Wat my by die paragraaf in my rubriek bring wat jou so ontstig het. Hierdie mening oor die HNP is glad nie my eie nie en is beslis nie bedoel om so verstaan te word nie. Ek het dit aangebied as die heer Du Preez se sieninge en ek sal baie verbaas wees as dit nié sy mening is nie. Ek het die vryheid geneem om die saak uit sy oë te probeer sien, met ander woorde ‘n aanpassing van die gesigspunt waaruit ek skryf. Ek is seker jy sal met my saamstem dat Max wél die rol van die HNP minag, net soos wat hy die Afrikaner in die geheel verpes.
Om ‘n persoon wat in ‘n storie behandel word se gedagtes aangaande ‘n bepaalde saak vanuit sy eie gesigspunt te probeer uitdruk, kan in die hande van ‘n meester wonderlik doeltreffend wees. Wanneer ek my aanmatig om dié tegniek te gebruik, nou ja, ek vra om verskoning vir enige onnadenkendheid en letterkundige lompheid wat vir jou soveel onnodige ergernis veroorsaak het.
Enige misverstand is my uitsluitlike skuld.
Ek vertrou jy aanvaar my verduideliking en my verskoning en ook my hoop dat julle by die HNP sal voortbeur in die tuig, ongeag die teenstand wat ons saam as Afrikaners ervaar.
Leave a Reply
You must be logged in to post a comment.