Dan Roodt, Author at praag.co.za

Roodt kry hofbevel teen ‘Zoeloe-grondeienaars’

‘n Landboukundige van KwaZulu-Natal het ‘n hofbevel verkry teen ‘n swartman wat aanspraak maak op sy grond en dit glo stuk vir stuk verkoop.

Hy voer aan dat hy daarop geregtig is, omdat die grond aan die Zoeloes behoort.

Die eienaar van die stuk grond van 82 hektaar, Rusty Roodt, het ‘n dringende aansoek in die Pietermaritzburgse hooggeregshof ingedien.

Regter Ron McLaren het die aansoek toegestaan, wat Philani Bha Ndlovu, of enige iemand namens hom, verbied om die eiendom te betree voor die saak op die 21ste van die maand aangehoor is nie.

Roodt sê sowat 20 mense het die afgelope Vrydag kleims afgesteek, terwyl ‘n stootskraper Sondag gebruik is om die grond gelyk te maak.

Swart vlag van Al Kaida wapper oor Libië

Die swart vlag van al-Kaida wapper oor Libië nadat NAVO formeel sy militêre veldtog beëindig het.

Die vlag is op die dak van die hof in Benghazi gehys waar die land se nuwe regeerders die Sjaria afgekondig het nadat hulle die eertydse leier, Moeammar Gaddafi gesodomiseer en vermoor het.

Die gebou word gesien as die setel van die rewolusie, wat deur rebellemagte tot hul voorlopige regeringshoofkwartier en mediasentrum verklaar is.

‘n Akademikus van Tripoli, Abdoel al-Raheem, is intussen verkies tot Libië se tussentydse eerste minister. Hy is voor die media aangewys deur die lede van die regerende nasionale oorgangsraad. Die voormalige tussentydse premier, Mahmoed Jibril, het – soos belowe – bedank nadat Libië deur rebellemagte met NAVO se hulp vir Gaddafi ontsetel het.

Die oorgangsraad het onderneem om ná agt maande verkiesings te hou vir ‘n nasionale vergadering. ‘n Nuwe grondwet sal daarna binne ‘n jaar opgestel word voordat parlementêre verkiesings gehou sal word.

Op die swart vlag bo-op die regeringshoofkwartier staan “Daar is geen ander god as Allah” met ‘n volmaan onderaan. Die vlag is neffens die Libiese nasionale vlag gehys.

Die nuwe Sjariawette wat aangekondig is, word deur kenners as ‘n ramp beskou. Sjariawette geld in Afghanistan onder die Taliban.

Dit beteken onder meer dat Libiese mans nou meer as een vrou sal kan neem. Poligamie was onder Gaddafi se heerskappy verbode.

Deur die afskaffing van die huwelikswet, verloor vroue die reg om die familiehuis as hulle skei te hou. “Dit is ‘n ramp vir Libiese vroue,” het een kommentator gesê.

NAVO het byna 5900 teikens sedert die bomaanvalle begin het in Libië sewe maande gelede, in puin gelê om “burgerlikes” te beskerm.

Oostenrykers slaags oor ‘seksistiese’ volkslied

Die woorde van Oostenryk se “seksistiese” volkslied moet verander word, sê linkse parlementariërs. Maar oor hierdie saak voel die sentrum presies soos die verregses, wat reeds die loopgrawe beman.

Oostenryk se volkslied is die perfekte viering van die Alpe, ‘n lied wat hulde bring aan die berge en strome, die “vetes” en “gevegte” van sy onstuimige verlede. Die melodie is glo deur Mozart gekomponeer.

Die enigste probleem, volgens ‘n groep vroulike Oostenrykse LP’s, is dat dit verskriklik seksisties is.

Vier-en-sestig jaar na die goedkeuring daarvan, het hulle voorgestel dat ‘n wetsontwerp, wat ondersteun word deur ‘n meerderheid van die LP’s, die lirieke verander om die 51,4% van Oostenrykers wat nie mans is nie, ook te erken.

Die lied se eerste vers, in 1947 geskryf deur Paula von Preradovic, lui dat Oostenryk “groot manne” opgelewer het. Die LP’s wil “en vroue” aan die einde byvoeg, en ignoreer diegene wat kla dat dit nie pas by die wysie nie.

Die derde strofe verwys na ‘n “koor van broers”. Dit, sê die beswaardes, moet verander word na ‘n “vreugdevolle koor”.

Nie almal is gelukkig nie. Carmen Gartelgruber, van die opposisie Vryheidsparty van Oostenryk, meen die idee is bespotlik. “Volgende ding wat iemand sal voorstel is dat die arend op Oostenryk se wapen ‘n grimeersakkie in plaas van ‘n sekel vashou,” het sy tydens ‘n parlementêre debat vroeër vanjaar gesê.

Stefan Petzner, ‘n LP van die regse Alliansie van die toekoms van Oostenryk (BZÖ), het tydens die Wetsontwerp se eerste lees voorgestel dat die lirieke net sowel verander kan word sodat die lied nie verwys na ‘n “land katedrale” nie, maar ‘n “land van dominatrixes”.

Petzner is geen vreemdeling as dit by omstredenheid kom nie. Die 30-jarige politikus het drie jaar gelede vir opspraak gesorg toe hy erken het dat hy die gay minnaar van die voormalige BZÖ leier, Jörg Haider, was. Haider het in 2008 in ‘n motorongeluk gesterf.

‘n Voorlopige besluit oor die lirieke word van die grondwetlike komitee in die Oostenrykse parlement op 22 November verwag. LP’s sal dan in Desember oor die veranderinge stem.

As dit slaag, sal die nuwe weergawe tydens alle amptelike geleenthede gesing word en in al die nuwe uitgawes van die skoolhandboeke verskyn.

Vroeër vanjaar het inwoners van Peru ‘n veldtog geloods om hul volkslied te verander, want dit was te “negatief”.

Фильчаков прокурор

Boeremagdokter red Tukkiemeisie

Dr. Lets Pretorius, aangeklaagde in die Boeremagsaak, was een van die dokters wat ure lank op die 22-jarige Tukkiemeisie wat deur ‘n swart aanvaller byna doodgesteek en verkrag is, geopereer het. Haar toestand is tans stabiel waar sy in die waakeenheid van die hospitaal verkeer.

Sy is verlede week 23 keer met ‘n mes gesteek, voordat sy wreed verkrag is. Sy is toevallig in ‘n erg verswakte toestand deur ‘n inwoner van dieselfde meenthuiskompleks ontdek by haar tuinhekkie na die aanval. Sy het haarself, byna sterwend, na buite gesleep.

Haar eie dapperheid, die flinke optrede van haar mede-inwoner en haar mediese span, het heel waarskynlik haar lewe gered.

Dr. Lets Pretorius, wat saam met dr. Stefan Rawlins, ‘n plastiese en rekonstruktiewe chirurg, en dr. Pieter Coertze, ‘n ortopediese chirurg, ‘n noodoperasie op haar uitgevoer het, sê sy is besonder dapper asook diep gelowig.

Dr. Pretorius het ‘n oproep aan alle mediese personeel en die gemeenskap in die breë gedoen om saam te staan teen hierdie soort barbaarse optrede

Die meisie ontvang tans antiretrovirale behandeling na die verkragting.

Twee polisielede is intussen aangekeer nadat die verdagte ontsnap het. Konst. Mphikeledi Alfred Mahlanga (39) en ao. Amos Chris Masilela (48) het Maandag in die Pretoria-Noordse streekhof verskyn op aanklagte van regsverydeling en hulpverlening tot ontvlugting.

Die verdagte is sonder hand- of voetboeie na die dr. George Mukhari-hospitaal in Ga-Rankuwa, noord van Pretoria, geneem omdat hy glo gekla het dat hy siekerig voel. Hy het daarna deur ‘n toiletvenster ontsnap.

Volgens Beeld het die twee polisielede foto’s met hul selfone van die joernaliste se motors en registrasienommers geneem, nadat hulle deur die koerant se fotograaf afgeneem is.

Dokters in opstand oor Tukkie-aanval

Ek was en is steeds tot in my siel ontsteld.

Die pragtige kind (22 jaar oud) het saam met vriende Bybelstudie gedoen in haar meenthuis binne ‘n veiligheidskompleks in Magalieskruin.

Na die byeenkoms het sy saam met die gaste na buite gestap en die deur oopgelos.

Toe sy terugkom wag die barbaarse wese haar in met ‘n skerp en groot mes, na wat ons mediese span kon aflei van die wonde.

Die inbreker dien haar uiteindelik 22 steek en snywonde toe.

Een was direk in haar gesig, op haar neus, deur haar bolip, langs die mond verby tot by haar ken. Die snywond was skuins in haar wang in en het haar gesiggie amper in twee gekloof.

In haar kop is verskeie steek en snywonde en die punt van die mes het in een van die wonde in die kopbeen afgebreek.

Een wond is aan die kant van haar nek en strek amper tot in die long. Dit het haar slagaar met millimeters gemis.

Sy het soos ‘n tier geveg en in die proses het hy haar linkerduim in die web oopgekloof sodat dit letterlik aan senings gehang het.

‘n Ortopediese chirurg moes probeer om alles weer bymekaar te bring.

Aan al die vingers van haar linkerhand was daar snye. Twee van die vingers se senings is ook afgesny.

Hy het haar blykbaar daarna kamer toe gedwing waar hy, terwyl sy moes gelê het, ongelooflike diep wonde aan haar bene toegedien het.

Hierna, het hy terwyl sy met hierdie wonde lê en bloei, haar soos ‘n dier verkrag.

Hy het ook klaarblyklik by ander huise in die kompleks probeer inbreek. Hy is ook gekoppel aan drie ander verkragtings en ‘n poging tot moord.

Hy is later in Pretoria-Noord in hegtenis geneem met die rekenaar in sy besit.

Hy moes Maandag om 10h00 in die Landroshof in Pretoria-Noord verskyn, maar het reeds ontsnap.

Hierdie daad het die dokters wat daarvan kennis dra asook die wat ek mee gesels het, baie ernstig ontstel.

Dit is dalk nou tyd om as proffesionele mense te wys dat ons in opstand kom daarteen.

Ons doen dan langs hierdie weg ‘n beroep op alle dokters en mediese personeel, om op te staan teen hierdie wreedaardige, ongenadige aanvalle van misdadigers teen weerlose en onskuldige vroue.

Nie-mediese volksgenote is uit die aard van die saak natuurlik ook “opgeroep”.

Фильчаков

‘Ek wil wit wees’

Die swart kwaito-musikant Mshoza is vasbeslote om haar pigmentasie te bowe te kom. Sy is tans besig om haar vel te bleik en chirurgies haar voorkoms te verander.

Onverstoord deur neerhalende uitsprake en grappies op sosiale netwerk-webwerwe, sê Mshoza (ook bekend as Nomasonto Mnisi) sy het hard gewerk om die lewe wat sy nou lei, te kan bekostig.

“Ek verstaan nie hoekom mense nou ‘n probleem het dat ek met my geld doen wat ek wil nie. Dit is my lewe.

“Miskien moet hulle begin lewe in plaas daarvan om uit ‘n bak van negatiwiteit te eet al die tyd,” het sy gesê.

Volgens die sanger, wat reeds honderde duisende op rhinoplastie [vir haar neus], ‘n borsmaatvergroting en maagvetverwydering, spandeer het, is haar voorkoms waaraan sy miljoene bestee, net die begin van ‘n lang en ingewikkelde proses.

“Ek sien tans drie velspesialiste. Hulle het die eerste fase voltooi. Ek lyk nie regtig op die oomblik bleek nie. Maar ja, wanneer alles voltooi is, sal ek lyk soos ‘n wit persoon. Van kop tot tone. Ek kan ook die rhinoplastie oordoen om my nuwe vel te pas. Maar dit beteken nie dat ek popmusiek sal begin sing of anders optree nie.

“Ek sal nog steeds dieselfde persoon bly wat my ondersteuners ken.”

Die sanger, algemeen bekend vir haar liedjie Kortez, het gesê sy weet nie wanneer die hele proses voltooi gaan wees nie.

Die ma van twee het aan die lig gebring dat die redes agter haar besluit om haar velkleur te verander vir haar ‘n teer onderwerp is.

Gevra of sy ontevrede is met die manier waarop sy gebore is, het ‘n selfversekerde Mshoza egter geantwoord: “Ek het nie ‘n probleem met die manier waarop God my geskape het nie. Om die waarheid te sê is ek lief vir Hom. Ek bid die hele tyd.

“Ek doen maar net waarvan ek hou. Dieselfde mense wat kritiek oor my uitspreek, het vals hare, naels en wimpers.

“Ek het baie oproepe ontvang van mense wat sê hulle wil graag dieselfde ding doen.” Haar man en kinders hou ook van die gedagte, sê sy.

Intussen het ‘n paar Twitter-gebruikers so ver gegaan as om te sê dat Mshoza wit massas wil werf vir die Demokratiese Alliansie.

Palestyne kry volle lidmaatskap van UNESCO

Palestina het Maandag ‘n volle lid van die VN se kulturele en opvoedkundige agentskap geword, ‘n hoogs verdelende skuif wat die Verenigde State en ander teenstanders meen hernude Midde-Oosterse vredespogings kan benadeel.

Amerikaanse wetgewers het gedreig om die sowat $80 miljoen te weerhou in jaarlikse befondsing aan UNESCO indien hulle Palestynse lidmaatskap goedkeur. Die Verenigde State dra ongeveer 22% van UNESCO se befondsing by.

Groot blydskap heers by UNESCO nadat afgevaardigdes die lidmaatskap in ‘n stemming van 107-14, met 52 wat buite stemming gebly het, aanvaar het.

“Lank lewe Palestina!” het een afgevaardigde, in Frans, by die buitengewoon gespanne en dramatiese vergadering van UNESCO se Algemene Konferensie, geskree.

Terwyl die stemming ‘n groot simboliese betekenis dra, bly die kwessie van die grense van ‘n uiteindelike Palestynse staat, sekuriteitsprobleme en ander geskille steeds onopgelos.

Palestynse amptenare wil volle lidmaatskap van die Verenigde Nasies verkry, maar die poging is steeds onder hersiening en die VSA het gesê hulle sal dit veto tensy daar ‘n vredesooreenkoms met Israel bereik word. Die Palestyne het dus afsonderlik vir lidmaatskap by die Parys-gebaseerde UNESCO en ander VN-liggame aansoek gedoen.

Maandag se stem is beslissend. Die lidmaatskap neem formeel in aanvang wanneer Palestina UNESCO se stigtingshandves onderteken.

Die Amerikaanse ambassadeur vir UNESCO, David Killion, het gesê Maandag se stem “kompliseer” Amerikaanse pogings om die agentskap te ondersteun. Die Verenigde State het teen die maatreël gestem.

Israel se ambassadeur te UNESCO, Nimrod Barkan, het die stemming ‘n tragedie genoem.

“UNESCO handel in die wetenskap, nie wetenskapfiksie nie,” het hy gesê. “Hulle het UNESCO gedwing om standpunt oor ‘n politieke onderwerp in te neem, buite sy bevoegdheid.”

“Hulle het ‘n drastiese besnoeiing van bydraes tot die organisasie afgedwing,” het hy gesê.

Amerikaanse buitelandse minister Hillary Rodham Clinton het verlede week die beraadslaging van UNESCO as “onverklaarbaar” beskryf en gesê die bespreking van Palestynse lidmaatskap in internasionale organisasies kan nie onderhandeling met Israel vervang as ‘n vinnige roete na Palestynse onafhanklikheid nie.

Grondbesetters slaan toe ‘vir Malema’

‘n Groep swartmense het privaatgrond in Hilton buite Pietermaritzburg beset en beweer dit behoort aan Julius Malema, president van die ANC-jeugliga.

Rusty Roodt, grondeienaar, het aan The Witness gesê hy sal Maandag die Pietermaritzburg-hooggeregshof nader om ‘n hofbevel te bekom wat die mense verhoed om sy grond te betree.

Hy het gesê die polisie het niks gedoen om die grondbesetting by Winterskloof in Hilton te keer nie.

“Ons sit voort wat ons begin het toe ons Donderdag en Vrydag betoog het om terug te neem wat ons s’n is,” het een van die besetters gesê in verwysing na die optog vir ekonomiese vryheid wat deur Malema gelei is.

Malema vrees nie Valke nie

Julius Malema, president van die ANC-jeugliga, het die Valke uitgedaag om hom aan te kla, berig die Daily Sun.

“Laat hulle kom! Ek is moeg daarvoor om aanhoudend gedreig te word,” het Malema aan die koerant gesê.

“Almal sit die Valke op my. Ek het nog nooit enigiets verkeerd gedoen nie en dalk is dit beter as die Valke my aankla sodat ek die bewerings voor ‘n landdros kan verduidelik.”

Malema het reageer op berigte dat hy dalk in hegtenis geneem kan word op aanklagte wat verband hou met sy finansiële sake.

Hy het gesê indien die Valke bewyse teen hom het, moet hulle hom vervolg.

“Indien die Valke my gaan aankla, is dit goed. Laat diegene wat bewyse het na vore kom,” het Malema gesê.

“Die SMS’e waarvan hulle praat en die geld wat hulle sê in my rekening gedeponeer is, moet in die hof verduidelik word.”

Die Valke wou nie Maandag kommentaar lewer oor die saak nie.

The Times het Maandag berig dat ‘n gesamentlike ondersoek deur die Valke en die Suid-Afrikaanse Inkomstediens (SAID) na die jeugleier se finansies byna afgehandel is.

Volgens die berig is die ondersoek “so goed as afgehandel” en dis “net ‘n kwessie van tyd” voor owerhede optree.

Фільчаков прокурор

SA-huursoldate help om Gaddafi te vang

Suid-Afrikaanse huursoldate is waarskynlik sonder hulle medewete deur NAVO gebruik om Gaddafi in ‘n lokval te lei.

‘n Plaaslike veiligheidsmaatskappy, wat hoofsaaklik werk vir oud-polisiemanne in die buiteland vind, het glo ‘n verbintenis met die 19 huursoldate.

Volgens die koördineerder was die mans die laaste paar weke deur Navo gekontrakteer om spesifieke take in Libië uit te voer.

Danie Odendaal, een van die groep, het aan Beeld gesê die groep het in Libië aangekom sodat hulle Gaddafi na Niger kon neem.

Die NAVO-aanvalle is glo op spesifieke oomblikke onderbreek om die rebelle die geleentheid te gee om Gaddafi gevange te neem.

Lees meer.