Dan Roodt, Author at praag.co.za

Duitsers het geweet waar Gaddafi is

Duitsland se buitelandse intelligensiediens, die BND, het gehelp om die ligging van afgesette Libiese leier Moeammar Gaddafi voor sy inhegtenisname, presies aan te dui.

Bronne wat vertroud is met die verwikkelinge het aan Der Spiegel vertel wat gebeur het.

Die voortvlugtige voormalige leier se presiese wegkruipplek in sy tuisdorp Sirte was om die waarheid te sê, reeds vir weke lank bekend aan die BND voor sy inhegtenisname en marteldood op 20 Oktober.

Agente binne die organisasie het ‘n lang tradisie van inligtingversameling in die Midde-Ooste, en het daarin geslaag om vas te stel waar die gevalle leier homself weggesteek het van rebellemagte, het die BND-bronne gesê.

Maar geen geo-data wat kon gelei het tot ‘n geteikende lugaanval is gedeel met NAVO nie, het Duitse inligtingsbronne bevestig. Dit blyk dat NAVO-troepe wel ‘n vae idee van Gaddafi se skuilplek gehad het, want toe hy probeer het om uit Sirte te vlug, het Franse vegvliegtuie sy konvooivoertuie aangeval.

Die BND se bedrywighede in die Libiese konflik is nie die eerste keer dat die organisasie in ‘n oorlog betrokke raak nie. Hulle was ook aktief gedurende die oorlog in Irak in 2003. Alhoewel die destydse kanselier Gerhard Schröder heftig ontken het dat die Duitsers ‘n aktiewe rol in die konflik gespeel het, was Duitse agente die tussengangers om intelligensie van Bagdad aan die Verenigde State se amptenare oor te dra.

Op ‘n soortgelyke manier, het Duitsland verkies om nie deel te wees van die stemming tydens die Veiligheidsraadresolusie op 17 Maart nie. Die gebruik van militêre mag om Libiese burgers te beskerm, is deur Duitsland afgewys. Dit was ‘n ongewilde besluit by hulle tradisionele Westerse bondgenote.

Of die BND se intelligensie-pogings om Gaddafi op te spoor onderneem is om die politieke skade te herstel, is nie seker nie, aangesien Gaddafi se marteldood ‘n verleentheid vir die VSA is.

‘Israel bedreig wêreldvrede’

Resultate van ‘n nuwe peiling wat in opdrag van die Europese Kommissie onderneem is, toon dat Israel deur die Europeërs in 15 lande as die grootste enkele bedreiging vir vrede in die wêreld gesien word, groter selfs as Noord-Korea, Iran en Afghanistan.

Terwyl die Europese Kommissie die volledige uitslag van die verkiesing Maandag vrygestel het, het die International Herald Tribune berig dat 7 500 mense in die Europese Unie (500 in elk van die 15 EU-lidlande) gevra is om ‘n lys van 15 lande op te stel wat ‘n bedreiging vir wêreldvrede inhou. Israel was heel bo-aan die lys van lande wat as ‘n bedreiging beskou word.

Hierdie opname is ‘n aanduiding dat Europeërs die demoniseringsveldtog wat teen Israel en die land se ondersteuners deur Europese leiers en media gerig word, heelhuids gekoop het.

Die Simon Wiesenthal-sentrum het sy verontwaardiging aan die Europese Kommissie se president, Romano Prodi, per skrywe oorgedra.

“Hierdie skokkende resultate, wat Israel as die grootste bedreiging vir vrede in die wêreld – groter as Noord-Korea, Iran en Afghanistan – beskou, daag logika uit en is ‘n rassistiese verbeeldingsvlug wat toon dat anti-Semitisme diep gewortel in die Europese samelewing is, meer as in enige ander tydperk sedert die einde van die Tweede Wêreldoorlog, ” sê Rabbi Marvin Hier, die sentrum se dekaan en stigter.

“Indien die resultate van hierdie opname werklik soos gerapporteer is bestaan, dan moet Israel die enigste gevolgtrekking moontlik maak en dit is dat die Europese Unie en sy lede geen rol behoort te speel in enige toekomstige Midde-Oosterse vredesproses nie,” het Hier gesê.

Sentrumamptenare sal met Javier Solana, sekretaris-generaal van die Europese Unie, in November ontmoet om hierdie en ander verwante kwessies te bespreek.

Griekeland mag dalk Eurosone verlaat

Die Duitse minister van Finansies, Wolfgang Schäuble, het Griekeland gewaarsku dat hy dalk uit die Eurosone sal moet uittree indien die jongste Europese reddingspakket in ‘n referendum verwerp word.

Kanselier Angela Merkel en die Franse president, Nicolas Sarkozy, sal binnekort dringende samesprekings met die Griekse eerste minister, George Papandreou, voer nadat hy onverwags aankondiging het dat Griekeland ‘n referendum sal hou oor die reddingspakket.

Die Rand het in oornaghandel met net meer as een persent gedaal te midde van beleggers wat ontslae geraak het van hoë risiko bates oor onsekerheid weens die skuldkrisis in die Eurosone.

Asiese aandele, die Euro, kommoditeite en die Australiese dolldar het ook vanoggend gedaal oor vrese dat Europa se skuldkrisis finansiële chaos tot gevolg sal hê en dat beleggers weer die veiligheid van die dollar sal opsoek.

Amerikaanse aandele het ook gedaal, terwyl die leiers van die wêreld se grootste ekonomieë in Frankryk begin aankom vir die G20 beraad. Pres. Zuma sal ook die beraad bywoon.

Dié byeenkoms sal oorheers word deur die moontlikheid dat Griekeland uit die Eurosone sal tree.

Александр Фильчаков

Satiriese koerantkantoor afgebrand

Die kantore van ‘n satiriese Franse koerant wat ‘n uitgawe aan die Arabiese Lente gewy het, is afgebrand.

Die profeet Mohammed het op die voorblad van dié uitgawe as “gasredakteur” verskyn en daar word beweer dat die aanval op die kantore hiermee verbind kan word.

Die koerant, Charlie Hebdo, het dié uitgawe tot Charia [Sjaria] Hebdo herdoop.

Op die voorblad van die spesiale uitgawe was ‘n strokiesprent van die profeet Mohammed wat sê: “100 houe as jy jou nié doodlag nie”.

Die profeet Mohammed, met ‘n rooi hanswors-neus op, was ook op die agterblad te sien, saam met die woorde “Ja, Islam is versoenbaar met humor”.

Kuberkrakers het die koerant se webwerf aangeval en die gewone tuisblad vervang met ‘n foto van die Groot Moskee in Mecca.

Onderaan die foto het die woorde “Geen god behalwe Allah” verskyn.

Die webwerf is tans van die lug af.

Franse owerhede het die aanval verdoem en hul ondersteuning aan die koerant verklaar.

“Vryheid van spraak is ‘n onvervreembare reg in ons demokrasie. Alle aanvalle op die vryheid van die pers word ten sterkste veroordeel. Geen saak kan so ‘n gewelddadige daad regverdig nie,” het die Franse premier, Francois Fillon, in ‘n verklaring gesê.

Die brand by die koerant se kantore in die ooste van Parys het om twee-uur die middag uitgebreek.

Volgens die polisie is die brand waarskynlik deur ‘n petrolbom begin.

Niemand is in die brand beseer nie.

Elfjarige seun by skool verkrag

‘n Elfjarige seun is na bewering om die beurt deur vier ander seuns by ‘n skool in Eldorado Park, ‘n hoofsaaklik bruin gebied suid van Johannesburg, verkrag, het die polisie Woensdag gesê.

Die seun ontvang berading van maatskaplike werkers terwyl ‘n saak van verkragting ondersoek word, het kapt. Phil Khorombi gesê.

Volgens hom het die verkragting Vrydagoggend op die skoolterrein plaasgevind.

“In hierdie stadium kan ons nie veel meer besonderhede oor die saak bekend maak nie,” het hy gesê.

Die Gautengse onderwysdepartement het ook sy eie ondersoek na die gebeure geloods, het Charles Phahlane, woordvoerder, gesê.

“Die gebeure het ons geskok en ons beskou dit in ‘n ernstige lig,” het hy gesê.

Phahlane het nie die naam van die skool bekend gemaak nie.

Aktiviste wil Israel se seeblokkade breek

‘n Groep Kanadese en internasionale aktiviste het vanuit Turkye gevaar en sal binne die volgende paar dae poog om deur die Israelse seeblokkade van Gasa te breek.

Luidens ‘n mediaverklaring deur die organisasie Canadian Boat to Gaza, is die Kanadese skip Tahrir en die Ierse skip Saoirse reeds in die Mediterreense See, buite Turkse gebiedswater.

Hulle sal binne die volgende paar dae na Gasa vaar.

“Die Tahrir vaar om medisyne af te lewer, maar ons hoofdoel is om Palestyne te bevry van die opelug-gevangenis bekend as Gasa,” het die Kanadese organiseerder van Boat to Gaza, David Heap, vanaf die Tahrir gesê.

Aktiviste van Australië, Amerika en Palestina is aan boord die skepe wat gelaai is met ‘n klein vrag hulpmiddels om die Palestynse volk in Gasa by te staan.

Dit is die tweede keer vanjaar dat dié organisasie ‘n poging aanwend om deur die Israelse seeblokkade te breek.

Shabangu slaan vure dood vir myne

Nasionalisering van die land se myne is nie die beleid van die regering of dié van die regerende party nie, het die minister van minerale hulpbronne, Susan Shabangu, Woensdag gesê.

“Ek is heeltemal bewus dat my eie herhaalde versekerings, asook verskeie verklarings deur die regering en ons president, nie die beleggers se besorgdheid in dié verband opgeklaar het nie,” het sy in ‘n toespraak wat voorberei is om by ‘n internasionale mynkonferensie in Londen gelewer te word, gesê.

“Dit maak nie saak hoe dikwels ons regering die voor die hand liggende – dat nasionalisering nie Suid-Afrikaanse regeringsbeleid of ANC-beleid is nie – stel nie, die omstredenheid en gewaande vrese wil net nie verdwyn nie.”

Shabangu se kommentaar oor nasionalisering volg op die ANC-Jeugliga se optog vir “ekonomiese vryheid” verlede week.

Die liga het nasionalisering van die land se meine geëis.

Shabangu het gesê haar party het nog nie afgewyk van die beleid van ‘n gemengde ekonomie wat hulle sedert 1994 volg nie.

“Hierdie stryd [oor die kwessie van nasionalisering] is al vir ‘n lang tyd daar en ek is seker dit sal voortduur – en dit behoort voort te duur, aangesien dit ‘n vereiste vir ‘n lewendige demokrasie is,” het sy gesê.

“Dit is egter die ANC wat aan die mag is en nie gedeeltes wat die breë kerk waaruit die ANC bstaan nie. Dit is dus ANC-beleid wat sal seëvier en niks anders nie.”

топкарго отзыв

‘n Nuwe Grensoorlog?

In ‘n hoofartikel vandag mor Beeld oor die ANC-regering se gebrek aan politieke wil om meer geld aan die Suid-Afrikaanse vloot te bewillig om Mosambiek se kuslyn, waar reuse gasreserwes ontdek is, te beveilig.

Soos dit ‘n DA-mondstuk betaam, is die taal in melodrama gehul: “Suid-Afrika staan voor ‘n nuwe ‘grensoorlog'”. Natuurlik weer eens nie dié keer aan sy eie kuslyn nie, maar in die Mosambiek-kanaal.

Die skielike inspirasie om Mosambiek te gaan red van wat ookal, kom waarskynlik deels van sekere Amerikaanse en Italiaanse oliemaatskappye wat nie lastig geval wil word deur Somaliese, of enige ander, buiters nie.

En soos die toeval dit nou wil hê, het die Britse premier, David Cameron, net gister presies dieselfde kopseer ontdek: Seerowery. Dié sameloop is ongetwyfeld toe te skryf daaraan dat Gemenebeslande oor akute telepatie beskik.

“Internasionale kenners, asook opperbevelhebbers van die Suid-Afrikaanse vloot, is dit eens dat Somaliese seerowery ‘n groeiende bedreiging vir Suider-Afrika word”, lui die roerende betoog in die grootste Afrikaanse dagblad.

Cameron, die nuwe Nelson, wil glo selfs sien dat Britse handelsvlote voortaan met wapens toegerus word.

Selfs al sou die Suid-Afrikaanse vloot hul hele mag ontplooi, gaan dit geen duit verskil aan die Somaliërs maak nie, aangesien ruim 30% in hul pogings omkom en daar nog vele aspirante is wat wag op ‘n geleentheid om met bloed te betaal vir ‘n deel van die aksie. ‘n Doodse vrees vir ‘n gewapende handels- of oorlogsvaartuig is dus geen afskrikmiddel nie.

Trouens, nie eens ‘n kernwapen aan boord gaan die magsbalans ter see verander nie en die koste daaraan verbonde moet ook vir lesers wat Wiskundige geletterdheid op skool gehad het, duidelik raak.

Dwelmhandelaars, die ander rede waarom Suid-Afrika ‘n vloot behoort te hê volgens Beeld, se voorliefde vir gunstige werksomstandighede vir hul werknemers is byna so groot soos seerowers s’n.

Gewapende handelsvlote gaan eerder internasionale vaarwaters in ‘n nagmerrie laat ontaard, want sulke skepe het uiteraard toestemming nodig van die kusgebied waarom hulle reis.

Die ANC is seker lugtig vir nog ‘n wapenskandaal waar Britte met miljarde in fooie wegstap vir nuwe vloottoerusting wat hulle aan Suid-Afrika gesmous het om ‘n “grensoorlog” te voer, ekskuus, seerowery te bekamp.

Het jy al verder as die sepie vanaand gedink?

Dit is nodig dat ons as volksgenote kennis neem van ons verantwoordelikhede, want dit wil my al hoe meer voorkom of dit nie besef word nie.

Dink so bietjie hieraan: Vir hoeveel mense is jy verantwoordelik?

Een antwoord wat almal gerieflikheidshalwe vergeet is: Jou ongebore nageslag.

Ek kan nie vir ander antwoord nie, maar ek het vyf eie kinders en nog een op pad, en ‘n aantal aangenome kinders ook, en ek gaan, indien dit vir my vergun word, seker nog sowat 6 kinders hê.

Gestel elkeen van my kinders kry weer net vyf kinders, dan het ek net een geslag later reeds 30 kleinkinders, en indien dieselfde gebeur met hulle sal ek 150 agterkleinkinders hê, en indien hulle elk ook net vyf kinders het sal ek 750 agter agterkleinkinders ryker wees.

Ek het dus jou (my volksgenoot) nodig om vir hierdie enorme nageslag van my vrouens en mans te voorsien om my eie bloed te laat voortleef. Ek is reeds baie lief vir hierdie toekomstige nakomelinge, daarom is ek nou maar lief vir julle ook omdat ek julle nie wil verloor om vir my nageslag te kan help uitbrei nie. (Ek is effe selfsugtig!) Hieruit kan mens sommer net so twintig geslagte tel en jy sal sien dat jy tans die enigste persoon is wie iets vir hulle kan doen en hulle kan miljoene beloop, jy is dus soos wat jy nou hier lees die verantwoordelike persoon van miljoene mense, en wat meer belangrik is, dit is jou eie bloed.

Jy is die enigste persoon wat ‘n verskil kan maak aan die hele nageslag wat na jou kom. Die feit dat jou voorouers besluit het om die klein bootjie op die grote oseaan aan te durf, ten spyte van die barbare en die leeus van Afrika om vir jou ‘n toekoms hier kom maak, wel hulle het dit gedoen ten bate van jou wat nou hier lees. En wat doen jy vir jou eie ongebore nageslag?

Gaan sit so rukkie stil, en dan vra jy jou lewensmaat dat hy/sy moet help om ‘n brief vir jul nageslag te skryf. Sit en dink wat jy werklik doen om vir hulle ‘n beter lewe te gee as wat jy geërf het van die vorige geslagte. Vat jou laaste twee weke en oudit dit en bepaal hoeveel tyd jy gespandeer het om te werk aan ‘n beter lewe vir hulle.

Skryf vir hulle van die wonderlike Sewendelaansepie waaraan julle so verknog is, en skryf vir hulle van die huidige modegiere en die modelle voertuie wat jy beplan, en skryf vir hulle van die vorige en die volgende vakansie wat julle opgewonde oor is.

En as jy jouself geoudit het en bevind het dat jy eintlik nie eens aan hulle gedink het nie, moet maar nie die tyd verder mors om vir hulle te skryf nie, want hulle gaan nie daar wees nie.

Ons het ‘n verpligting teenoor ons eie, die huidige nageslag is die vaders en moeders van ons gesamentlike nageslag. Dit is dus baie belangrik om jou mede-volksgenote atent te maak hierop, sodat hulle kan verstaan hoekom hulle betrokke moet raak by volksaksies.

Sien ek enige van julle by ‘n volgende Geloftefees? Sien ek enige van julle by ‘n volkssaamtrek, openbare vergadering of selfs ‘n beskeie finansiele bydrae aan enige van die hordes volksinstellings gee wat probeer om namens jou iets te doen?

Nog ‘n mesaanval

‘n 22-jarige meisie is gister omstreeks 11:00 in haar ouerhuis in Noordheuwel, Krugersdorp oorval en deur twee jong aanvallers met messe toegetakel. Sy het dapper teruggeveg en kon daarin slaag om ‘n SOS.-boodskap na haar ma te stuur, waarna die aanvallers gevlug het. Sy het in die proses meer as agt steekwonde en kneusings opgedoen waarna sy in die hospitaal opgeneem is.

Die voorval wat reg oorkant die huis van die Gautengse Premier, Nomvula Mokonyane, plaasgevind het, is die nuutste van ‘n hele reeks aanvalle die afgelope tyd in die straat en omgewing. Die identiteit van die slagoffer en haar gesin word op hul versoek op dié stadium van die media weerhou vir veiligheidsredes. Mnr Jaco Mulder, VF Plus-LPW, vriend en woordvoerder van die gesin het gesê dat hy as inwoner van dieselfde omgewing in Noordheuwel, Krugersdorp nie meer veilig in sy omgewing voel nie.

Die omgewing gaan vir ‘n geruime tyd reeds gebuk onder ernstige huisaanvalle ten spyte van ‘n aktiewe polisiesektor en patrolliestelsel. Mulder wat ook ‘n lid van die portefeuljekomitee vir Veiligheid in die Gauteng Wetgewer is, het voorts gesê dat alhoewel die polisie flink reageer het, misdadigers die wetstoepassingsagentskappe van Suid-Afrika nie meer vrees nie.

Misdadigers beweeg vry rond in woonbuurte en beskik oor fyn uitgewerkte intelligensie en inligting oor die wandel en weë van geïdentifiseerde slagoffers. Die SAPD en buurt-beveiligingsinisiatiewe skiet ver te kort op dié terrein.