Skrywer: Dan Roodt
Renosters weer deur stropers getakel
Twee renosters, ‘n ma en haar kalf, is in die leeupark in Kromdraai, Gauteng deur wildstropers doodgemaak, het die Gautengse polisie Saterdag gesê.
Die geslagte renosters is Saterdagoggend in die reservaat in Muldersdrift, wes van Johannesburg, gevind.
Die ma se horing was verwyder, het adjudant-offisier Odette van Staden gesê.
“Hierdie is nie die eerste insident nie. Twee ander renosters is ‘n paar maande gelede doodgemaak en geslag,” het sy gesê.
Bulle praat Afrikaans!
Die Bulle praat Afrikaans! Francois Hougaard, die Bulle se man van die wedstryd, het in Afrikaans geantwoord op die Engelse vrae van Darren Scott na afloop van die Super 14-eindstryd.
‘n Laggende Hougaard het met ‘n sierlike duikslag vroeg in die wedstryd ‘n plek tussen die pale vir die ovaalbal uitgesoek, en die Bulle se wenpoging op koers geplaas.
Die Bulls het voorts18 punte met strafskoppe aangeteken om uiteindelik die wedstryd met 25-17 netjies in die sak te steek.
Die Bulle se aanvallende skoppe was deurslaggewend waar die Stormers by die losskrums strafskoppe afgestaan het.
Kaptein Schalk Burger het erken dat die Stormers begin sukkel het slegs 25 minute ná hulle afgeskop het. Die Kapenaars was toe al reeds 0-16 agter. By die skrums het dit ook maar gekreun.
Die lugdruk het daarna gesorg dat die besoekende span nie kon inhaal nie.
Shilowa eenparig as Cope-leier benoem
Mbhazima Shilowa, Cope se adjunk-president, is eenparig benoem as die party se leier tydens die party se verkiesingskonferensie in Pretoria.
Ander benoemings sluit Charlotte Lobe as adjunk-president, Mluleki George as tweede adjunk-president en Mvume Dandala as sekretaris-generaal in.
“Ek aanvaar die benoeming,” het Shilowa gesê.
Die ander het ook hul benoemings aanvaar.
Intussen het die hooggeregshof in Johannesburg Saterdag ‘n interdik wat keer dat Cope se verkiesingskonferensie voorgaan, goedgekeur.
Die aansoek vir die interdik is deur Cope se leier, Mosiuoa Lekota, gedoen.
Shilowa het gesê die party sal die interdik respekteer, maar direk daarna ‘n stemming gehou en daarmee is Lekota uitegerangeer.
Mense hang ook steeds buite die St George’s Hotel rond nadat geweld vroeër vandag tydens die konferensie daar uitgebreek het.
Verslaggewer snuffel AK-militante uit
‘n Ondersoek deur verslaggewer Jacques Pauw het bevind dat verskeie ondersteuners van die Somaliese militante groep Al-Shabaab vlugtelingstatus in Suid-Afrika gekry het.
Rapport berig dat die departement van binnelandse sake dié Somaliërs twee weke lank ondervra het voordat hulle hul vlugtelingspermitte ontvang het. Die Nasionale Intelligensie-agentskap (NIA) is daarna ingelig dat die Al Kaida-verwante groep se lede wel toegang tot die land verkry het.
Ten minste 14 lede van die militante groep het glo verlede maand by die Lebombo-grenspos tussen Suid-Afrika en Mosambiek opgedaag. Onder die 14 tel ‘n chemiese wetenskaplike asook enkele onderwysers.
In September verlede jaar is ‘n ondersoek na Al-Shabaab se teenwoordigheid in Suid-Afrika geloods nadat die Amerikaanse ambassade in Pretoria gesluit is vanweë dreigemente om die VSA se belange in Suid-Afrika aan te val.
Osman Ali, woordvoerder van die Somaliese raad in Suid-Afrika, het blykbaar erken dat enkele fundamentaliste dalk die land binnegekom het.
Afrika-tsunami
Noorweë stuur diplomatieke nota oor Manyi se misdryf
Noorweë se ambassadeur in Suid-Afrika het ‘n vergadering met die minister van arbeid Membathisi Mdladlana versoek, om sy bekommernis oor Jimmy Manyi, direkteur-generaal van arbeid, se optrede tydens ‘n amptelike vergadering, te bespreek.
“Daar is sekere dinge bespreek en die manier waarop hulle opgehaal is in die vergadering, het ons nie waardeer nie, ” het ambassadeur Tor Christen-Hilda Donderdag aan Sapa gesê.
Hy het gesê dat Mdladlana het ingestem tot ‘n vergadering, maar ‘n datum moet nog geskeduleer word.
Christen-Hilda en twee ander senior diplomate van die Noorse missie het met Manyi in Pretoria aan die begin van Maart byeengekom. Noorweë wou samewerking met Suid-Afrika se program deur die Internasionale Arbeidsorganisasie (ILO) bespreek.
Hy het gesê die swart ekonomiese bemagtigingsbeleid is bespreek tydens die vergadering, maar wou nie verder uitbrei oor sy redes vir die stuur van ‘n diplomatieke nota aan die minister van Internasionale Aangeleenthede en Samewerking, Maite Nkoana Mashabane, wat die saak aangestuur het na Mdladlana nie.
“Ek wil nie ingaan op die besonderhede van wat gebeur het nie.”
Manyi het gesê die vergadering Donderdag het gehandel oor probleme wat Noorse maatskappye met SEB ondervind. Hy het glo aangebied om hulle in detail oor die regering se beleid in hierdie verband in te lig.
Die direkteur-generaal, wat ook president van die Black Management Forum (BMF) is, het gesê hy sien niks verkeerd met sy aanbod nie en was verbaas dat die diplomate dit as ‘n misdryf sien.
“Ek hou baie van hierdie aanbiedings in my persoonlike hoedanigheid en ek moet byvoeg dat ek nie ‘n fooi vra nie, ek doen dit omdat ek passievol oor transformasie is.”
Manyi het bygevoeg dat daar geen botsing van belange tussen sy pos by die departement en sy voorsitterskap van die BMF is nie.
Cope ‘gedope’ om te ‘hope’
In beginsel pak Cope nou ‘n belangrike saak aan – om ‘n beleid vir die party te vind. Leiers sal eers later gekies word.
Of dit in die realiteit van Suid-Afrikaanse politiek die regte punt is om te begin, sal die tyd leer. Beleid weeg eenvoudig nie in Suid-Afrika swaar nie, soos onlangs ook opgemerk deur die Vrystaatse leier van die DA.
Dit is ook pas weer duidelik gedemonstreer toe die ANC se jeugleier, Julius Malema, ‘n voorlegging oor nasionalisering voor ‘n parlementêre portefueljekomitee gemaak het en goed ontvang is. Malema het selfs ter stawing uit die Freedom Charter aangehaal. Kort hierna ontken pres. Jacob Zuma dat die ANC ‘n nasionaliseringsbeleid het.
Dat Cope so lank kon bestaan en selfs in die parlement verteenwoordig kon wees sonder ‘n beleid, is ook nie nuut nie. Ook die ID van mev. Patricia de Lille het ‘n geruime tyd bestaan voor die party homself oplaas as deel van die sosiaal-demokratiese ideologie verklaar het. Nou gaan die ID skynbaar by die liberaal-demokratiese DA aansluit.
Ander faktore soos die charisma van ‘n leier of ‘n historiese verloop speel duidelik ‘n groter rol, en verklaar deels ook hoekom Suid-Afrika, sy groot selfverklaarde Christenbevolking ten spyt, geen groot Christen-demokratiese blok het nie, soos wél in Europa die geval is.
Cope is om verskeie redes ‘n groter rolspeler in die Suid-Afrikaanse politiek as wat sy getalle aandui. Die euforie waarmee dit van stapel gestuur is, het dadelik ‘n groot impak op die laaste verkiesingsuitslae gehad. Partye soos die UDM, IVP en veral die ACDP is swaar deur die euforie getref. Dit is al drie partye wat deur hul leierskapstyl grootliks om die persona van individue gebou is, individue wie se politieke brandstof boomskraap begin word.
Selfs die DA is veral buite die Wes-Kaap geraak hierdeur deurdat baie ontnugterde kiesers waarskynlik hul kruisies weens die Zille-euforie agter die DA sou trek as Cope nie soos ‘n goed-georkestreerde massa-euforie oor die land geswiep het, en ‘n milde media-vakansietydperk beleef het nie.
Ironies het Zille se anti-Zuma-veldtog waarskynlik weer baie swart potensiële Cope-ondersteuners terug in die ANC-kraal gedryf. ‘n Wit vrou wat ‘n swart man met baie vroue so disrespekvol behandel gaan in tradisionele geledere gewoon nie goed af nie.
Kort na Cope se toetrede tot die parlement het dit egter geblyk dat sake nie wel was nie. Prominente leiers het gedros, en faksies het ontstaan.
Uiteindelik het die twee vernaamste stigtersfigure, Lekota en Shilowa, teenoor mekaar te staan gekom. Vir Lekota is dit ‘n tipe de ja vu. As aangestelde Vrystaatse premier het die destydse president, Nelson Mandela, gehoop dat sy vriend en vertroueling die steun van die mense sou kry. Lekota kon egter nie, ten spyte van inmenging van Mandela, die populisme van Ace Magashule stuit nie.
Nou herhaal die geskiedenis hom. Die afloop van hierdie leierskapstryd is belangrik vir die toekoms van die party.
Ten regte of ten onregte geniet Lekota tradisioneel baie blankes se steun, en speel hy ‘n belangrike rol – danksy die huidige stelsel van basies aangestelde leiers – om van Cope ‘n nie-rassige party te maak. Byt Lekota die onderspit, en verlaat hy die party, sal Cope onder Shilowa waarskynlik net nog ‘n swart party met ‘n charismatiese leier wees. Die siklus, soos met die UDM na die vertrek van Roelf Meyer, sal voltooi wees.
Of die party sal groei en die ANC beduidend verswak, of soos die UDM sal krimp en stagneer, sal net die tyd leer. Vir Shilowa, as Xhosa, te midde van ‘n ANC onder ‘n “hundred percent Zulu boy” en tekens van ongelukkigheid, is die tyd dalk meer geskik vir Shilowa as toe Holomisa die pad aangedurf het.
Misluk Cope as nie-rassige party sal die vertroue in nie-rassige politiek ‘n knou weg hê, en sal partye wat op hoofsaaklik blanke belange fokus waarskynlik in statuur van belangrikheid groei. Cope se lot raak die hele Suid-Afrikaanse politieke landskap.
WB-stadion sonder rotte en duiwe
‘n Suid-Afrikaanse Wêreldbeker-stadion het hom tot roofvoëls gewend om duiwe en rotte in ‘n anti-plaag strategie uit te roei in plaas van gifstowwe.
Die nuwe 46 000-sitplek-stadion in Port Elizabeth gebruik verskeie voëls en vlermuishuise onder die buitenste rand van die opvallende blom-vormige dak om lugjagters te trek.
“Ons is heeltemal gifvry. Dit is die enigste stadion met ‘n program soos dit in plek is as ‘n plaagafskrikmiddel, ” het Rob Hichens bestuurder aan AFP gesê.
Die strategie is ontwerp as ‘n harmonieuse stelsel: die wilde roofvoëls jag en verjaag duiwe, wat die berugte slordige voëls se neste en mis uitskakel wat rotte sou lok.
“Duiwe is baie slordig. Die hele stad is besaai met hulle. Ek het ‘n wilde duif-telling in die stad en ons het meer as 10,000 voëls, ” sê Arnold Slabbert van die Stedelike Roofvoëlprojek, wat die plaagstrategie opgestel het.
Die voëls dra luise en siektes in die mis wat skade aan sitplekke aanrig terwyl rotte die neste inval vir eiers en kuikens, het hy gesê.
“Onmiddellik as jy ‘n groot duifprobleem ontwikkel, veroorsaak dit ‘n rotprobleem. Jy wil nie duiwe in ‘n stadion hê nie, einde van storie.”
Die roofvoëls kan gesien word waar hulle bo die tweemiljardrand-stadion sweef, terwyl kwikstertjies insekte op die gras onder oppik.
“Op die oomblik, is daar drie valke in die stadion. Hulle jag redelik omvattend,” het hy gesê.
“Hulle is baie effektief met die beheer van die duifbevolking. Die duiwe kom nie naby die stadion nie, hulle bly net weg. Dit is ‘n wonderlike afskrikmiddel.”
Vlermuisbokse is ook gebou in bome en onder die buitenste stadiondak vir inheemse vlermuise – wat 132 muskiete in ‘n uur kan eet – omdat die stadion se ligte en sy waterryke omgewing insekte lok.
“Ek kyk na ‘n geïntegreerde beheer van al die plaagspesies. Ek skep ‘n volledige bietjie ekosisteem hier,” sê Slabbert.
“Dit is die enigste Wêreldbekerstadion wat dit doen en dit is die enigste wat beslis nie ‘n voëlprobleem het nie.”
VSA reik waarskuwing uit vir WB
Die VSA se State Department het ‘n waarskuwing uitgereik dat reisende Amerikaanse burgers na Suid-Afrika vir die Wêreldbeker met die gevaar van terrorisme en misdaad te kampe het.
“Daar is ‘n groter risiko dat ekstremistiese groepe terreur in Suid-Afrika in die nabye toekoms kan pleeg,” het die departement in ‘n waarskuwing Donderdag gesê.
“Terwyl ‘n aantal terreurdreigemente vir die Wêreldbeker-sokkertoernooi in Suid-Afrika verskyn het in die media in die afgelope weke en maande het die Amerikaanse regering geen inligting oor ‘n spesifieke, geloofwaardige dreigement dat ‘n aanval deur ‘n individu of groep beplan word om saam te val met die toernooi nie.”
Die State Department het gesê dit sal enige inligting openbaar maak van ‘n spesifieke en geloofwaardige bedreiging.
VSA-burgers word aangeraai om die motordeure en vensters gesluit te hou terwyl hulle ry en nie waardevolle items te laat sien of duur juweliersware te dra nie.
Die waarskuwing het gesê die openbare vervoer is “swak ontwikkel” en burgers aangeraai om van huurmotors of private vervoer gebruik te maak. En by kruisings in die nag of in afgeleë gebiede, word aangeraai dat ruimte gelaat word vir ‘n “wegkomkans”.