So aan die begin van die jaar wil-wil mense weer mismoedig word, en plek-plek is bure vir mekaar suur. Soos waar die een se feestelike klappers die ander se boerboel die vreeslikste vrese op die lyf laat loop het.
By oupa Nic op die plaas het die oujaarsaand-joligheid ‘n paar nuwejaarsongevalle met messteke opgelewer.
Maar is Suid-Afrikaners werklik so uniek op die negatiewe ingestel?
Gaan tik nou die woordjie “humor” in Google in. Dit lewer amper 100 miljoen trefslae op. Sommiges in Afrikaans en sommige in Nederlands en ‘n klompie in ‘n onbekenderige taal, Engels.
Neem nou Engels en kies die woord “angry” as ‘n nuttige teenoorgestelde vir humor. So onbekend soos Engels ook al mag wees, dit lewer vier keer soveel trefslae as “humor” op.
Herrie is skoon ontGoogled.
Om te wys Afrikaners is baie minder negatief, gaan tik nou “kwaad” in Google in. Dit lewer minder as drie miljoen trefslae op.
‘n Mens hoef nie eens ‘n FF in Suid-Afrika se matriekwiskunde te hê nie om te weet dit maak Afrikaners baie minder negatief as die Engelse.
Afrikaners is mos plesierig,
Dan hou hulle ‘n opskop
Vry en steek ‘n stywe dop,
En raak dan vreeslik rumoerig …of so iets gaan die liedjie mos.
Maar om wetenskaplik suiwer te wees en die hipotese mooi van teorie (want dit werk nie in die praktyk nie) na wetmatigheid te neem, kom ons doen nog ‘n wetenskaplike toets.
Tik in: “braaf.” Dit het een en ‘n half miljoen trefslae. Tik in “vreesbevange” en ‘n mens kry maar 22 000.
Gaan tik “brave” in en dit lewer 42 miljoen op, maar gaan tik die Engels vir vreesbevange in, “bang” (uitspraak bêng) en dit lewer meer as ‘n 100 miljoen trefslae op.
So het Herrie te ene male bewys die Afrikaners is vroliker as wat hulle suurknolle is, en dapperder as wat hulle lafhartig is, terwyl by die Souties die omgekeerde geld.
Slim ding dié, die rekenaar.
So lank mens jou rekenaarterminologie net goed onder die knie het, soos om te weet ‘n megabite beteken die muskiete is vanjaar groot, download beteken die afleweraars het die voggies vir die naweek se braai gebring, en off line beteken die boerboel het die nat biltong en droëwors op die draad bygekom.