Nuus Archives - Page 731 of 1583

Palestyne gaan Jode in 2020 verbysteek

Die Palestynse Statistiekburo het beraam dat die Arabiere die Jode in die Heilige Land teen die einde van die dekade sal verbysteek, ‘n scenario wat ernstige gevolge kan hê vir Israel.

Die buro het Dinsdag gesê dat 5,8 miljoen Arabiere in Israel, die Wesoewer, Gasa en Oos-Jerusalem woon. Dit is in vergelyking met ongeveer 6 miljoen Israeliese Jode, volgens Israeliese data.

Daar word gemeen dat, gebaseer op huidige geboortekoerse, die twee bevolkings teen 2016 ewe veel sal wees, en in 2020, sal die Arabiere die Jode verbysteek met 7,2 miljoen teenoor 6,9 miljoen.

Die demografiese probleem is ‘n belangrike argument vir die Israeliese ondersteuners wat die skepping van ‘n Palestynse staat voorstaan. Hulle sê om beheer van die Palestynse gebiede aan sy inwoners af te staan, is die enigste manier om Israel se toekoms as ‘n demokrasie met ‘n Joodse meerderheid te verseker.

Vlamme verteer 4000 se plakkershutte in Kaapstad

Drie mans is dood en meer as 4 000 mense is dakloos gelaat nadat brande huise in Dunoon en Khayelitsha op Nuwejaarsdag verswelg het.

Die BM-afdeling van Khayelitsha is die hardste getref, met meer as 800 plakkershutte wat deur die vinnige vlamme vernietig is. Sowat 3 000 inwoners is dakloos gelaat.

Die Stad se Rampbestuurwoordvoerder Wilfred Solomons-Johannes sê die vuur in die BM-afdeling van die gebied het om 04:45 uitgebreek en is slegs suksesvol geblus byna ses uur later.

Hy het bygevoeg dat die rukkerige wind, van 80 tot 90km / h , die verspreiding van die vlamme aangevuur het, en ‘n uitdaging vir brandbestryders gstel het.

Digte rook het verkeersowerhede genoop om die N2 te sluit in beide rigtings.

“Die digte rook raak die vrye vloei van verkeer, en hou ‘n gevaar vir die veiligheid van motoriste in,” het Solomons-Johannes gesê.

Фильчаков

Gaan VSA oor fiskale afgrond stort?

Die Withuis en Senaatslui het Maandag ‘n ooreenkoms bereik om belastingsverhogings en besuinigingsmaatreëls van die sogenaamde “fiskale afgrond” af te weer – maar die ooreenkoms kan nog in die Huis van Verteenwoordigers tot onmin lei.

Senators sou oornag stem oor die ooreenkoms, wat volgens senator Joe Lieberman sterk steun onder die Demokrate geniet.

Die ooreenkoms is te laat bereik vir die sperdatum van 1 Januarie, maar met die vakansiedag Dinsdag kan die kongres steeds die voorstel goedkeur en terugdateer om te voorkom dat die skerp belastingstygings in werking tree.

Die voorstel moet egter staan in die Huis van Verteenwoordigers, waar baie van die Republikeine wat die huis beheer voel pres. Barack Obama doen nie genoeg om regeringsbesteding te besnoei nie.

Die Huis sal Dinsdagmiddag vergader.

“Die Huis sal by sy belofte hou om die Senaat se ooreenkoms te oorweeg as dit goedgekeur word. Die besluit of die Huis die ooreenkoms sonder meer sal aanvaar of dadelik sal wil aanpas, sal nie gemaak word tot lede van die Huis… in staat was om die wetgewing te hersien nie,” het John Boehner, Speaker van die Huis, gesê.

Nuwejaar eis talle in stormlope

Die stad van Kaapstad het mense gewaarsku dat hy streng sal optree teen mense wat aan hulle aan misdrywe skuldig maak met vanjaar se Tweede Nuwejaar-vieringe en die Klopse-karnaval, wat in die stad plaasvind.

Die stadsraad het meer as R3 miljoen vir die feesvieringe bewillig, waaraan meer as 13 000 mense en 70 Klopse groepe sal deelneem. Verskeie paaie in die middestad is vir verkeer gesluit, en duisende toeskouers sal na verwagting die verrigtinge bywoon.

Die optog begin op die hoek van Keizersgracht en Tennantstraat en eindig in Rosestraat in die Bo-Kaap.

Tien mense, onder wie vier kinders, is intussen dood en 120 beseer in ‘n stormloop Oujaarsdagaand gedurende ‘n kerkdiens in die Angolese hoofstad, Luanda.

Volgens owerhede is die slagoffers deur ‘n skare mense vertrap nadat slegs twee van die hekke na die Cidadela Desportiva-stadion oopgemaak is.

Sowat 70 000 mense is vir die diens van die Universal Church of the Kingdom of God verwag, maar heelwat meer het opgedaag. Volgens nooddienste het van die slagoffers versmoor.

Die Ivoorkus sal drie dae lank rou nadat ‘n stormloop tydens nuwejaarsvieringe minstens 60 mense se lewens geëis het.

Tientalle ander is beseer toe ‘n groep mense bymekaar gekom het om vuurwerkvertonings in die hoofstad, Abidjan, te geniet.

‘n Fotograaf vir AFP sê talle kinders is in die voorval beseer. Die verslaggewer sê die stormloop het by die stad se stadion plaasgevind.

Volgens amptenare het sowat 50 000 mense saamgedrom om na die vuurwerkvertoning te kyk.

‘Groter eenheid binne ANC’

Ná ‘n 100 jaar se bestaan is daar ‘n groter eenheid binne die ANC en die party sien uit na die nuwe jaar, het partyleiers in Noordwes Maandag gesê.

“Ons roep die eeufeesjaar van die ANC vaarwel, sonder enige twyfel dat ons beweging oor groter eenheid, meer krag en kohesie beskik,” het Kenny Morolong, ‘n woordvoerder, gesê.

Een van die provinsie se groot prestasies was die verkiesing van vyf van sy lede in die regerende party se nasionale uitvoerende komitee gedurende die verkiesingskongres in Mangaung.

“Hierdie verteenwoordiging is ongeëwenaar. Ons is trots daarop dat diegene wat gekies is, die ANC op alle vlakke gedien het…”

Morolong het gesê die party is ook beïndruk deur die Marikana-kommissie se ondersoek na die dood van 44 mense by ‘n Lonmin-myn in Marikana in die Noordwes.

Die party het oudpres. Nelson Mandela ook ‘n spoedige herstel toegewens by sy huis in Houghton, Johannesburg, ná hy vroeër in ‘n hospitaal in Pretoria opgeneem is.

Duitse tydskrif kondig Bush se afsterwe aan

Die gerspekteerde Duitse weeklikse nuustydskrif Der Spiegel het per ongeluk ‘n doodsberig van oudpres. George H.W. Bush gepubliseer.

Die onvoltooide berig het Sondag vir enkele minute op die publikasie se webtuiste verskyn voordat dit verwyder is.

Die tydskrif se New York-korrespondent, Marc Pitzke, het die oudpresident as ‘n “kleurlose politikus” beskryf, wie se beeld slegs verbeter het toe dit later met sy seun, George W. Bush, se presidensie vergelyk is.

Bush sr. (88) is op 23 November vir ‘n brongitisverwante hoes in die hospitaal opgeneem. Hy is ‘n maand later na die intensiewesorgeenheid geskuif nadat hy koorsig geraak het.

‘n Familiewoordvoerder sê die oudpresident is die naweek na ‘n gewone hospitaalkamer geskuif nadat sy toestand verbeter het.

Verkeersboetes? Watwou!

Slegs ‘n klein aantal Suid-Afrikaners betaal hulle verkeersboetes, luidens berigte Sondag.

Die jaarlikse verslag van die Padverkeersoortredingsagentskap (RTIA) het getoon dat motoriste R1,6 miljard skuld in uitstaande verkeersboetes wat in die Tshwane en Johannesburgse munisipaliteite uitgereik is, het City Press berig.

Volgens die verslag het motoriste in Tshwane en Johannesburg tussen April 2011 en Maart 2012 R980 miljoen se boetes ontvang, maar slegs R86 miljoen se boetes (nege persent van die totale waarde) is betaal.

Tshwane en Johannesburg is die enigste metro munisipaliteite wat deelgeneem het aan die Wet op die Administratiewe Beregtiging van Verkeersoortredings (Aarto) se proeffase.

Uit die 1,8 miljoen boetes wat in die afgelope finansiële jaar in die Johannesburg en Tshwane munisipaliteite uitgereik is, is slegs 251 125 (14%) betaal.

Zuma: SA gaan vooruit

Pres. Zuma het Suid-Afrikaners Maandag ‘n voorspoedige nuwe jaar toegewens, en gesê die land sal sy doelstellings bereik as die hele bevolking saamwerk om ‘n veilige samelewing te skep.

“Ons het in 2012 baie vooruitgang gemaak soos ons voortgegaan het met ons poging om ‘n verenigde, nierassige, nie-seksistiese, demokratiese en voorspoedige Suid-Afrika te bou,” het hy in ‘n verklaring wat deur die presidensie uitgereik is, gesê.

“Soos ons voortbeweeg na daardie mylpaal, moet ons vinniger werk om sosio-ekonomiese vryheid te verkry,” het hy bygevoeg.

Die president het na die 2011 Sensus verwys, en gesê die data dui daarop dat die regering besig is om vooruitgang te maak in gebiede soos basiese dienste en onderwys.

“Terselfdertyd dui die Sensus ook op ‘n groot inkomstegaping. Dit het byvoorbeeld gewys die inkomste van ‘n wit huishouding is ses keer dié van ‘n swart huishouding.”

Hy het ook na die geweld by Marikana verwys, en gesê probleme moet vreedsaam opgelos word.

“Ons moet ‘n samelewing skep waarin vroue en kinders vry en veilig voel, met geen vrees van mishandeling, verkragting of enige vorm van geweld nie, en ‘n samelewing waarin diere, veral die renoster, veilig is van ongenaakbare stropers. Dis moontlik om daardie samelewing te skep deur hard saam te werk.

“Ek wens alle Suid-Afrikaners en buitelanders wat in ons land bly, of wat ons besoek om ons wonderlike somer te geniet, ‘n vreugdevolle en veilige feesseisoen en voorspoedige nuwe jaar toe.”

Vooroordele teen Zuma verhoed begrip

Diegene met vooroordele teenoor pres. Jacob Zuma verhinder die land om sy opmerking dat troeteldiere deel is van die ‘wit kultuur’, te verstaan, het die ANC se hoofsweep Vrydag gesê.

“Slegs die mense wat bevooroordeeld en vyandig is wil hê dat ons moet glo dat die president sy vakansie onderbreek het om die gemeenskap oor honde toe te spreek,” het die ANC se hoofsweep, Mathole Motshekga, in ‘n verklaring gesê.

Mothapo het gesê diegene “wat diepliggende anti-Zuma vooroordele het” sluit mense in die media en sekere politieke kommentators in.

Die Star het Donderdag berig dat Zuma, in ‘n toespraak wat hy by Impendle in KwaZulu-Natal gelewer het, gesê het dat om geld te spandeer deur ‘n hond te koop en die hond dan na die veearts te neem en met die dier te gaan stap, alles deel is van die ‘wit kultuur’.

Die presidensie het later ‘n verklaring uitgereik om te verduidelik dat Zuma se doelwit was om “Afrikane se gedagtes te dekoloniseer” met sy toespraak.

Muldersdrif-aanvalle: Verdagtes vas

Vyf verdagtes wat glo verbind word met gewelddadige aanvalle in Muldersdrift, is Woensdag in hegtenis geneem, berig Eyewitness News.

Die vyf swartes is aangekeer nadat ‘n gesin verlede week tydens ‘n rooftog met vuurwapens aangehou is.

Die arrestasies word beskryf as ‘n groot deurbraak in die stryd teen gewelddadige aanvalle in die gebied, waarmee inwoners te kampe gehad het.

Die polisie in Gauteng glo die vyf mans wat in hegtenis geneem is, is deel van ‘n sindikaat wat verantwoordelik is vir die onlangse gewelddadige huisbrake en rooftogte in Muldersdrift.

Die mans is vasgetrek nadat ‘n kredietkaart wat tydens ‘n gewapende rooftog gesteel is, die polisie na Diepsloot gelei het.

Supt. Lungelo Dlamini het gesê die polisie het ook beslag gelê op ander items wat vermoedelik in die aanvalle gesteel is.

Hy het gesê ‘n voertuig is ook in die mans se besit gevind.

Die verdagtes verskyn Donderdag in die Krugersdorp-landdroshof.