praag.co.za

Mantashe sê aanvalle is teen ANC, nie net Zuma nie

Written by

praag

in

,

Die sekretaris-generaal van die ANC, Gwede Mantashe, sê die onlangse aanvalle teen president Jacob Zuma is geloods as ‘n aanval op die party, eerder as teen net die president alleen.

Hy het by die opening van ‘n beraad in die Noord-Kaap in Kimberley, gesê diegene wat Zuma se kop eis, soek ‘n sondebok ten einde die ANC te verswak.

Hy sê die ANC sal steeds met alle belanghebbendes in die komende dae ontmoet, insluitend met die Ahmed Kathrada-stigting, om die onlangse uitspraak van die Grondwethof teen Zuma te verduidelik.

Mantashe sê die groep burgerlike organisasies wat Woensdag hul teenkanting teen Zuma geopper het, is meestal ontevrede voormalige lede van die party wat uit desperaatheid handel.

‘n Groep van sowat 240 burgerlike organisasies – genaamd Verenig teen Korrupsie – sal aanstaande Saterdag sy veldtog teen Zuma amptelik loods.

Die groep bestaan uit kerke, burgerlike groepe, vakbonde, en akademici.

Hulle het Woensdag op die trappe van die Grondwethof in Johannesburg ‘n veldtog van stapel gestuur wat daarop gemik is om Zuma se bedanking af te dwing deur politieke druk.

Die veldtog se eerste optrede is aanstaande Saterdag. Suid-Afrikaners is gevra om in dorpe, kerke, moskees, townships, woongebiede, sportklubs en kultuurorganisies saam te trek en toekomstige optrede te bespreek.

Die hoofgeleentheid sal by die Regina Mundi-kerk in Soweto plaasvind.

Die PAC het intussen ‘n oproep om eenheid gedoen en swartes vermaan om hulle nie te verheug oor kritiek teen die ANC nie.

Die leier van ‘n faksie van die PAC, Letlapa Mphahlele sê die oproepe om die president af te dank kom neer op ‘n bewindsverandering.

Mantashe het ontken dat sy bywoning en dié van die party se nasionale voorsitter, Baleka Mbete in die Noord-Kaap magsvertoon is.

Hy het aan OFM-nuus gesê dat lede van die party se nasionale uitvoerende komitte (NUK) provinsiale berade in vyf provinsies bygewoon het.

Mantashe sê alhoewel hy baie klem gelê het op die uitwissing van faksies binne die ANC, is dit nie ‘n probleem in die Noord-Kaap nie.

Die ANC in die provinsie het egter maande ná die bedanking van sy provinsiale leier, John Block, nog nie ‘n aankondiging oor wie die top posisie in die provinsie sal beklee nie.

Mantashe sê daar is egter geen probleme nie.

Comments

7 responses to “Mantashe sê aanvalle is teen ANC, nie net Zuma nie”

  1. Rooikop Avatar
    Rooikop

    “Die leier van ‘n faksie van die PAC, Letlapa Mphahlele sê die oproepe om die president af te dank kom neer op ‘n bewindsverandering.” – dit is dan presies hoe Zuma aanbewind gekom het! Hy het vir Mbeki uit die kussings gelig en homself ‘n kans gegee om hom dik te steel – nou het die spreekwoordelike hoenders huis toe gekom en nou is die oproepe om hom te pos eerder ‘n aanval teen die party? Is die mense se geheue so kort?
    Dit is wragtig ‘n klomp onnosel politici wat ons in die land het.

    1. ThysH Avatar
      ThysH

      Die veldtog teen Mbeki het binne die ANC begin en vinnig uitgekring – maar slegs BINNE die ANC. Dit was nie ‘n aksie buite die ANC in ‘n klomp opposisiepartye soos hierdie huidige aksies teen Zuma is nie. En die probleem is dat daar op die oomblik niemand BINNE die ANC is wat sterk genoeg is om Zuma aan te vat nie.

      Terloops, die aksie teen Mbeki was in wese eerder ‘n anti-Xhosa aanslag. Die Zoeloes – en die ander groepe BINNE die ANC – was toe net mooi dik vir die Xhosa-oorheersing en die aanstelling van Xhosas in al die top poste in die staatsbestel. Sekere van die anti-regeringsaksies wat ons tans sien – soos die in Limpopo is weer eintlik ‘n anti-Zoeloe aksie wat sterk deur die EFF uitgebuit word.

      1. Rooikop Avatar
        Rooikop

        Ek vergeet soms dat daar faksies ook binne die ANC is. Die huidige aanslag is van buite en Zuma het homself omring in die ANC met ja-broers wat hom ondersteun.

  2. Riempies Avatar
    Riempies

    “Die sekretaris-generaal van die ANC, Gwede Mantashe, sê die
    onlangse aanvalle teen president Jacob Zuma is geloods as ‘n aanval op die
    party, eerder as teen net die president alleen.”

    Nou hoe moet mens Gwede Mantashe se woore interpeteer – sê hy
    nou die hele ANC het wederegtiglik staatsgeld vir hulleself gebruik?

  3. Anton Schutte Avatar
    Anton Schutte

    maar natuurlik is die aanval op die cANCer! Met goeie rede! Julle klomp diewe het die kans om Suid Afrika te red weggegooi met julle stem teen “nambah whan” se vervolging. Dis natuurlik sodat julle varkies n bietjie langer by die voekrip kan smul. Kry vir jou gwede, ek hoop jy verstik…..

  4. Cousin Vinnie Avatar
    Cousin Vinnie

    Nou hoe lank gaan ons wag vir die belasting weerhouding? So wag ons vir mekaar! Ek het n jaar gelede my ouditeur gebel daaroor en hy reken toe ” ek wag vir word in n hondehok”

  5. ThysH Avatar
    ThysH

    Ek sien die SA Council; of Churches het geeis dat Zuma bedank of afgedank word. Hel, as hierdie spul nie van hom hou nie, sal hulle sommer maak dat ek van hom hou! Hierdie mense was nog nooit aan die regte kant van enigiets nie! terloops, is die NGK deesdeae lid van hierdie SACR?

Leave a Reply

More posts