{jathumbnail off}
Braai ‘n ui tot goudbruin in ‘n pan in ‘n bietjie olie en botter. Voeg ‘n klein pakkie gesnyde sampioene daarby en braai. Geur met sout en peper.
Rangskik oor ‘n snytjie roosterbrood met skaafsels parmesaanse kaas en roketblare.
Geniet!
{jathumbnail off}
Ek moet bieg dat die vorige aspersieslaai vol fieterjasies is. Hier is ‘n makliker, vinniger en klassieke resep wat nommerpas vir die smaak van vars geblansjeerde aspersies is.
Blansjeer ‘n handvol groen lote en posjeer ‘n eier vir elke tafelgenoot. Basiliekruidblare kan oor die warm aspersies geskeur word, maar dis nie ‘n moet nie.
Plaas ‘n eier op elke stapeltjie en bedruip met olyfolie en balsamiese asyn.
Sout en peper, en siedaar! Haal die warm Franse broodjie uit die oond.
{jathumbnail off}
Kook ‘n halwe pakkie penne pasta in water en bietjie sout tot gaar en laat afkoel vir vier tafelgenote. Blansjeer 12 dun vars groen aspersiepunte in kookwater intussen. Die aspersies moet nie papgekook wees nie.
Braai 100g haloumikaas wat in blokkies gesny is, tot goudbruin.
Sny ‘n halwe geel soetrissie in blokkies en 4 klein murgpampoentjies middeldeur en dan in skyfies. Meng al die slaaibestandele en strooi ‘n handvol kersietamaties en gekapte pietersielie oor die dis.
Vir die slaaisous, meng 1 eetlepel Franse mostert met een eetlepel heuning, ‘n knoffeltoontjie, een eetlepel appelasyn, een teelepel wit balsamiese asyn en ses eetlepels sonneblomolie.
Meng goed en bedruip die slaai. Lekker eet!
{jathumbnail off}
Kook ‘n twee koppies orecchiette pasta in genoeg water en ‘n bietjie sout gaar. Die pasta lyk soos klein oortjies. Enige kleinerige pastavormpie sal werk.
Sny ‘n klein blikkie bruin lensies oop of kook ‘n koppie bruin lensies in drie koppies water tot gaar. Laat pasta en lensies afkoel. Gebruik ‘n derde van die lensies en al die pasta vir vier mense.
Halveer 6 – 8 kersietamaties, sny ‘n halwe rooi soetrissie en ‘n halwe rooi ui in fyn skyfies en meng by die pasta en lensies. Strooi pietersielie, basiliekruid, origanum en tiemie daaroor, so ‘n teelepel van elk. Dit kan vars of gedroogde kruie wees, maar vars bly bobaas. Rond af met twee eetlepels fyngerasperde Parmesaankaas.
Bedrup met olyfolie en balsemasyn wat met knoffel gegeur is. Twee tot drie eetlepels slaaisous is genoeg.
Skep op, en gaan geniet onder daardie lekker skaduboom in die tuin terwyl die olyflysters wip-wip saamgesels.
{jathumbnail off}
Maak ‘n heerlike wortelslaai met die groot, goedkoper wortels wat boonop ewe elegant as die babaworteltjies in sy slaaigedaante lyk.
Skil 4 lekker vars wortels vir 4 mense en skaaf dan met dieselfde groenteskiller lang repe wortel en rangskik in ‘n mooi bak.
Maak ‘n slaaisous van ‘n halwe koppie vars lemoensap, twee eetlepels appelasyn, een teelepel gerookte paprika en ‘n halwe teelepel komynsaad, fyngemaal. Giet oor die slaai en roep die tafelgenote nader.
‘n Sterkerige kaas by ‘n vars broodjie gaan goed met die wortelslaai af.
{jathumbnail off}
Met hierdie prettige slaai is daar niks blou aan Maandag nie.
Neem ‘n balletjie mozzarellakaas en sny in skywe en was ‘n vars tamatie en sny in ewe dik skywe vir elke tafelgenoot. Plaas die skywe opmekaar en wissel af met vars basiliekruidblaartjies.
Bedrup met olyfolie en strooi ‘n bietjie growwe sout daaroor.
Geniet saam met ‘n broodjie uit die oond!
{jathumbnail off}
Voedsaam en maklik genoeg vir ‘n kok wat die ene duime is! ‘n Koppie bruinrys, gaargekook vir twee mense. Sny 2 of 3 dwergkomkommers in dun skyfies en halveer 10 kersietamaties. Krummel ‘n fetawieletjie oor die rys en meng.
Vir die slaaisous, meng die sap asook gerasperde skil van ‘n lemoen en die skil van ‘n suurlemoen met drie eetlepels olyfolie en giet oor die slaai. Kap ‘n paar blaartjies kruisement fyn of versier met heel kruisementblaartjies.
Smaaklike ete!
{jathumbnail off}
Soet slaaiblare smaak die lekkerste in hierdie slaai. Probeer romaine of botterslaai: Een kop, vars en goed afgespoel vir vier mense.
Kook vier eiers, net matig, nie te hard nie, en sny in kwarte. Braai twee snye wit brood wat in blokkies gesny is in olyfolie en ‘n toontjie knoffel tot bros en goudbruin.
Rangskik die gebraaide broodblokkies en eierkwarte oor die slaai. ‘n Paar Parmesaanskaafsels bo-oor, en die slaaibord is gereed vir ‘n romerige sous.
Gebraaide spek of okkerneute is ook ‘n opsie.
Daar is talle variasies op die tema van Keiserslaaisous, soos die klassieke emulsie met suurlemoen, oyfolie, ansjovisfilette en eier. Die maklikste is ‘n sous van suurlemoen en olyfolie met ‘n paar druppels Worcestersous en Tabasco vir smaak daarby. Rangskik ‘n paar ansjovisfilette oor die slaai ipv in die sous.
Geniet!
{jathumbnail off}
Wat gemaak met daardie oorskietpasta in die yskas?
Plaas ‘n handvol vars basiliekruidblare saam met ‘n eetlepel gerasperde Parmesaankaas, ‘n knoffeltoontjie en ‘n eetlepel of drie olyfolie in ‘n houer waarin ‘n handversapper pas, vir twee mense. ‘n Paar dennepitte of okkerneute sal die pesto daardie nodige oemf gee.
Maak fyn en meng goed met die koue pasta. Skep op en versier met ‘n basiliekruidblaartjie en ‘n goeie draai swartpeper wat kraak-kraak oor die bakkie stuif. Ruik die genot!
{jathumbnail off}
Hierdie resep is ‘n nuwe smaakervaring, gewaarborg.
Soek ‘n lekker spanspek by die groentewinkel uit en sowat 100g pistachioneute sonder doppies. Die kaas is ‘n stafie wit bokmelkkaas, maar die sagte Deense fetakaas sal ook werk as bokmelkkaas nie beskikbaar is nie. Albei kase het ‘n effense kryttekstuur wat heerlik by die spanspek pas.
Skil en ontpit die spanspek en sny in dun skywe. Verkoel solank.
Sny die bokmelkstafie in 4 skywe en rol in gekapte pistachioneute.
Plaas die neut-en-kaas skyfies op die koue spanspek en siedaar!
Politici is is al van ouds af sensitief oor wat hulle dra omdat hulle deur ‘n ondeurdagte keuse dalk onwetend ‘n boodskap uitstuur aan kiesers wat bots met wat hulle eintlik wil voorhou. Die teendeel kan ook waar wees: Klere word spesiaal gekies om ‘n boodskap te uit te stuur wat moeilik in woorde oorgedra kan word.
Een só ‘n voorbeeld was Keir Hardie, eerste Arbeiderspartyparlementslid wat in 1892 ‘n skokgolf deur die Britse Parlement gestuur het, deur op te daag met ‘n tweedpet en ‘n werkmanspak.
Vanity Fair het die feit dat Hardie in gebreke gebly het om ‘n pluiskuil te dra, betreur omdat hy “die fondamente van parlementêre gesag in gevaar gestel het en ontelbare paragrawe in die koerante” daaroor veroorsaak het. Kennelik het Vanity Fair nie kon droom dat daar vandag in die Britse pers ‘n geveg woed oor Sarah Brown, die Arbeiderspremier se vrou, se duur ontwerperskleresmaak nie. Die wiel draai…
Hier tuis het ons dieselfde parlementêre omwenteling gadegeslaan en dis asof die sirkus van skril patrone, yslike sonbrille en potsierlike kopbedekkings ‘n voorbode was vir riool wat tans in die riviere lek en amptenare wat nooit die gevolge van enige swak besluit hoef te trotseer nie.
Die draers van die nuwe Suid-Afrikaanse parlementêre modes het weliswaar geen skoktaktiek in gedagte gehad nie, alhoewel ‘n paar modebewuste ontleders dalk geskrik het. Net ‘n geloof dat onbeperkte fondse wat in ‘n klerekas gestort word, gesag sal afdwing. Dit was eerder die beweegrede vir die kleurkakofonie wat sedert 1994 losgebars het.
Uitspattigheid bly egter die absolute nee-nee van die Amerikaanse politieke establishment, waaruit Afrika tans so mildelik ideologies put. Obama mag miskien sy baadjie hier en daar meer uittrek as sy voorganger, maar dit bly nog steeds ‘n sobere hemp en das wat hy ten toon stel.
Sy vrou, alhoewel sy graag met peperduur ontwerpersware spog, is dalk nie ewe stemmig nie en het al die oë laat rek met ‘n paar bont skeppings. Nietemin is die reguit haardos ononderhandelbaar en mevrou Obama streel graag ‘n los, weelderige sliert om haar haarmiddelbehandeling in die openbare oog te hou. Daarmee bevestig sy natuurlik herhaaldelik haar verwantskap aan die ryk, swart Amerikaanse middelklas, ‘n pure wit skepping, byna soos verbete Engelse clichés die ANC-magshebbers onderskei.
Obama se kinders is weliswaar in wandelende advertensieborde vir die VSA se politiek verander en in Italië vroeër vanjaar het sy oudste dogter in ‘n stel hempies met ‘n vredesteken vir die kameras geparadeer, in die hoop dat haar “onskuld” die boodskap sal legitimeer.
Terwyl klerekodes ‘n kulturele omwenteling in China veroorsaak het – van lang imperiale gewade tot Maoïstiese pakke tot Westerse styl pakke vir mans – het vroueklere ‘n eienaardige wending geneem. Vrouepolitici het aanvanklik, aan die begin van die 20ste eeu, soos skoolkinders aangetrek.
Die gedagte van die “tsjeongsam” of “kipao” was om onderdanigheid, maar ook terselftertyd ‘n verbintenis tot opvoeding, uit te druk.
Voor die Tweede Wêreldoorlog is Chinese politici se kleding vermilitariseer en manlike en vroulike style het daarna gekonvergeer. Vandag is die klem op ‘n uiterste soberheid en geen Chinese amptenaar van enige statuur sal dit waag om af te wyk van die norm van ‘n donker pak nie.
Byna soos die vroue met mag in die Amerikaanse politieke landskap. Gravitas is die wagwoord en blykbaar word dit die beste deur ‘n donker broekpak vergestalt want ‘n modeskrywer van die New York Times het in een week 6 uit 16 van hulle getel in die Senaat.
Nanci Pelosi, met die figuur van ‘n model, kry dikwels volpunte vir haar uitrustings. Statig sonder om vervelig te wees, sê modekenners. Net reg met ‘n speelse bykomstigheid soos pêrels uit Tahiti. En die een goue reël van smaakvolle kleding oortree sy nooit: Sy is altyd in net een kleur uitgerus vir belangrike geleenthede, sy dit donkerpers, grys, rooi of swart.
Bestellings vir pêrels uit Tahiti het glo deur die dak geskiet nadat sy daarmee gesien is.
Alhoewel haar klere van duursame, duur stowwe gemaak word, is die snitte sober en kan die gewone vrou op straat iets soortgelyks in styl bekostig. Die Demokrate kan hulle sterre dank vir speaker Pelosi wat waarskynlik ‘n groot rol speel om vroulike kiesers op die wa te hou.
Hillary Clinton moet egter die Demokraat met die meeste oormaaksessies in die boek wees. Vandat sy die kalklig getref het as presidentsvrou, verander sy klere en hare. Tans lyk dit asof sy iets gevind het waarvan sy hou en ook die eenkleurresep ontdek het.
Nog ‘n eenkleuraanhanger is die aanvallige Anna Bligh van Australië. Die premier van Queensland sit nooit ‘n modevoet verkeerd nie, al is dit in skrilpienk.
Condoleezza Rice, vorige Amerikaanse sekretaris van buitelandse sake, is deur die Washington Post gekapittel nadat sy dit buite gewaag met lang swart stewels en ‘n kort swart romp. Haar reputasie van ‘n godvresende werkesel het nooit weer daarna herstel nie.
Maar die mees onlangse groot modestelling kom van niemand minder nie as die nou herverkose Duitse Kanselier.
Bild am Sonntag het Angela Merkel en haar eggenoot Joachim Sauer op ‘n visvangvakansie kort voor die verkiesing afgeneem. Kandidaat Merkel wou ‘n bietjie van haar alledaagse doen en late aan Duitsland wys.
Andreas Fritzenkötter, die vorige media-adviseur vir Helmut Kohl, is baie krities oor Merkel se besluit. “Hierdie foto’s gee ‘n baie, baie direkte blik op haar lewe en dis soos ‘n klap in jou gesig.”
Merkel se besluit om haar lewe vir die pers oop te gooi was ‘n waagstuk te oordeel aan die foto’s. Die magtigste ekonomie in Europa word deur ‘n lokomotief in ‘n vaal sweetpakbroek getrek. Suid-Afrika se parlementêre modesirkus kan gaan kers opsteek by doodgewone nederigheid.
{jathumbnail off}
Iets anders vir die koel reënweer. Dit neem nie langer as 20 minute om dié vullende warm slaai vir vier mense aanmekaar te slaan nie.
HOENDER EN AARTAPPELSLAAI
500g jong aartappeltjies, in dik skywe gesny
1 eetlepel balsamiese asyn
3 eetlepels olyfolie
100g babaspinasieblare
400g of vier gaar hoenderborsies in skywe gesny
100g gehalveerde kersietamaties
Metode
Kook die aartappelskywe in water tot sag, so 5 minute. Giet water goed af en verbruin in 2 eetlepels olyfolie vir so 7 tot 8 minute in ‘n braaipan tot lekker goudbruin. As al die skywe nie inpas nie, doen in twee sarsies.
Voeg die asyn, die oorblywende olie en spinasieblaartjies by tot hulle verwelk. Dis sommer gou-gou. Voeg dan hoender en tamatie by, roer deur, snipper ‘n paar grasuie daaroor en skep op!
Verslankend, smaaklik en voedsaam. Kyk hoe biggel die reëndruppels teen die ruit af en geniet!
{jathumbnail off} 
‘n Resep met net één vars bestandeel, smaaklik, kleurvol, eenvoudig, baie deftig en elegant. Kortom ‘n mondvol en eg Frans. Moenie volgende keer verby daardie bossie radyse in die groentewinkel of die boeremark loop nie. In daardie kraakvars pepersmakie van die nederige radys, lê die geheim van ‘n hele maaltyd opgesluit.
Soek ‘n vars bossie, verlep sal nie deug nie.
Was sorgvuldig, droog af en as die stingels en blare mooi lyk, hou dit sommer aan en pak op ‘n mooi bord uit.
Bedien saam met vars snye Franse brood of bruinbrood, ‘n bakkie soet (ongesoute) botter en growwe sout.
Om te eet, sny ‘n radysskyfie, smeer ‘n knypie brood met botter en plaas daarop. Maal ‘n bietjie growwe sout daaroor na gelang van smaak en smul!
‘n Glas koue Sauvignon Blanc daarby, ‘n hopie biltong en dis so goed soos ‘n vakansie op die Franse platteland hier tuis.
{jathumbnail off} 
Hier is nou ‘n maklike slaai vir twee mense. Boonop is daar ‘n spesiale aanbod op lekker sappige aarbeie by die groentewinkel wat dit ook ‘n sakpasete maak.
AARBEI, FETA EN SPINASIESLAAI
‘n Klein houertjie aarbeie, stingels verwyder en gehalveer.
Rangskik op ‘n handvol babaspinasieblare.
Krummel ‘n skyfie fetakaas oor die aarbeie en spinasie en ‘n paar okkerneute. Pekanneute sal net so goed deug.
Sprinkel ‘n bietjie framboosgegeurde asyn oor die slaai en druiwepitolie na smaak.
Geniet!
‘n Vars brroodrolletjie met botter en dun snytjie salami daarby sal die hongeriges tevrede stel.