Sevran het om verskoning gevra indien enigiemand aanstoot geneem het en beweer dat hy eintlik “baie lief vir Afrika” en verkeerd aangehaal is. Die werklike woorde wat hy oor Afrika geskryf het, kom in sy boek, Le privilège des Jonquilles, voor:
“Niger. Onhoudbare foto-safari. ʼn Mens kom kinders by die skopgraaf vol teë in dié land (is dit ʼn land of ʼn begraafplaas?) waar die vrugbaarheidsyfer van vroue die hoogste ter wêreld is. Nege kinders gemiddeld per vrou. ʼn Ramp. Die skuldiges is maklik identifiseerbaar, hulle laat die spoor van hul misdade na deur links en regs te kopuleer (…), hulle kan daarmee aanhou want dis vir hulle lekker, niemand gaan dit teen hulle hou nie, wat ook ʼn misdaad teen die mensdom is: om kinders te maak, die enigste misdaad teen die mensdom wat nie strafbaar is nie. Daar word selfs vir hulle geld gestuur sodat hulle kan aanhou om hul bevolking uit te brei, om die dood te saai.”
In reaksie op kritiek, het Sevran op die radiostasie Europe 1 gesê: “En wat daarvan? Dis die waarheid! Afrika vrek weens al sy kinders wat gebore word sonder dat die ouers oor die middele beskik om hulle te voed. Ek is nie die enigste wat dit sê nie. Ons moet die helfte van die planeet steriliseer!”
Ironies genoeg was Sevran se ouers kommuniste van Spaanse afkoms en hy was ook ʼn segsman van die vorige sosialistiese president, François Mitterand. Tans is Sevran egter ʼn ondersteuner van die sentrum-regse president Nicolas Sarkozy. Die vorige sosialistiese kultuurminister, Jack Lang, het tydens die herrie sy steun aan Pascal Sevran toegesê deur te verklaar dat Sevran “opreg anti-rassisties” is.
Die staatstelevisiediens het egter ʼn waarskuwingsbrief aan hom gerig waarin die hoofuitvoerendebeampte, Philippe Baudillon, hom maan dat dit “ondenkbaar is om uitsprake wat blatant in stryd is met die waardes van die openbare uitsaaier in enige vorm of medium te versprei”.
Vanweë al die publisiteit het daar 50 000 eksemplare van die gewraakte boek, Dans le privilège des Jonquilles, verkoop.