praag.co.za

Tag: Pretoria

  • Kerkgangers vertrap mekaar in Pretoria

    ‘n Kerkdiens in Pretoria het in chaos geëindig toe byna 40 swart kerkgangers vertrap is tydens ‘n stormloop.

    Die veertig is Sondagoggend beseer by die Tshwane Events Centre toe ‘n skare vorentoe gebeur het om toegang tot die perseel te kry.

    ER24 se woordvoerder Werner Vermaak het gesê kort voor 08:00 is paramedici en ander ambulansdienste na die toneel ontbied. “Met paramedici se aankoms op die toneel het hulle 40 mense met verskeie beserings aangetref,” het hy gesê.

    ‘n Bejaarde vrou het ernstige bekkenbeserings opgedoen. Sy is na ‘n nabygeleë hospitaal geneem en verkeer steeds in ‘n ernstige toestand.

    ‘n Kerkbyeenkoms word elke Sondag op die perseel gehou en ‘n skare swartes het buite die geslote hek saamgedrom toe hulle begin stoot het van agter om toegang te verkry.

    Die hek het uiteindelik oopgebars en diegene wat geval het, is deur die stormlopers vertrap.

  • Wit fotograaf beseer in TUT-onluste

    Wit fotograaf beseer in TUT-onluste

    ‘n Wit vrouefotograaf is beseer toe sy deur ‘n klipgooier aangeval is tydens geweld wat Woensdag by die Tshwane universiteit van Tegnologie (TUT) in Pretoria uitgebreek het.

    Christine Vermooten, ‘n fotograaf by die Citizen, is glo deur swart oproermakers met klippe beseer en na die hospitaal gehaas. Volgens onbevestigde berigte is haar enkel gebreek.

    ‘n Aantal swart studente is ook in skermutselings tussen twee swart groepe beseer. Die geweld het uitgebreek tydens ‘n besoek van die leier van die EFF, Julius Malema aan die TUT.

    Skermutselings tussen lede van SASCO en die ANC Jeugliga aan die een kant en EFF-lede wat na Malema geluister het, het buite beheer geraak toe albei kante mekaar met klippe begin bestook het.

    Malema het studente Woensdag toegespreek voor Donderdag se studenteraad-verkiesing. Hy is egter onderbreek deur SASCO-ondersteuners.

    “Vegters, val aan, val aan!,” het die EFF-leier sy ondersteuners aangemoedig teen SASCO. Malema het by die kampus opgetree om EFF-ondersteuners te motiveer om deel te neem in die verkiesings SASCO uit te stem.

    Terwyl hy besig was met sy impromptu-toespraak, het ‘n groep SASCO-lede opgeruk na die stadion terwyl hulle anti-Malema liedjies gesing het.

    Selfs voor Malema opgedaag het, het vuisgevegte tussen strydende groepe uitgebreek.

    Die polisie moes uiteindelik die strydendes met traanrook verwilder.

    Ná die chaos by die TUT-hoofkampus, is Malema na twee ander universiteitskampusse in Ga-Rankuwa en Soshanguve waar hy ook studente toegespreek het, blykbaar ook sonder die nodige toestemming.

    Die EFF het Woensdag voorts ‘n mosie sonder kennisgewing ingedien by dien Parlement. Die party se hoofsweep, Floyd Shivambu is daarna gevra om die parlement te verlaat.

    Dit is die eerste keer dat ‘n parlementslid gevra is om die vergadering te verlaat sedert nuwe tussentydse maatreëls in werking gestel is. Volgens die reëls kan ‘n lid verwyder word as hy of sy verrigtinge ontwrig.

    Shivambu het geweier om ‘n vorige opdrag uit te voer om die parlement te verlaat nadat die mosie buite orde verklaar is.

    Al die party se verteenwoordigers het die parlement verlaat voordat Shivambu verwyder kon word.

  • Afriforum kanselleer fees glo weens ‘regses’

    Afriforum kanselleer fees glo weens ‘regses’

    Die burgerregte-organisasie, AfriForum, het Woensdagoggend aangekondig dat hulle nie dié jaar die gratis AfriForum-fees by die Voortrekkermonument gaan aanbied nie.

    Kallie Kriel, hoof uitvoerende beampte van AfriForum, het aan Centurion Rekord bevestig dat die konsert na agt jaar gekanselleer is.

    Die gratis fees, wat die afgelope agt jaar mense van regoor Pretoria getrek het, het te omstrede geraak vir Afriforum nadat beide Steve Hofmeyr en Sunette Bridges by die konserte opgetree het.

    AfriForum het sowat drie jaar gelede alle bande met Bridges verbreek, maar Hofmeyr was een van die fees se grootste trekpleisters.

    Klaarblyklik voel Afriforum dat die fees ‘n “regse-gevoel” begin kry het, want die Vierkleur het gereeld by die konserte gewapper en wyle Eugene Terre’blanche, het die jaar voordat hy vermoor is, self ‘n draai by die konsert gemaak.

    Kriel het tydens vroeëre media-onderhoude gesê dat ‘n regse inslag “nooit die bedoeling daarvan was nie”.

    Die fees het ook al knelpunte, waaronder die omstrede naamsverandering van Pretoria, hoog op die agenda geplaas en Hofmeyr, het byvoorbeeld, sterk standpunt teen die verandering van die verhoog af ingeneem.

    Die fees het jaarliks tussen 20 000 en 30 000 mense gelok.

  • EFF verwoes kerk wat ‘blare eet’

    Chaos het uitgebreek by die End Times Disciples Ministries se kerk in Soshanguve, noord van Pretoria, toe EFF-lede Sondag op die tent toegesak het en dit aan die brand gesteek gesteek het.

    Die EFF-aanvallers het beloof om die kerk se pastoor, Pnuel Mnguni knaagdiere en slange te laat eet het ANN7 berig op hul Twitter-rekening.

    Mnguni het voorheen sy gemeente gevra om slange lewendig te sluk. Hy is in hegtenis geneem op aanklagte van dieremishandeling.

    Maar, volgens berigte was die pastoor nie daar vir die diens Sondag nie. Tog het Mnguni se afwesigheid nie die EFF verhoed om verwoesting op die perseel te saai nie omdat gemeentelede glo “blare eet”.

    Dit is nie duidelik waarom die EFF gekant is teen “blare eet” nie.

    Die polisie, wat teenwoordig was, het niks gedoen om te keer dat die EFF die gemeentelede intimideer, verjaag en die tent verwoes en aan die brand steek nie.

    In ‘n soortgelyke voorval in Namibië dié naweek is die Pinksterkerk van Save Souls Ministry op Okankolo in die Oshikotostreek afgebreek omdat dit na bewering met kinders se skoolwerk inmeng.

    Pastoor Abraham Petrus het Vrydag ’n klag van opsetlike saakbeskadiging in dié verband by die polisie op Okankolo ingedien.

    “Waar ons kerk was, is net houtbanke. Die sinkplate is verwyder en weggedra,” het hy gesê.

    Die voorval volg nadat ouers van die Okankolo Gekombineerde Skool Donderdagaand tydens ’n vergadering die sluiting van die kerk, met 40 gemeentelede, geëis het. Volgens die ouers hou die gemeente se herlewingsdienste in die aand hul kinders uit die slaap. Onderwysers het voorts gesê kinders wat dié dienste bywoon, kan bedags in die klas nie konsentreer nie omdat hulle vaak is.

    Na bewering hou van die gemeente wat op die skoolterrein kamp en die dienste bywoon, se gille snags ander kinders wakker. Dié kinders skree snags glo “vuur, vuur!”

    Petrus het alle aantygings teen sy kerk ontken.

    Volgens hom hou die kerk net op naweke en tydens skoolvakansies herlewingsdienste. Kinders word ook net by dié dienste toegelaat as hulle van hul ouers vergesel is, sê hy.

    Hy sê die ouers het tydens die vergadering onder die invloed van die onderwysers ten gunste van die sluiting van die kerk besluit.

    Petrus beweer sy kerk het nie die geleentheid gehad om sy kant van die saak te stel nie. “Ek is net vier minute gegun om te praat en byna niemand het na my geluister nie,” sê hy.

  • Cosas-betogers vas na plundertog

    Die polisie het ‘n aantal skoolkinders in hegtenis geneem wat op ‘n plundertog in Pretoria gegaan het, het RSG berig.

    Die plunderaars het aan ‘n onwettige optog van die organisasie, Cosas na die Departement van Basiese Onderwys se kantore deelgeneem.

    ‘n Groep het blykbaar van die roete afgewyk en begin plunder. E

    en winkeleienaar sê die kinders het sy winkelvenster gebreek toe hy hulle uitgesluit het.

    Hulle het hom ook na bewering met bakstene gegooi.

  • Mooters neem hul park terug

    Mooters, mense van die Moot, het Saterdag self ingespring om die Trimpark op te ruim en ongewenste elemente te verwyder, het Rekord Moot berig.

    Clinten Sulter, lid van die Moot-gemeenskapsinisiatief (MootGi), sê inwoners en lede van Moot Sektor 2 GPF het die middag omstreeks 15:00 by die Trimpark bymekaargekom en aan die werk gespring.

    “Een van die grootste probleme is dwelms in die Moot. As dit uit die weg geruim kan word, behoort misdaad ook te daal.”

    Sulter sê die lede het ook profiele oor die sluipslapers geskep wat in die park bly en ‘n noukeurige oog sal in die toekoms gehou word oor hul doen en late by die Trimpark.

    “Daar is baie onwettige stortings van afval en ons beoog om die skuldiges te betrap.”

    Hy sê baie rommel, tekens van dwelmverkope en gesteelde koperkabels is in die park gevind.

    “Die opruiming van die Trimpark was ‘n groot sukses en ons beplan gereelde opvolg-aksies,” sê Sulter.

  • Nagklub doef-doef voort ten spyte van klagtes

    Tiger Tiger is die gewildste nagklub in die ooste van Pretoria, maar die musiekvoos inwoners het nou besluit om voet neer te sit en ‘n petisie voor die Tshwane metroraad te lê, maar die klub steur hom nie aan die ‘foefies’ van die oues nie en gaan voort om te doef-doef.

    Musiekvoos inwoners in die ooste van Pretoria het besluit om Tshwane metro te nader vir hulp om die Tiger Tiger nagklub se deure te sluit, het Rekord Oos berig.

    Bejaarde inwoners kla dat hulle na sewe jaar se doef-doef harde rave- en trans-musiek in January Masilelarylaan keelvol is. Dit dryf inwoners van die omliggende ouetehuise en aftree-oorde letterlik teen die mure uit, sê Karen Meyer, DA-raadslid van wyk 44.

    Meyer het Maandag aan Rekord gesê die inwoners het die afgelope jaar herhaalde kere petisisies opgestel en op die klub se voorstoep afgelaai. “Dit het geen effek op hulle gehad nie. Die klub steur hulle net nie aan die besware nie,” het Meyer gesê.

    Tiger Tiger is een van die min nagklubs wat steeds in die ooste van Pretoria vermaak verskaf. Sedert Hatfield Square nie meer studente se drinkgat is nie, stroom hulle na Tiger Tiger toe.

    Volgens Meyer is die perseel waarop die klub geleë is, ‘n nes van onheilighede. “Daar word gereeld by motors ingebreek en ons stuur ook op ‘n gereelde basis die metropolisie na die klub om hulle stil te maak.”

    Meyer sê die polisie slaan ook gereeld op die klub toe om dwelms uit te snuffel en gesondheidsinspekteurs maak ook gereeld daar ‘n draai.

    Die klub het ook al bekendes soos die sangeres Elizma Theron en die atleet Llewelyn Herbert getrek en DJ’s waaronder Gareth Cliff speel ook gereeld daar.

    Die jongklomp beskou dit as die “plek om gesien te word” en steur hulle nie regtig aan die inwoners se gebrom nie.

    Cathy Hudson, die eienares van Tiger Tiger, sê die nagklub is klankdig en dat hulle nie die inwoners stuur nie. “Die polisie en metropolisie was al by ons, maar hulle het geen dwelms op die perseel gevind nie. Ek werk nou saam met die polisie om van kriminele elemente ontslae te raak.”

    Meyer meen egter dat die nagklub nie klankdig genoeg is nie.

    Die moontlikheid bestaan dat Tiger Tiger, wat vier takke landswyd het, na ‘n ander perseel gaan verhuis.

    Hudson sê sy huur die klub by Mercedes-Benz. Die motorhandelaar is reg langs die klub, en hulle gaan dalk al die huurders se kontrakte kanselleer.

    Maar vir nou steur Hudson haar nie aan die “kerkgroepe” wat so brom nie. “Ons het nog ‘n huurkontrak en sal beslis nie nou ons deure sluit nie.”

    Tiger Tiger is net Donderdae, Vrydae en Saterdae oop.

    Adjudant-offisier Dave Miller, woordvoerder van die Garsfontein-polisiekantoor, sê hulle het die afgelope jaar twee keer dwelms by klubgangers gevind.

    Hy kon nie kommentaar op die rusverstoringklagtes lewer nie.

  • Busbestuurder geskiet in Mamaloditaxi-oproer

    ‘n Busbestuurder is volgens berigte raakgeskiet en drie passasiers is beseer toe skote vanoggend op twee busse gevuur is naby Mamelodi in Pretoria.

    Nog passasiers is beseer deur gebreekte glas, het RSG berig. Berigte is ontvang van die skietery op die hoek van Solomon Mahlangurylaan en Pretoriaweg.

    Dit volg te midde van die onrus in Mamelodi oor busvervoer.

    Busse van die nuwe busdiens – Autopax – is vroegoggend met klippe bestook en Solomon Mahlangu-rylaan is met brandende voorwerpe versper.

    Taxi-operateurs is ontevrede omdat Autopax die roetes van die vorige busdiens Putco oorgeneem het en sê hulle is nie in die proses geken nie.

    Volgens onbevestigde berigte is twee vragmotors in die gebied ook deur protesgangers gekaap.

  • Nog dodelike malaria in Pretoria gediagnoseer

    Nog dodelike malaria in Pretoria gediagnoseer

    ’n Vrou van Hartbeespoort is verlede maand uit die bloute met ‘n dodelike vorm van malaria gediagnoseer, het Rekord Noord berig.

    Dokters het die 29-jarige Anneli Wydeman vir tien dae in ’n gekontroleerde koma gelaat om haar lewe te red.

    Sy is op 12 Junie uit in die Netcare Montana-hospitaal ontslaan en is stadig besig om die pad na herstel te loop.

    “Dit is onwerklik dat ek malaria opgedoen het. Ek was nêrens waar ek dit kon kry nie. Ek was wel ’n hele paar weke gelede net vir ’n naweek in Pilanesberg wat ’n malaria-vrye omgewing is. Dit spook by my.”

    Wydeman is met Plasmodium falciparum gediagnoseer, wat volgens die Wêreld-gesondheidsorganisasie (WGO) die dodelikste van die vier soorte malaria is.

    Sy sê sy het op 28 Mei ‘n hoë koors van 41°C gehad en het onmiddelik haar huisdokter besoek. Sy het aanvanklik vermoed sy het griep opgedoen, maar nie veel aandag daaraan gegee nie.

    Hoewel die dokters bloedtoetse laat doen het, het niemand vir malaria getoets nie. “Dit is mos nou die laaste ding wat op ’n persoon se brein is – malaria.”

    Sy sê op 30 Mei het haar man Wikus haar na die Montana-hospitaal vir verdere behandeling gebring.

    “’n Dokter het my net daar en dan vir malaria gediagnoseer. Malaria kan ’n mens se dood veroorsaak as jy dit nie vroeg genoeg ontdek nie.”

    Wydeman is die tweede slagoffer van malaria in die afgelope maand.

    Reinhardt Myburgh (14 maande) is vroeër in Mei ook in die Netcare Montana-hospitaal opgeneem nadat hy met malaria gediagnoseer is.

    Volgens WGO word malaria uitsluitlik deur die vroulike Anopheles muskiet oorgedra.

    ER24 woordvoerder Chitra Botha sê malaria-simptome verskyn so ‘n week of twee nadat iemand besmet is. Dit sluit in koors, hoofpyn, kouekoors, gewrigspyn, duiseligheid en naarheid.

  • Optiese kabels slaan aan die brand

    Optiese veselkabels wat op die Telkom-perseel in Capital Park geberg word, het dié week weens ’n grasbrand ook aan die brand geslaan.

    Swart wolke het swaar oor die Telkom-gebou in Capital Park gehang nadat optiese veselkabels aan die brand geslaan het, het Rekord Moot berig.

    Tshwane-nooddienste se woordvoerder Johan Pieterse sê die brand het omstreeks 16:15 ontstaan. “Telkom is baie naby aan ’n veld geleë en weens ’n aangrensende grasbrand het die kabels ook aan die brand geslaan.”

    Hy sê daar was geen skade aan die gebou nie en daar was ook geen beserings. Pieterse sê die brand was binne ’n uur geblus.

    Hy maan huis- en besigheidseienaars om seker te maak gras rondom en binne hul persele is kort gesny omdat die winter ’n seisoen vir grasbrand is.

  • Tshwane ignoreer omgedolwe oprit

    ‘n Montanapark-inwoner van Pretoria is warm onder die kraag na die plaveisel van haar oprit deur die Tshwane-metro in Desember opgegrawe is om ‘n gebarste waterpyp te herstel net so gelaat het.

    Volgens Charmaine van der Walt is die plaveisel van haar eiendom in Besembiesiestraat sedert Desember opgegrawe.

    “Die probleem het ontstaan nadat ‘n waterpyp gebars het. Na byna sewe dae het die metro die gebarste pyp herstel, maar die plaveisel net so omgedolwe gelaat. Na verskeie oproepe en e-posse het die metro belowe om iemand in Januarie te stuur om dit te herstel en ek wag nou nog,” het ‘n gefrustreerde Van der Walt gesê.

    Van der Walt het gesê sy probeer haar huis verkoop, maar geen kopers wil die huis hê met plaveisel voor die oprit wat omgedolwe is nie.

    Sy versoek die metro om die plaveisel so spoedig as moontlik te herstel om enige verdere ongerief te vermy.

    Die metro het op verskeie navrae van Rekord Noord wat aan hulle gerig is nie gereageer nie.

  • Liggaam van vrou in motor gevind

    Die liggaam van 34-jarige vrou is Maandagoggend in haar motor by Boardwalk Office Park in Faerie Glen, Pretoria gevind, het die polisie se woordvoerder ao Dave Miller gesê.

    Miller het gesê die motor is gevind in die parkeerterrein van die kantoorpark.

    ‘n Ooggetuie, wat anoniem wil bly, het gesê die vrou is glo by ‘n kafeerestaurant regoor die kantoorpark Sondagnag opgemerk.

    “Ek het by die kantoor opgedaag teen 07:50 en polisie op die toneel aangetref. Die liggaam is verwyder omstreeks 10:00. Van wat ons kon sien, was sy ‘n wit vrou.”

    Miller het gesê hy kan nog nie die tyd en die oorsaak van die onbekende vrou se dood bevestig nie.

    Hy het gesê ‘n nadoodse ondersoek sal gedoen word.

  • Duiweboer vermoor noord van Pretoria

    ‘n Boer Dinsdagaand op sy plaas in Bon Accord, noord van Pretoria, vermoor in die jongste plaasaanval.

    Johan Coetzee is met ‘n graaf doodgeslaan. Sy dogter het glo op haar pa liggaam in ‘n buitegebou op die plaas afgekom.

    ‘n Kluis is met ‘n slypmasjien oopgesny en ‘n vuurwapen asook kontant en reisdokumente word vermis.

    Coetzee was ‘n diereliefhebber en het ondermeer met duiwe geboer.

    Lt.Kol. Katlego Mokgale, polisiewoordvoerder, het die voorval bevestig en gesê ‘n saak van moord is aanhangig gemaak.

  • Huisbraak op video vasgevang

    ‘n Veiligheidskamera het Woensdagoggend ‘n huisbraak in Ninapark, Pretoria, waar verskeie waardevolle items gesteel is, op video vasgevang.

    Volgens Johan Roux (53), huiseienaar, het die voorval omstreeks 10:45 plaasgevind en het dit vier verdagtes net ses minute geneem om die voordeur oop te breek, ‘n paar waardevolle items te neem en weg te jaag.

    Roux was by die werk toe die voorval plaasgevind het, het die Moot Rekord berig.

    “Sover ons kon agterkom is televisies en hul afstandbeheerders, asook van my vrou se juweliersware gesteel. Ons kon nog nie vasstel presies wat alles weg is nie, omdat die forensiese-span vandag eers ‘n ondersoek kom doen het. Ons kon nog nie al die skade bepaal nie,” het Roux gesê.

    Sedert hy in 1993 in sy huis ingetrek het, het Roux nog nooit voorheen ‘n huisbraak gehad nie.

    “So paar jaar gelede het iemand oor ons muur gespring en ‘n fiets en ‘n paar ander items gesteel, maar ons het nog nooit voorheen met ‘n huisbraak probleme gehad nie.”

    Voor die inbraak het die verdagtes glo ‘n uur vroeër verby die huis gery, by die oprit ingery en ‘n rukkie daar vertoef, voordat hulle weer weggery het.

    Tydens die huisbraak het twee van die verdagtes die huis ingegaan, terwyl twee ander in die motor gewag het, het Roux gesê.

    Volgens polisiewoordvoerder Matthews Nkoadi, is die polisie nie bewus van die voorval nie.