Kategorie: Nuus
Iran staak olie aan Britte en Franse
Iran het die verkoop van ru-olie aan Britse en Franse maatskappye gestaak as vergeldingsmaatreël teen nuwe EU-sanksies teen die Islamitiese staat.
“Uitvoere van ru-olie aan Britse en Franse maatskappye is gestaak… ons sal ons olie aan nuwe kliënte verkoop,” is woordvoerder Alireza Nikzad op die Ministerie van Petroleum se webwerf aangehaal.
Die Europese Unie het in Januarie besluit om die invoer van ru-olie van Iran vanaf 1 Julie in te kort.
Die VSA en Brittanje het gister ook versoek dat Israel nie Iran se kerninstellings aanval nie. Groeiende internasionale kommer heers dat die Israeli’s gereed is om ‘n aanval te loods, en het beide lande genoop om hulle in die openbaar daarteen uit te spreek.
In hul waarskuwings, het die Amerikaanse weermagstafhoof genl. Martin Dempsey, en die Britse minister van buitelandse sake William Hague gesê dat ‘n Israeliese aanval op Iran ernstige gevolge vir die hele streek sal inhou, en aangedring daarop dat Israel internasionale sanksies teen Teheran meer tyd gee om te werk.
Dempsey het gesê ‘n Israeliese aanval “is nie verstandig nie,” en Hague het gesê dit sal nie “‘n wyse ding wees nie”. Dit is nie bekend of hulle boodskappe gekoördineer is nie.
Iran se minister van olie het op 4 Februarie gesê dat die Islamitiese staat sy olie-uitvoere na “sommige” Europese lande sal staak.
Die Europese Kommissie het verlede week gesê dat die besluit nie die blok sal raak nie aangesien hulle genoeg in voorraad hou om in hul behoeftes te voorsien vir ongeveer 120 dae.
Frankryk se Total het reeds opgehou om Iran se ru-olie te koop, wat onderhewig is aan nuwe EU-sanksies. Markbronne het gesê Royal Dutch Shell het ook afgeskaal. Shell het geen kommentaar op die aankondiging gelewer nie.
Onder die Europese lande, is die skuld-geteisterde Griekeland blootgestel aan Iranse olie-ontwrigting.
Iran het meer as 700,000 vate per dag aan die EU, Turkye in 2011 verskaf, het bedryfsbronne gesê.
Teen die begin van hierdie jaar het die invoer gedaal na ongeveer 650,000 vate soos sommige kliënte teruggesny het in afwagting van ‘n EU-verbod.
Saoedi-Arabië sê hy is bereid om ekstra olie te voorsien. Iran het Riyadh gekritiseer vir die aanbod.
Iran het gewaarsku dat enige sanksies op sy olie internasionale ru-pryse sal verhoog.
Brent ru-olie pryse was op $118,35 kort nadat Iran se staatsbeheerde media verlede week aangekondig het dat olie-uitvoere na ses Europese lande gestaak is.
Proefbuisburger reg vir Oktober
Die wêreld se eerste proefbuishamburger, in ‘n Nederlandse laboratorium geskep deur groeiende spiervesels van beesstamselle, sal gereed wees om te braai in Oktober, glo wetenskaplikes.
“Ek is van plan om Heston Blumenthal [die bekende sjef] te vra om dit voor te berei,” het Mark Post, leier van die kunsmatigevleisprojek by die Maastricht Universiteit in Nederland, in Vancouver aan die AAAS (American Association for the Advancement of Science) gesê.
Navorsers glo dat vleis wat in fabrieke gegroei word, eerder as op plase, ‘n meer volhoubare en minder omgewingskadelike bron van voedsel sal wees. Lewende hawe soos beeste en varke is slegs 15 persent doeltreffend by die omskakeling van plantaardige proteïene na vleis, van die gras en graan wat hulle eet.
“As ons die doeltreffendheid kan verhoog vanaf 15 tot 50 persent deur die vleis in die laboratorium te kweek, sal dit ‘n geweldige sprong vorentoe wees,” het prof. Post gesê.
Met beesstamselle, het die Nederlandse navorsers spiervesels tot 3 cm lank en 0.5mm dik gekweek. Die vesels word geoefen soos hulle groei, net soos regte spiere, deur hulle te buig en te strek. Hulle voed op ‘n sous van plantaardige proteïene en ander voedingstowwe, gelykstaande aan die gras- of graandieet van beeste.
Op die oomblik is die vesel ‘n bleek geel-pienk kleur, eerder as die rooi van rou beesvleis, omdat hulle nie bloed bevat nie, maar prof Post beplan om hul voorkoms te verbeter.
Patrick Brown, ‘n biochemie professor aan die Stanford Universiteit in Kalifornië, het by die AAAS-byeenkoms gesê dat die globale vleisverbruik na verwagting sal verdubbel teen 2050, en dat veeboerdery reeds verantwoordelik is vir 18 persent van mensgemaakte kweekhuisgasvrystellings en biodiversiteit wêreldwyd bedreig.
Om vet te verskaf, is ook ‘n noodsaaklike element in die werklike burgers, en dus sal beesvetselle wat in die laboratorium gekweek word met die spiervesels ingemaal word.
“Ons het hierdie projek begin sowat ses jaar gelede, en ek verwag dit sal nog 10 tot 20 jaar duur voordat ons ons vleis sal kan massa-vervaardig,” het prof. Post gesê.
‘n Anonieme persoon het die projek gefinansier met €250 000. Hy sal verdere fondse bydra na die beplande burger van laboratorium-gegroeide spier in Oktober gebraai is.
Mulder herskryf geskiedenis, sê Jong Kommuniste
Die leier van die Vryheidsfront Plus, Pieter Mulder, probeer om die geskiedenis te herskryf deur voor te gee dat die setlaars en kolonialiste Suid-Afrika as “‘n huis te huur” aangetref het, het die Jong Kommunisteliga van SA Sondag gesê.
“Die feit is dat die land gewelddadig en met bloedvergieting afgeneem is, en uiteindelik gewetstaaf is in 1913, wat die Afrika-inboorlinge met geen ander keuse gelaat het as om hulleself aan loonuitbuiting in die mynbedryf te onderwerp nie,” het die YCLSA se sekretaris, Buti Manamela, in ‘n verklaring tydens hulle lekgotla gesê.
“Sulke uitlatings is niks anders as argaïese blanke ontkenningsug nie en sal die werklike proses van grondverdeling en grondrestitusie troef.”
Woensdag het Mulder in die Parlement aangevoer dat swart “Bantoe-sprekende” mense geen historiese aanspraak op 40 persent van die land het nie.
“Afrika-inboorlinge het nooit in die verlede in die hele Suid-Afrika gewoon nie,” het hy tydens ‘n debat oor President Jacob Zuma se staatsrede gesê.
Zuma het Mulder later gewaarsku om lig te loop oor die emosiewekkende vraagstuk van grondhervorming.
Sondag het die YCLSA aangedring op Mulder se bedanking as Adjunkminister van Landbou, Bosbou en Visserye.
“Ons glo nie dat ‘n persoon soos Pieter Mulder in die regering moet dien, veral in sy verantwoordelikheid in Landbou en Bosbou, nie,” het Manamela gesê.
“Ons doen ‘n beroep vir sy onmiddellike bedanking, siende dat hy nie die algehele doelstelling van die regering steun nie, of vir die president om hom van sy pligte te onthef.”
Mulder – in sy hoedanigheid as leier van die Vryheidsfront Plus – het egter later op Sondag gereageer deur te sê die liga het die opmerkings wat hy in die Parlement gemaak het, verdraai.
“Ek het in my toespraak verwys na die geskiedkundige verkryging van grond. Die argument word tans doelbewus op ‘n verdraaide manier aangebied.”
Hy het gesê dat sy betoog was dat die Koi en die San die eerste inwoners van Suidelike Afrika was. Daarna het groepe van die Noorde en van die Suide inwaarts beweeg en die Koi en die San na droër gebiede uitgedryf.
“Die Noordelike en Suidelike groepe kan nie aanspraak maak op die hele land nie. Ek het bykomend verwys na voedselsekuriteit en die probleme wat emosionele slagspreuke oor grond in die uitvoering van hierdie taak veroorsaak.”
In hulle verklaring het die YCLSA gesê dat kommer oor die gebruik van regsprekende instellings vir politieke gewin ook tydens die lekgotla geopper is.
“Ons ondersteun die voorgestelde regulasies vir lede van die regbank om hulle besigheidsbelange en voordele soos alle ander openbare ampsdraers te verklaar,” het hulle gesê.
Hulle sal ‘n veldtog voer vir grondwetlike byvoegings wat van die regbank sal verwag om onderwerp te word aan populêre en demokratiese verkiesings.
Die lekgotla het ook die dissiplinêre verhoor van die geskorste ANC Jeugliga-leier, Julius Malema en sy uitvoerende bestuur, aangeraak.
“… In die beweging kom en gaan enkelinge, maar die beweging bly behoue ongeag hoe groot ons glo ons in vergelyking met die beweging is,” het hulle gesê.
Malema en ander jeugligaleiers is in November daaraan skuldig bevind dat hulle die ANC in oneer gebring en verdeeldheid in die party gesaai het.
Dit was nadat hulle, onder andere, opmerkings gemaak het oor regeringsveranderinge in Botswana.
Hulle is geskors vir tydperke wat strek van 18 maande tot vyf jaar en het onsuksesvol geappelleer teen die sanksies. Hulle bied tans bewyse ter versagting aan. – Sapa
Mediese amnestie?
Die kwessie van mediese paroolaansoeke van gevangenes is reeds ‘n netelige saak in Suid-Afrika, met ANC-ondersteuners wat oënskynlik voorkeur bo ander landsburgers geniet.
Nou het die ANC ‘n nuwe plan bedink wat die aansoeke nog verder gaan kortwiek en waarskynlik gou in administratiewe chaos sal dompel, so erg dat dit byna neerkom op mediese amnestie.
Die land se 170 000 gevangenes, of hul families, sal om mediese parool kan aansoek doen, en ‘n nuwe raad van net tien dokters sal die hele proses moet deursien. Die aansoekers hoef ook nie meer terminaal siek te wees nie.
Nosiviwe Mapisa-Nqakula, minister van korrektiewe dienste, is egter vol vertroue dat die plan sal werk, en die regulasies sal op 1 Maart in die Staatskoerant geproklameer word.
Dr. Victor Ramathalese sal as voorsitter van die nuwe adviesraad dien en dr. Angelique Coetzee die ondervoorsitter.
Mapisa-Nqakula het die nuwe stelsel aangekondig omdat die huidige mediese paroolstelsel gekritiseer is weens die vrylating van pres. Jacob Zuma se voormalige finansiële adviseur, Schabir Shaik.
Mediese parool word alleen in gevalle oorweeg waar gevangenes terminaal siek is en word geïnisieer deur medici of korrektiewe personeel. Die land se 52 paroolrade besluit oor die aansoeke.
Volgens Mapisa-Nqakula skep dit die geleentheid vir dokters om hul vriende te help. “Dit stel die regering bloot. Ons wil hê dokters moet die verantwoordelikheid dra sodat parool nie verkeerdelik toegestaan word nie.”
Sy het belowe dat verkoues of chroniese toestande, soos MIV/vigs, egter nie oorweeg sal word nie, ten spyte daarvan dat die lys siektes wat gevangenes sal laat kwalifiseer, “oop” sal wees.
Die nuwe regulasies sal enige gevangene, of hul familie, in staat stel om aansoek te doen om mediese parool.
Mapisa-Nqakula het aangedui dat sekere aansoeke “prioriteit” sal geniet. Sy wou nie Jackie Selebi, voormalige polisiehoof, uitsonder by naam nie.
Selebi is onlangs terug tronk toe nadat hy ontslaan is uit ‘n privaathospitaal waar hy vir nierversaking behandel is.
Beelde tot puin gereduseer
Vandale het ‘n olifantbeeld in Durban vernietig en twee beskadig, blykbaar in ‘n soeke na skrootmetaal, volgens die Sunday Tribune.
Een olifant is tot ‘n hoop puin gereduseer, terwyl ‘n ander ‘n gat in die kant het waar ‘n deel van die draadraam ontbreek. Die ore en tande van ‘n derde olifant is verwyder en sy raam is ook beskadig.
Beeldhouer Andries Botha en sy regsverteenwoordiger het aan die munisipaliteit geskryf om hulle te maan om die beelde te beskerm, die koerant berig.
Die kunswerk is ‘n opdragwerk wat teen ‘n koste van R1, 5 miljoen opgerig is as deel van die stad verfraaiing vir die Wêreldbeker-sokkertoernooi.
Die oprigting is stopgesit nadat die ANC gesê het dat die olifante die Inkatha Vryheidsparty simboliseer, het die koerant berig.
Botha moet nog R250 000 ontvang wat die stadsraad aan hom verskuldig is.
‘Chink’ kos 2 hul werk
ESPN, die Amerikaanse sporttelevisienetwerk, het een werknemer geskors en ‘n ander een in die pad gesteek omdat hulle – dieselfde – rassistiese benaming gebruik het om die basketbalspeler van die New York Knicks, Jeremy Lin, te beskryf.
In albei gevalle het hulle die woord “chink” gebruik in verwysing na Lin, ‘n Palo Alto-boorling van Sjinese afkoms.
“Ons vra weereens om verskoning, veral van Mnr. Lin,” het ESPN geskryf. “Sy prestasies is ‘n bron van groot trots vir die Asiër-Amerikaanse gemeenskap, insluitende die Asiër-Amerikaanse werknemers by ESPN. Deur selfondersoek, verbeterde redaksionele praktyke en beheermaatreëls, en reaksie op konstruktiewe kritiek, sal ons beter vaar in die toekoms.”
Een werknemer het die woord in ‘n mobiele opskrif – “Chink in the Armor” (“Gaping in die Pantser”) – gebruik nadat die Knicks verlede Vrydag teen die New Orleans Hornets verloor het.
Die opskrif het net van 2h30 tot 3h05 verskyn, maar ‘n werknemer van SB Nation het dit vasgevang.
‘n Paar dae voor dit het Max Bretos, ‘n aanbieder vir ESPN News, dieselfde beskrywing gebruik terwyl hy met die Knicks-legende Walt Frazier gesels het. ‘n Radiokommentator op ESPN se luggolwe het ook die woord gebruik, maar die persoon is nie ‘n ESPN-werknemer nie.
ESPN het aanvanklik Saterdag apologie aangeteken met die volgende verklaring:
“Ons het ‘n algehele hersiening van ons kruisplatform- redaksionele prosedures geloods en is besig om dissiplinêre optredes te bepaal om te verseker dat dit nie weer gebeur nie. Ons is jammer en vra om verskoning vir die flater.”
Die Asiër-Amerikaanse Verdedigingsbond het ook Saterdag ‘n verklaring uitgereik en die beskrywing “rassisties en onverskoonbaar” genoem. Die organisasie het ‘n beroep op ESPN gedoen om ‘n verskoning “wat prominent op ESPN se televisieprogramme uitgesaai sal word,” uit te reik, en het ook aangebied om met ESPN se werknemers te vergader om toekomstige rassisme te voorkom.
ESPN se werknemers is nie die enigstes om klei te trap waar Lin betrokke is nie. MSG, wat die Knicks besit, het beeldmateriaal van Lin uitgesaai waar hy uit ‘n fortuinkoekie – wat met Sjinese restaurante vereenselwig word – wip, en Fox Sports se rubriekskrywer Jason Whitlock het ‘n aanstootlike twiet oor basketbal se nuutste ster gepos.
Whitock het gou verskoning aangebied en gesê hy het toegegee aan ‘n “onvolwasse, hoërskoolagtige, komediese” sy van sy persoonlikheid.
Lin, ‘n Harvard-gegradueerde, het die afgelope paar weke vanuit die niet verskyn om die Knicks tot respekwaardigheid te lei. Sondag het Lin die Knicks tot ‘n oorwinning van 104-97 oor die NBA-kampioene die Dallas Mavericks by Madison Square Garden aangevoer. Hy het 28 punte en 14 hulpverlenings aangeteken.
Sy kitsgewildheid het vir hom ‘n plek in die NBA se All-Star naweek besorg – vir die wedstryd op Saterdag die 25ste Februarie maar nie vir die wedstryd op die 26ste Februarie nie – en ook gehelp dat MSG en Time Warner Cable ‘n dispuut kon oplos. Dié twee maatskappy was in ‘n struweling oor fooie en het New Yorkers van plaaslike sportgebeurtenisse beroof.
Sy verrysing het tot wye bespreking oor sy ras en of dit tot groter bewonderaarondersteuning stimuleer, gelei.
Geweld en xenofobie teister Rustenburg
Tussen 350 en 400 mense is in hegtenis geneem in verband met ‘n onwettige staking deur mynwerkers wat die afgelope week gewelddadig geraak het, het die polisie Sondag gesê.
Volgens brig. Thulani Ngubane word hulle aangekla van opsetlike saakbeskadiging, diefstal, onwettige byeenkomste, openbare geweld en die besit van gesteelde goedere.
Plaaslike ondernemings wat aan buitelanders behoort is Donderdag en Vrydag in Freedom Park geplunder. Ongeveer 38 winkels is deur dié geweld geraak, het Ngubane gesê.
Hy het ontken dat die aanvalle xenofobies van aard was en het gesê ondernemings, eerder as die buitelanders, is in die geweld geteiken.
Ongeveer 100 mense, waarvan die meeste Somaliërs en Ethiopiërs is, is weens die geweld verplaas en woon by vriende in ‘n nabygeleë township, het hy gesê.
Die township was oor die naweek stil toe mynwerkers huis toe gekeer het, maar die geweld kan weer Maandag uitbreek, het Ngubane gesê.
“Die mense wat verantwoordelik hiervoor is, moet dit staak. Dit is al waarvoor ons vra,” het hy gesê.
Die Nasionale Unie van Mynwerkers (NUM) het die stakers Saterdag gevra om terug te keer werk toe.
“Die NUM is verbind tot ‘n vreedsame oplossing by [Impala Platinum] Implats en vra al sy lede en werkers in die algemeen om volgende week terug te keer werk toe, waar die kwessies aangespreek sal word,” het Lesiba Seshoka, woordvoerder, gesê.
Die betogings het Donderdag in Phokeng begin, met mynwerkers wat blykbaar mense geïntimideer en aangerand het wat werk toe wou gaan.
Hulle het paaie wat na Freedom Park lei afgesper en klippe na motors gegooi. Hulle het ook winkels geplunder. ‘n Satelliet-polisiekantoor in Freedom Park is ook aan die brand gesteek.
Volgens Seshoka het die unie Vrydagaand met die bestuur by Implats vergader in ‘n poging om die probleem op te los.
Implats het reeds ingestem om 17 200 werkers, wat vroeër afgedank is nadat hulle onwettig gestaak het, weer in diens te neem.
Die NUM en Implats moet nog die verskille in bonusse wat aan mynwerkers gegee is, bespreek.
‘Ontban die Jeugliga’
ANC-jeugliga president Julius Malema het ‘n beroep op jong swartes gedoen om te veg vir die “ontbanning” van die Jeugliga, het SABC-nuus berig.
Hy het sy volgelinge by Bosbokrand toegespreek. Malema gesê hy sal voortgaan om die African National Congress te ondersteun, selfs al is hy geskors, het die uitsaaier gesê.
Die ANC se nasionale Appèlkomitee het Malema opgeskort vir vyf jaar en oorweeg tans pleidooie ter versagting van sy en ander jeugleiers se oortredings .
Malema het gesê die jeug moet nie geïntimideer word nie.
“Ons is gereed om elke situasie te konfronteer. Ons is vreesloos, ons is vasbeslote om te veg vir die ekonomiese vryheid van ons mense en daarom sal intimidasie nie werk nie,” is hy aangehaal deur die SABC.
“Eintlik, as ons geïntimideer word, maak dit ons vasbeslote om ons oproepe vir die totale bevryding van ons mense te verskerp.”
Malema en sy uitvoerende gesag is verlede November skuldig bevind daaraan dat hulle die party in die verleentheid gebring het met kommentaar oor regimeverandering in Botswana en president Jacob Zuma ongunstig met sy voorganger, Thabo Mbeki, vergelyk het.
Dis ‘n smeltkroes-rekord
Gemengde huwelike in die VSA het geklim tot 4,8 miljoen, ‘n rekord van 1 uit elke12, soos ‘n konstante invloei van nuwe Asiatiese en Latyns-Amerikaanse immigrante die poel van voornemende huweliksmaats uitbrei. Swartes is nou ook aansienlik meer geneig as voorheen om met blankes te trou.
‘n Pew Research Center-studie, Donderdag vrygestel, gee besonderhede oor die diversifisering van Amerika waar veelrassige huwelike en die gemengde-ras kinders wat hulle produseer, ‘n uitdaging aan die aanvaarde idees van ras stel.
“Die styging in veelrassige huwelike dui daarop dat rasseverhoudinge verbeter het oor die laaste kwart van hierdie eeu,” sê ‘n sosiologie-professor by Cornell Universiteit. “Kinders van gemengde ras het Amerika se kleurlyn vervaag. Hulle het dikwels interaksie met ander mense aan weerskante van die rasseverdeling en dien dikwels as makelaars tussen vriende en familie van verskillende rasse-agtergronde,” het hy gesê. “Maar Amerika het nog ‘n lang pad om te gaan.”
Die syfers kom uit die vorige sensusse sowel as die 2008-2010 American Community Survey, wat jaarliks 3 miljoen huishoudings toets. Die syfers vir “wit” verwys na die blankes wat nie van Spaanse afkoms is nie. Vir die doeleindes van die definisie van gemengde huwelike, word Latyns-Amerikaans gereken as ‘n ras.
Die studie het bevind dat 8,4 persent van alle huidige Amerikaanse huwelike rassig is, van 3,2 persent in 1980. Terwyl Latyns-Amerikaners en Asiërs steeds die mees waarskynlike is om, soos in vorige dekades, met iemand van ‘n ander ras te trou, is die grootste sprong wat sedert 2008 plaasgevind het onder swartes, wat histories die mees afgesonderde ras was.
In deelstate waar immigrante meer is, insluitend Hawaii, Nevada, New Mexico en Kalifornië, is dit meer algemeen. Meer as 15 persent van alle nuwe huwelike in 2010 was veelrassig. Die wit Vermont het die laagste koers van ondertrouery, naamlik 4 persent.
Minderhede, jong volwassenes, en die hoër opgevoede laag is meer geneig om te sê gemengde huwelike is ‘n verandering ten beste vir die samelewing. Die syfer was 61 persent vir 18- tot 29-jariges, vergeleke tot 28 persent vir diegene van 65 jaar en ouer.
As gevolg van toenemende gemengde huwelike, is veelrassige Amerikaners ‘n klein maar vinnig groeiende demografiese groep, wat ongeveer 9 miljoen, of 8 persent van die bevolking uitmaak. Saam met die swartes, Latyns-Amerikaners en Asiërs, het die Sensus Buro geskat, sal hulle gesamentlik ‘n meerderheid van die Amerikaanse bevolking verteenwoordig deur middel van die eeu.
“Ras is ‘n sosiale konstruk is, ras is nie werklik nie,” sê Jonathan Brent, 28. As die seun van ‘n wit pa en ‘n Japannese-Amerikaanse ma, glo hy sy agtergrond help om hom situasies uit verskillende perspektiewe te laat verstaan.
Nog ‘n analise het bevind dat egskeidingsyfers onder gemengde-ras paartjies meer afhanklik van die spesifieke ras-kombinasie is, met wit vroue wat getroud is buite hul ras, meer geneig om te skei. Gemengde huwelike tussen swartes en blankes word ook beskou as die minste stabiel.
Wit-Asiatiese paartjies wat getroud is, het die hoogste mediaaninkomste, byna $71,000. Kort op hulle hakke volg Asiaties-Asiaties ($62,000), wit-wit ($60,000), wit-Latyns ($57,900), wit-swart ($53,187), swart-swart ($47,700) en Latyns-Latyns (byna $36.000) .
Die top drie state vir wit-swart getroude pare is Virginia, Noord-Carolina en Kansas, met 3%.