Brandon Huntley (32), die Suid-Afrikaner wie se vlugtelingstatus in Kanada in die gedrang is, het dié week gesê dat hy sy saak tot in die hoogste hof in Kanada sal voer.
Huntley het in 2009 ‘n opskudding veroorsaak toe asiel in Kanada aan hom toegestaan is nadat hy aangevoer het swart misdadigers teiken hom weens sy velkleur.
Drie regters in die federale appèlhof in Kanada het Woensdag Huntley se appèl teen dié hof se besluit van verlede jaar om sy vlugtelingstatus terug te trek, verwerp.
Huntley sal hom vervolgens tot die hooggeregshof in Kanada wend, het die Sunday Times berig.
Volgens sy regsverteenwoordigers sal dié aansoek die finale besluit of hy in Kanada kan bly of nie met sowat vier jaar uitstel. Hy is in 2004 uit Suid-Afrika weg.