Kategorie: Nuus

Denel naarstiglik op soek na breinkrag

Die Suid-Afrikaanse wapenvervaardiger Denel probeer sy bes om belowende studente en gegradueerdes te lok om ‘n loopbaan in die verdediging- of veiligheidsektor te oorweeg, het dié maatskappy se hoof van menslike hulpbronne gesê.

“Ons wil ‘n dinamiese omgewing skep waar die beste en slimste studente kies om loopbane in verdediging en veiligheidsverwante sektore soos lugvaart, ruimtevaart, en hoë-tegnologie-vervaardiging na te jaag,” het Natasha Davies, waarnemende hoof vir menslike hulpbronne en transformasie by Denel, gesê.

Davies het gesê tegmologie wat deur die maatskappy ontwikkel word, word toenemend gebruik om probleme soos renosterstropery, dwelmhandel en grensbeheer die hoof te bied. Navorsing oor alternatiewe bronne van energie trek ook baie aandag.

Met “geweldige mededinging” vir ingenieurs- en tegniese studente, lê dié maatskappy die klem op loopbane in nuwe tegniese gebiede, sowel as navorsing en ontwikkeling.

Die maatskappy het in die laaste finansiële jaar R752 miljoen bestee op navorsing en ontwikkeling.

“Die uitdaging is om vaardighede en kennis in ons bestaande arbeidsmag te behou, en om dit aan te vul met die entoesiasme en energie van jong ingenieurs wat die maatskappy binnekom,” het sy gesê.

SA werkloosheid klim kwaai

Die getal werklose Suid-Afrikaners het in die vierde kwartaal van 2012 met 100 000 mense gestyg tot 4,6 miljoen, het Statistiek Suid-Afrika Maandag verklaar.

Statistiek Suid-Afrika het sy kwartaallikse arbeidsmagopname bekend gemaak. Die land se amptelike werkloosheidsyfer staan tans op 25,2%, wat met 24,9% in die vierde kwartaal van 2012 vergelyk.

Statistiek Suid-Afrika se amptelike definisie van werkloosheid is “iemand tussen die ouderdom van 15 en 64 jaar oud wat in die week voor die opname sonder werk was, maar werk soek en beskikbaar is om te werk of om ‘n onderneming te vestig”.

As mense wat opgehou het om werk te soek, ingesluit word, staan die syfer op 36,7% in die eerste kwartaal van die jaar – die hoogste sedert 2008.

Staatsveiligheid tjoepstil oor Guptas

Die departement van Staatsveiligheid bewaar die stilswye oor sy rol in die omstrede voorval waarin ‘n private vliegtuig van die invloedryke Gupta-familie verlede week op die Waterkloof Lugmagbasis geland het.

Die departement het bevestig dat sy direkteur-generaal deel is van die taakspan wat die omstandighede rakende die ongemagtigde landing van die vliegtuig op ‘n nasionale sleutelpunt ondersoek.

Die woordvoerder van die departement van Staatsveiligheid het geweier om te sê of die departement voor Dinsdag van die beplande landing bewus was.

Intussen sê die Tshwane Metropolisie hy is verbaas om te hoor dat nege van sy beamptes na bewering deel uitgemaak het van ‘n sekerheidskontingent wat die bruilofsgaste van die Guptas na Sun City begelei het.

Sommige van die beamptes onder verdenking het blykbaar dieselfde dag siekteverlof geneem. Hulle word daarvan beskuldig dat hulle privaat voertuie gebruik het en dit onwettig met blou polisieligte, sirenes en vals nommerplate toegerus het.

Jeug steun busstakers

Suid-Afrika se jeug steun stakings deur bus-, taxi- en treinbestuurders, het ‘n nuwe meningspeiling getoon.

Minstens 75% meen dis reg as busbestuurders staak, 68% voel dieselfde oor treindrywers en 63% ondersteun taxi-bestuurders se reg om te staak.

Pondering Panda se selfoonopname van 2 146 mense tussen die ouderdom van 18 en 34 het dié menings gewys.

Volgens die uitslae steun jong swartes en bruines die stakings veral; met bykans 79% swartes en 77% bruines wat voel busbestuurders het die reg om te staak.

Slegs 64% Indiërs en 40% wittes het so gevoel.

Wittes was die enigste rasgroep wat meer geneig is om te dink dat stakings deur besbestuurders onwettig moet wees. Minstens 46% van hulle het so gevoel.

Shirley Wakefield, woordvoerder van Pondering Panda, sê jong mense het die stakings “oorweldigend” steun.

“Hierdie getalle wys dat jong Suid-Afrikaners ‘n mate van solidariteit en simpatie met die stakende bestuurders deel.”

Sy sê dis vreemd dat die jeug só voel, aangesien baie jong mense elke dag openbare vervoer gebruik.

Siriese rebelle gebruik Saringas, sê VN

Die VN se menseregte-ondersoekbeamptes het getuienis van slagoffers van Sirië se burgeroorlog en mediese personeel wat aandui dat rebellemagte die gifgas Sarin gebruik het, is Sondag berig.

Die Verenigde Nasies se onafhanklike kommissie van ondersoek oor Sirië het nog nie bewyse van regeringsmagte gesien wat chemiese wapens gebruik nie, wat onder die internasionale reg verbied word, het Carla Del Ponte gesê.

“Ons ondersoekbeamptes was in buurlande waar slagoffers, dokters en veldhospitale besoek is, en volgens die verslag van verlede week wat ek gesien het, is daar baie sterk vermoedens, maar nog nie onweerlegbare bewys nie, van die gebruik van Saringas,” het Del Ponte gesê in ‘n onderhoud met die Switserse-Italiaanse televisie.

“Dit is gebruik deur die opposisie, die rebelle, nie deur die regering nie,” het sy bygevoeg, in Italiaans.

Del Ponte, ‘n voormalige Switserse prokureur-generaal wat ook gedien het as aanklaer van die Internasionale Strafhof vir die voormalige Jugoslavië, het geen besonderhede oor wanneer of waar Sarin gebruik is nie.

Die Geneva-ondersoek na oorlogsmisdade en ander menseregteskendings is apart van ‘n ondersoek na die beweerde gebruik van chemiese wapens in Sirië deur die VN se sekretaris-generaal, Ban Ki-moon, wat sedertdien tot stilstand gekom het.

President Bashar al-Assad se regering en die rebelle beskuldig mekaar van drie chemiese wapenaanvalle, een naby Aleppo en ‘n ander naby Damaskus, beide in Maart, en ‘n ander in Homs in Desember.

President Barack Obama het verlede jaar verklaar dat die gebruik of aanwending van chemiese wapens deur Assad ‘n “rooi lyn” sal oorsteek.

Bomaanval op Tanzaniese kerk waar pouslike gesant is

‘n Vrou is dood en 44 mense is ernstig beseer toe ‘n bom ontplof het in ‘n Rooms-Katolieke kerk in die noorde van Tanzanië, het ‘n Tanzaniese polisiebeampte Sondag gesê.

Die vrou is in die hospitaal oorlede as gevolg van die aanval op die Arusha-kerk net voor die diens, wat deur die pous se gesant na Tanzanië bygewoon is, het gesê Magesa Mulogo, het die plaaslike polisiekommissaris van Arusha gesê.

Mulogo het gesê ooggetuies het gesien hoe die bom van ‘n motorfiets in die kerk gegooi word. Mulogo het gesê die bestuurder van die motorfiets is in hegtenis geneem.

Die Vatikaan se ambassadeur in Tanzanië, aartsbiskop Francisco Montecillo Padilla, het die amptelike opening van die kerk bygewoon toe die ontploffing plaasgevind het. Hy is ongedeerd.

Mulogo het gesê die motief agter die aanval is nie bekend nie, maar Tanzanië het in die onlangse verlede glo sektariese geweld tussen Christene en Moslems ervaar.

Sirië se president wy standbeeld in openbaar in

Pres. Bashar al-Assad van Sirië het Saterdag in die openbaar verskyn by die Damaskus Universiteit vir die inwyding van ‘n standbeeld ter ere van studente wat gesterf het in die opstande in dié land.

“Pres. Bashar al-Assad het hom by duisende studente en die families van ontslape studente geskaar met die inwyding van ‘n standbeeld ter ere van die martelaars by Sirië se universiteite en die Universiteit van Damaskus,” het die staatstelevisiestasie berig.

‘n Foto op die presidensie se Facebook-blad wys Assad, omring deur lyfwagte en ondersteuners.

Twee ontploffings by die Aleppo Universiteit op 15 Januarie het die lewe van 87 mense geëis. Die meeste van die slagoffers was studente.

Minstens 15 studente is op 28 Maart dood toe ‘n mortier ook ‘n kafeteria by die Damaskus Universiteit se fakulteit van argitektuur getref het. Die staatsmedia het dié aanval op terroriste blameer.

Taxi-baas se dogter word DA-jeugleier

Mbali Ntuli, nuutverkose jeugleier van die DA, sê dié opposisieparty moet meer “skop” hê.

“Ons moet harde kwessies soos dagga, dwelms en alternatiewe behuising bespreek…”

City Press berig sy is die naweek by ‘n konferensie in Newtown, Johannesburg, verkies.

Ntuli (25) was eers die afdeling se voorsitter. Sy was ook ‘n raadslid in die eThekwini-metro.

Volgens die koerant besit die nuutverkose leier ‘n maatskappy wat geleenthede reël. Sy is ook ‘n taxi-baas.

Luidens die berig besit sy twee taxi’s wat sy by haar pa – Big Ben Ntuli – geërf het. Hy was een van die grootste taxi-base in die gebied.

“Big Ben” is vir sy sakebelange vermoor toe sy dogter agt jaar oud was.

Zim-boere het te laat wakkergeskrik sê CFU

Charles Taffs, president van die Commercial Farmers’ Union (CFU) van Zimbabwe het Vrydag by ‘n TLU-konferensie se noord-tak gesê Suid-Afrikaanse boere moet leer uit die foute van die boere in Zimbabwe, het Beeld berig.

In die laat 1990’s het Zimbabwiese wit boere nie die tekens raakgesien dat die regering van pres. Mugabe besig was met planne om hul grond te gryp nie.

Taffs het volgens die koerant gesê Suid-Afrikaanse landbou sal moet saamstaan.

“Ons in Zimbabwe was nie verenig nie en ons regering het dit uitgebuit,” het hy gesê.

“Dit is ook belangrik dat met die amptelike strukture op plaaslike vlak saamwerk word en boere moet betrokke raak. Ons het dit te laat besef. Toe ons weer sien, het die regering dié strukture afgebreek en oorgeneem,” het Taffs gesê.

“Dit is ook belangrik dat julle jul saak by die regering stel. Praat met álmal in die regering. Maar moet dit nie met geslote deure doen nie. Doen dit in die openbaar. Dis makliker om die regering verantwoordelik te hou as hy goed in die openbaar gesê het as op geslote vergaderings.

“Hulle boelie jou ook makliker agter toe deure en gee jou baie keer op sulke vergaderings omtrent nie ‘n kans om te praat nie,” het Taffs volgens Beeld gesê.

Hy het verder gewaarsku dat boere nie by politiek betrokke moet raak nie.

Shoprite in PE se dak gee mee

‘n Groot gedeelte van ‘n Shoprite Checkers se dak het in Port Elizabeth inmekaargesak, het die SABC berig.

Stanley Jarvis, ‘n polisiewoordvoerder, sê die brandblusstelsel het vroegoggend onklaar geraak, wat veroorsaak het dat ‘n gedeelte (70 m by 20 m) van die dak ingegee het as gevolg van die water se gewig.

Niemand is beseer nie, omdat die winkel ten tyde van die voorval toe was.

Die voorval het by die Greenacres Inkopiesentrum plaasgevind.