Ten minste drie mense is dood en 17 beseer as ‘n gevolg van ‘n brug oor een van Johannesburg se besigste snelweë wat in duie gestort het.
Duisende motoriste is in verkeersknope van kilometers lank opgehou deur die ineenstorting.
“Ons is baie bekommerd oor die beseerdes. Dit is ‘n baie besige snelweg en dit was ‘n aktiewe konstruksie-terrein,” het ‘n woordvoerder van Murray & Roberts gesê.
Ed Jardim het gesê hy is nie bewus op hierdie stadium van enige konstruksiewerkers wat beseer is nie.
Murray & Roberts het bevestig dat ‘n ondersteuningstruktuur wat opgerig is om ‘n voetgangerbrug oor die M1 te bou, in duie gestort het.
Verdere inligting sal vrygestel word wanneer sulke inligting beskikbaar is, het die maatskappy gesê.
Die maatskappy is verantwoordelik vir die bou van die tydelike brug wat die lokasie Alexandra aan die welvarende Sandton sal verbind.
Die brug is ontwerp as ‘n voetganger en fietsrybrug.
Die projek kos R130 miljoen en word beskou as ‘n vinniger en veiliger roete vir die beraamde 10.000 voetgangers wat daagliks tussen die twee gebiede beweeg.
Dit sou teen Oktober 2016 voltooi word.
Intussen het M&R se aandeelprys drasties gedaal.
Motoriste is gevra om die M1-hoofweg naby Grayston-rylaan in Sandton te vermy omdat die pad steeds gesluit is vir verkeer terwyl opruimingswerk voortduur.
Die Johannesburgse metropolisie is ontplooi en herlei tans verkeer tussen Johannesburg en Pretoria na die Grayston-afrit.
Ek is dankbaar ek is nie die ingenieur wat daardie brug ontwerp het nie – ek het op ‘n ander webwerf fotos gesien van die konstruksie. Ek is nie ‘n siviele ingenieur nie maar my leke oog kon sien dat daardie konstruksie nie voldoende is nie – dalk is ek verkeerd. Die pilare van die tydelike brug het nie gelyk of hulle enige dinamiese/skoklaste of ook enige sywaartse laste kan dra nie. Ek sou reken dat so ‘n konstruksie ten minste ‘n botsing van ‘n voertuig teen ‘n pilaar moet kan weerstaan (Die walle is nie voldoende om dit te keer nie soos die vragmotor so ‘n paar jaar gelede teen die hyskryn by Atterbury afrit bewys het).
Ek praat nou hier van die kantlyn af maar hierdie onderstreep vir my ‘n baie groot ding. Mense DINK nie oor waarmee hulle besig is nie. Hulle besef nie daar is menselewens by betrokke nie. 50% is mos goed genoeg – selfs nog minder – DIT is wat ons kinders van kleins af geleer word.