van die Joodse Sentrale Raad, ‘n invloedryke liggaam in Duitsland. Volgens die noordelike afdeling van ARD, die NRD, se uitvoerende hoof, het verskeie gaste hul verskynings met die TV-kanaal gekanselleer vanweë Herman se standpunte.
Die feit dat Hitler tuisteskeppers met groot gesinne beloon het met toekennings bly klaarblyklik ‘n teer punt in Duitsland. Renate Künast, leier van die Groen Party, het gesê dat Herman liewer voor die stoof moet gaan staan as om op TV te verskyn. In Rusland is die afdanking egter met ongeloof begroet want Stalin het eweneens tuisblymoeders met baie kinders uitgesonder vir lof. Dié kwessie word nooit opgehaal as ‘n voorbeeld van totalitarisme nie.
Die afsku wat Russe in Westerse feministe het, is juis as gevolg van die Kommuniste se gesinspolitiek waar vroue nie net in fabrieke moes swoeg nie, maar tuis nog kinders moes grootmaak om hul werklas sodoende te verdubbel. Die Russiese koerant, Istvestia, het voorts gewonder waarom die hoof van die Duitse Weermag nie ook summier afgedank word nie.
Die Bundeswehr het onlangs Duitse soldate na ‘n militêre kompetisie by name Erna in Estland gestuur. Erna was naamlik die Naziverkenningsmag wat gestuur is om die Rooi Leer se brûe agter die linies op te blaas.