Skrywer: Dan Roodt
Polisie kook plaasmoordsyfers
Die polisie se statistiek vir plaasaanvalle en -moorde vir 2008 en 2009 is foutief, het Nathi Mthethwa, minister van polisie, Donderdag erken.
Die syfers, 794 plaasaanvalle en 86 moorde, is “per ongeluk” gedupliseer uit die polisie se verslag vir 2006 en 2007.
“Die polisie en die minister betreur die fout,” het Mthethwa gesê.
Mthethwa weet nie wat die aantal plaasmoorde en -aanvalle tans is nie, aangesien die polisie sedert 2007 nie meer afsonderlik boekhou nie.
Die algemene geloofwaardigheid van misdaadstatistiek wat in die 2008-’09-verslag verskyn, is in die parlement deur opposisiepartye in twyfel getrek.
Net om Sarkozy span nouer
Die Franse polisie het Donderdag twee mense na aan Liliane Bettencourt, die miljardêr-erfgenaam van die L’Oreal-skoonheidsreus, in aanhouding geneem.
Bettencourt se vriend, wat ‘n fotograaf is, en ‘n man wat haar fortuin bestuur is in aanhouding geneem om sekere vrae te beantwoord.
Pres. Nicolas Sarkozy van Frankryk het Maandagaand in ‘n TV-onderhoud bewerings dat hy vir sy verkiesingsveldtog van 2007 onwettige skenkings van Bettencourt ontvang het, heftig ontken.
Hy het glo gereeld by Bettencourt se huis gekuier om dik koeverte vol kontant te ontvang.
Geert Wilders loods internasionale vryheidsalliansie
Volgens die omstrede Nederlandse politikus, Geert Wilders, gaan hy ‘n internasionale vryheidsalliansie loods om die immigrasie van Molems na die Weste te keer.
Hy het Donderdag aan The Associated Press vertel dat hy beplan om die internasionale beweging later vanjaar in die VSA, Kanada, Brittanje, Frankryk en Duitsland te loods.
Hy beskou die Islamitiese geloof as ‘n “fascistiese” een, sê hy. Die boodskap sal wees: “Stop Islam, verdedig vryheid!”.
Wilders, wat van haatspraak aangekla word, verdedig gereeld gay- en vroueregte.
BP-olielek gestop
Die kabel wat bo-oor die olielekkasie in die Golf van Mexiko geplaas is, in ‘n poging om die lekkasie te stop, was suksesvol.
Die gereedskap waarmee dié olielekkasie gestop moes word het Woensdag probleme gegee maar owerhede sê dié probleme is opgelos.
Kent Wells, senior uitvoerende visepresident van BP, het tydens ‘n perskonferensie gesê dat daar vir die eerste keer in drie maande nie meer olie in die Golf van Mexiko invloei nie, nadat ingenieurs die lekkasie geleidelik begin toestop het.
Twee passe weer gesluit
Twee Oos-Kaapse bergpasse is weer vir verkeer gesluit ná swaar sneeu.
‘n Woordvoerder vir Arrive Alive, Tsepo Machaea, sê die Lootsbergpas tussen Graaff-Reinet en Middelburg en die Wapadsbergpas tussen Cradock en Graaff-Reinet is tot verdere kennisgewing gesluit.
Dit is die tweede keer dat bergpasse dié week gesluit word. Maandag is vier passe in die provinsie gesluit as ‘n voorsorgmaatreël teen nat, gladde paaie. Die weerkantoor het ysige weer vir Vrydag voorspel.
Zuma vra kalmte oor xenofobiese gerugte
President Jacob Zuma het ‘n beroep om kalmte en eenheid gedoen te midde van berigte dat buitelanders uit Suid-Afrika vlug uit vrees vir hernieude xenofobiese geweld.
Daar was reeds voorvalle van plakkers in die Wes-Kaap wat teen buitelanders opgetree het.
Zuma het verwys na die xenofobiese haataanvalle in 2008 wat beleggersvertroue geknou het. Hy sê in ‘n verklaring elemente met duistere agendas wat chaos en verwoesting wil sien, moet geïsoleer word.
Regeringsamptenare sê die jongste vrese is ‘n werklikheid, maar oordrewe gerugte wakker vrese van grootskaalse geweld aan.
Oorgrens-vervoeroperateurs word oorval deur buitelanders wat wil terugkeer weens toenemende vrese van xenofobiese aanvalle in Suid-Afrika.
Volgens die Zimbabwiese koerant – die Herald – doen vervoermaatskappye flink sake om Zimbabwiërs en hul besittings terug in hulle land te kry.
‘n Busrit van Beitbrug na Bulawayo kan enigiets van R300 tot R1000 kos. Die rit is duurder indien die persoon nie ‘n geldige paspoort het nie. Die vervoer van huishoudelike goedere soos yskaste en stowe kos ook R1000.
Volgens die operateurs is baie van die reisigers gewone Zimbabwiërs wat die media die skuld gee vir die huidige situasie en sê dat vrese onnodig aangeblaas word.
Senegal se president en seun byt vas
President Abdoulaye Wade van Senegal het gerugte deur die opposisie dat hy sy seun, Karim, as president wil sien, ontken.
Hy dring daarop aan dat dit sy seun se reg is om homself verkiesbaar te stel.
“Dit is glad nie my plan om my seun in my plek aan te stel voor ek gaan nie,” het Wade gesê.
“Karim is ‘n burger van Senegal en dit is sy volste reg om homself as ‘n kandidaat vir die presidentskap verkiesbaar te stel.”
Pres. Wade het in Parys met die media gepraat.
Hy en 12 ander staatshoofde van voormalige Franse kolonies het die Bastilledag-vieringe in Parys bygewoon.
Pres. Wade (84) is Senegal se derde president en beklee al sedert 2000 die amp.
Hy het pas aangekondig dat hy homself weer tydens die 2012 presidensiële verkiesing verkiesbaar sal stel.
Polisie tevrede met misdaadsyfers vir WB
Net minder as 1000 misdade op wedstryd-dae is aangemeld in en om die land se stadions gedurende die Wêreldbeker-sokkertoernooi, het Nathi Mthethwa, minister van polisie, Donderdag gesê.
Die meerderheid van hierdie misdade was diefstal en rooftogte, het Mthethwa aan die media in Pretoria gesê.
‘n Totaal van 704 misdade is buite die stadions gepleeg, terwyl 290 in stadions gebeur het.
“Ons het spesifiek gefokus op misdade binne ‘n 1,5km-radius van sekere plekke,” het Mthethwa verduidelik.
Sowat 1788 misdade is by die jolkolle aangemeld, waar daar sowat 1,2 miljoen sokkergeesdriftiges opgedaag het.
“Hierdie syfers bewys dat sekuriteit goed was,” het hy gesê.
Hy het verduidelik dat die syfers slegs misdade verteenwoordig wat by die polisie aangemeld is en dat daar nie noodwendig ‘n dossier vir elkeen geopen sal word nie.
Van die 1002 dossiere wat geopen is, is 558 sake afgehandel en word die res ondersoek.
Sowat 447 persone is tydens die toernooi in hegtenis geneem, waarvan 181 buitelanders was en 266 Suid-Afrikaners.
Sommige van die buitelanders is reeds gevonnis.
Sowat 44 000 polisiebeamptes is tydens die toernooi regoor die land ontplooi.
