Dr. Rob Davies, minister van handel en nywerheid, het Dinsdag gesê uitleners moet strenger bekostigbaarheidstoetse doen as antwoord op besware teen die verwydering van negatiewe kredietinligting.
Die minister sê hy verstaan die vrees dat die kredietinligtingsamnestie die risiko en koste van krediet kan verhoog, maar sê die regering is vasbeslote om daarmee deur te druk.
Dit sal meebring dat 1,6 miljoen verbruikers op die “swartlys” weer ’n “skoon” kredietgeskiedenis kry.
“Ons kan nie op die draad sit nie. Daar is ’n sterk begeerte hierna,” het Davies in Kaapstad aan verslaggewers gesê.
Teenstanders in die bedryf meen die amnestie sal daartoe lei dat mense wat reeds nie hul skuld kan betaal nie, nóg skuld aangaan.
“Ek dink ons het ’n antwoord daarop en ons moet ons antwoord ’n bietjie verfyn,” sê Davies. “Ons moet spesifieke riglyne en raamwerke ontwikkel, maar ons ignoreer niemand nie.” Dis ’n verwysing na bekostigbaarheidskriteria wat na verwagting deur die Nasionale Kredietreguleerder opgestel gaan word.
Die kabinet het die wetgewing oor die kredietinligtingsamnestie in September goedgekeur.
Verbruikers op ’n swartlys wat wél hul skuld afbetaal het, sal ’n skoon kredietstatus kry aangesien hul status hulle verhinder om lenings, behuising en selfs werk te kry.
Davies sê meer as twee-derdes van die voorleggings wat in die maand lange konsultasietydperk ingedien is, was positief.
Die Bankvereniging van Suid-Afrika en die kredietgraderingsagentskap Moody’s sê egter die feit dat banke minder inligting oor verbruikers se betalingsgeskiedenis tot hul beskikking gaan hê, skep ’n hoër risiko.
Davies sê die departement vergader volgende week met die kredietburovereniging oor bekostigbaarheidskriteria.
Hy sê die aantal loonbeslagorders van mynwerkers by Marikana – waar sommige werkers tot 80% van hul salaris nie eens sien nie – wys op die mate van onverantwoordelike praktyke in die bedryf.
“Wat met ’n loonbeslagorder gebeur, is dat jy (die uitleners) geen risiko neem nie. Jy hoef nie ’n (kredietwaardigheids-)bepaling te doen nie, want hulle werk vir iemand en jou geld is veilig.”
Davies sê voortaan sal werkgewers ook nie werkaansoekers se kredietverslae mag aanvra nie, tensy hulle met geld gaan werk.
Ander stappe wat verbruikers kan help, is dat regsaksie gestaak moet word as hulle skuldbemiddeling aanvra.
In antwoord op ’n vraag het Davies gesê hy verwerp “met minagting” enige suggestie dat die kredietinligtingsamnestie ’n verkiesingsfoefie is. – Sapa
Ek sê mos al vir ‘n ruk dat die ANC doelbewus besig is om die ekonomie ten gronde te bestuur.
Die volgende wat gaan gebeur is dat banke en ander leners geforseer gaan word om lenings aan onbevoegtes toe te staan.
As ‘n werknemer mag jy nou ook nie uitvind of jou potensiële werknemer op die swartlys is nie? Die werknemer se gedrag gee mos vir jou ‘n aanduiding van die betroubaarheid van so ‘n persoon – as hy/sy nie kredietwaardig is nie dui dit op ‘n onverskillige lewenswyse – hoe kan ek dan so ‘n persoon aanstel?
Weereens die ANC wat die individue probeer paai sonder om aan die gevolge vir die samelwing in geheel te dink.
Die loonbeslagbevele betref – ‘n nagmerrie vir die kleinsake-onderneming.
Neem nou so ‘n persoon indiens en die prokureur vind uit hy werk nou by my en siedaar, die bevel word net verskuif.
Wat Davis nie besef nie is dat banke inligting hou van skuld buite-om die burro’s. Telkom bv. se bestek skuldenaars se name word aan die banke gegee.
Wat van munisipaliteite wie roekeloos nalaat om dienste-gelde te in en dan die las bloot oor te dra na ander eindgebruikers?
So kan mens aangaan met die name van openbare diensverskaffers.
Hierdie oplossing van Davis gaan werk. Dit los een probleem op net om nog tien ander te skep. So dit werk!
“spesifieke riglyne en raamwerke”, klink soos “wigte en teenwigte”.
HKGK – nou gaan daar NOG MEER skuld gegee word vir mense met ‘n vrot kredietrekord sonder dat die instansie dit besef
Wie wil vir ‘n spin gaan in my nuwe Mercedes-Benz? Ek wag net vir die amnestie om dit moontlik te maak.
Wat het van die nuwe FICA krediet wet geword waarby “geakkrediteerde finansiële dienste verskaffers” ‘n totale krediet portefeulje moes opstel van elke krediet-aansoeker, wat moes bewys lewer dat hy/sy nie meer as ‘n sekere persentasie van sy maandelikse inkomste aan krediet-premies oorskry nie? Hoe is 80% loonbeslagorders onder hierdie omstandighede wetlik deurgevoer?
Wat vir ‘n stelling is “daar is ‘n sterk begeerte hierna”?! Ek is seker die klomp verkragters in die tronk het ook sterk begeertes, wat hulle juis in die eerste plek in die tronk laat beland het en moet verseker dat hulle daar bly!
Dit is duidelik dat die ANC glad nie tevrede is met hoe “sterk” die rand tans is nie. Hulle mik vir R20 teen die dollar. Elke vorm van amnestie deur die ANC uitgedink & toegepas, het in die verlede ook sleg ge-eindig!