Barack Obama, president van die VSA, het Donderdag gesê gays en lesbiërs moet gelyk onder die wet in Afrika behandel word. Sy boodskap is met kritiek deur sy gasheer president Maki Sall van Senegal begroet.
Sall het gesê Afrika is nie gereed om homoseksualiteit te dekriminaliseer nie. Obama se boodskap is uiters ongewild op die vasteland.
Homoseksuele verhoudings is in ten minste 38 lande in Afrika onwettig.
Obama is tans in Senegal as deel van ‘n week lange besoek aan Afrika.
“My basiese siening is ongeag ras, ongeag godsdiens, ongeag geslag, ongeag seksuele oriëntasie… wanneer dit by die wet kom, moet mense gelyk behandel word,” het Obama in Dakar gesê.
Benewens Senegal sal Obama ook in Suid-Afrika en Tanzanië tyd spandeer as deel van sy week lange reis.
Hy sal vandag in Suid-Afrika aankom.