Gebrek aan visie maak kiesers moedeloos

Kontrasteer egter bostaande ordentlikheid met Julius Malema se benadering. Wie kry die meeste publisiteit? Dat dit negatiewe persdekking is, maak nie juis saak nie. Daar is waarheid in die stelling dat enige publisiteit goeie publisiteit is.

Is die VF+ se ordentlikheid dus nie moontlik deel van die probleem nie? Die syfers en stempersentasies vertel my luidkeels dat kiesers eerder die konfrontasionele benadering van 'n Tony Leon verkies. Al is dit kennelik meestal warm lug, skep dit tog die indruk by die kieser dat die Leons van die lewe die ANC aanvat, en persepsies is immers realiteit.

Voorts skryf PC Badenhorst 'n interessante ding (ek neem aan hy is 'n VF+-ondersteuner): "Demografies het die blanke in elk geval nie 'n kans nie." Spreek dit nie moontlik van moedeloosheid en oorgawe by 'n kieser, wat veroorsaak is deur 'n gebrek aan visie nie?

Ja, in die getallespel wat die Suid-Afrikaanse demokrasie verteenwoordig, is blankes weliswaar 'n minderheid.

In Orania is blankes egter nie 'n minderheid nie.

In 'n volkstaat sal blankes ook die oorweldigende meerderheid wees.

Is dit nie 'n suksesvolle politikus se taak om sy volgelinge te inspireer en om 'n geloofwaardige visie aan hulle voor te hou nie?

Barack Obama is verkies omdat hy 'n visie aan die Amerikaanse publiek voorgehou het. Hy het mense hoop gegee, met ander woorde. As 'n party nie 'n visie het of hoop skep nie, is dit 'n probleem, want dan stem mense soos PC Badenhorst vir só 'n party nie omdat hy dink die party het 'n plan of 'n oplossing nie, maar bloot omdat hy simpatiek staan teenoor hulle leiers se ordentlikheid en Christelike waardes, iets wat niks met visie te make het nie.

Hier is my vraag opnuut: Wat sal gebeur as die VF+ sy dubbelsinnigheid laat staan, as hy 'n duidelike visie voorhou, en sy benadering verander na 'n meer konfrontasionele een?