praag.co.za

Tag: staking

  • Werkers by Delareyville-meul maak amok

    Werkers by Delareyville-meul maak amok

    Die N14-roete tussen Delareyville en Vryburg in Noordwes is weer oop vir verkeer nadat dit Dinsdagaand weens oproer moes sluit.

    Polisiewoordvoerder, Sabata Mokgwabone, sê die situasie is vanoggend kalm nadat die pad Dinsdag omstreeks 19:00 gesluit is weens stakende werknemers van Botselo Milling.

    Die meule in Delareyville behoort glo aan ‘n familie.

    Die betogers het die pad met brandende bande versper sodat verkeer van alternatiewe roetes moes gebruik maak.

    Hy sê die groep werknemers neem al die afgelope drie weke aan ‘n beskermde staking deel.

    Die openbare orde polisie het die situasie gemonitor.

    Volgens Mokgwabone is ‘n vragmotor teen middernag aan die brand gesteek deur die betogers. Niemand is beseer nie.

    Mokgwabone sê meer inligting sal later oor die voorval bekend gemaak word.

  • Nege beseer tydens vullis-staking

    Nege beseer tydens vullis-staking

    Nege mense is Woensdagmiddag beseer toe oproeriges van Pikitup gewelddadig geraak in Bertha Street in Braamfontein, Johannesburg.

    Volgens ER24 se woordvoerder Russel Meiring, is paramedici na die toneel ontbied, en by aankoms nege pasiënte op die sypaadjie aangetref.

    Hy het verduidelik dat paramedici die pasiënte behandel het op die plek en daarna na ‘n nabygeleë hospitaal vir verdere assessering geneem het.

    “Die pasiënte het klaarblyklik dié besering opgedoen tydens ‘n protesaksie,” het hy gesê.

    Die Johannesburgse metroraad het intussen die gedrag van stakende werkers van die afvalverwyderingsmaatskappy Pikitup, skerp veroordeel.

    Die werkers wat sedert Maandag staak, het die middestad tydens ‘n optog na die maatskappy se hoofkantoor met vullis bestrooi en klippe na die polisie gegooi voordat hulle met rubberkoeëls uiteeengejaag is.

    ‘n Lid van die Burgermeesterskomitee vir Omgewingsake en Infrastruktuurdienste, Matshidiso Mfikoe, sê dit is onaanvaarbaar dat werkers onwettig begin staak, ‘n hofbevel ignoreer om terug te keer werk toe, en voortgaan om die stad te bevuil.

    Pikitup se woordvoerder Jacky Mashapu het gesê die maatskappy sal die beginsel van geen werk, geen betaling nakom en sal werknemers wat deelneem aan die onwettige staking uitsluit.

    “Ons is besig om onvermoeid te verseker dat dienste so gou as moontlik herstel word,” het hy gesê.

    Pikitup het verder aangedui dat inwoners aangemoedig word om vullisdromme in hul eiendom te hou tot tyd en wyl alternatiewe reëlings getref kan word vir verwydering.

    Maatreëls om opgehoopte vullis te verwyder sal deur die maatskappy gekommunikeer word.

  • Nog ‘n Nasionale Sleutelpunt sneuwel voor rooi gevaar

    Die Parlement sal twee dae langer in sitting wees nadat lede van die vakbond, Nehawu, die raadsaal van die Nasionale Vergadering (NV) in Kaapstad is Dinsdagoggend binnegestorm het.

    Die werkers staak nadat onderhandelings oor hul bonusse `n dooiepunt bereik het.

    Die voorsitter in die Nasionale Raad van Provinsies, Thandi Modise, sê nog onderbrekings sal nie geduld word nie.

    Sy het by `n mediakonferensie gesê die feit dat hulle nie `n hofbevel teen die werkers gebruik het nie, beteken nie dat die parlement te bang of swak is nie.

    Volgens haar, is alles moontlik gedoen om wat Dinsdag gebeur het, te verhoed. Die NV is ’n nasionale sleutelpunt.

    Stakende werkers in rooi het die openbare galery beset met dreunsang en bontspring. Hul aanvoerders het gesê die werkers is gereed vir enigiets.

    Polisielede het buite die raadsaal rondgestaan.

    “Ons werk hier. Hulle kan nie meer skuil agter verskonings van ’n nasionale sleutelpunt nie. Ons moet wys ons is ernstig.”

    Nehawu en die bestuur van die parlement kon nie oor persentasieberekenings vir prestasie­bonusse ooreenkom nie. Die Nehawu-staking duur voort.

  • Ramaphosa weier om vrae oor Marikana te beantwoord

    Adjunk-president Cyril Ramaphosa kon nie vrae oor Marikana in die parlement beantwoord nie, nadat ‘n dagvaarding teen hom uitgereik is oor sy aandeel in die slagting.

    Gebeure in Marikana in Augustus 2012 het daartoe aanleding gegee dat die families van 34 mynwerkers wat deur die polisie doodgeskiet is, Ramaphosa weens aandadigheid aan hul dood dagvaar.

    Die dagvaarding op hom persoonlik sowel as twee ander partye beteken.

    Ramaphosa was ‘n direkteur van die Lonmin-platinummyn toe hy glo opdrag gegee het dat die stakers geskiet moet word.

    Ramaphosa het gesê dit sal onvanpas wees vir hom om oor Marikana te praat as gevolg van die dagvaarding.

    Hy het gereageer op ‘n parlementêre vraag oor die vordering wat gemaak is met ‘n alternatiewe geskilbeslegtingproses rakende siviele eise tov Marikana.

    Kort daarna het die presidensie in ‘n verklaring bevestig dat die dagvaarding uitgereik is.

    Ramaphosa het reeds sy prokureurs opdrag gegee om die dagvaarding teen te staan, het sy woordvoerder Ronnie Mamoepa in ‘n verklaring gesê.

    Hy het voorheen bewerings ontken dat hy druk op die polisie geplaas het om die onwettige staking te beëindig.

  • Onbeskermde staking kan Johannesburg donker laat

    Die munisipale werkersvakbond SAMWU het gewaarsku dat sy staking wat aanstaande Maandag begin, daartoe sal lei dat die hele Johannesburg en sy voorstede in duisternis gehul sal wees.

    Die vakbond sê hy het Johannesburg City Power ingelig van sy voorneme om met ‘n volskaalse staking te begin, het RSG berig.

    City Power sê die staking is onbeskermd. SAMWU voer aan dat City Power en sy Raadsvoorsitter nie aandag gegee het aan kwessies wat verband hou met korrupsie teen City Power se besturende direkteur nie.

    City Power sê SAMWU se optrede sal neerkom op sabotasie. City Power sê hy is ‘n Nasionale Sleutelpunt en enigeen wat dreig om die kragnetwerk onwettig af te skakel, kan vervolg word.

    Die Kommissie vir Versoening, Bemiddeling en Arbitrasie het ook nie ‘n sertifikaat uitgereik aan SAMWU nie wat die staking onwettig maak.

    City Power sê hulle het sonder sukses by talle geleenthede SAMWU gevra om sy bewerings van korrupsie teen die besturende direkteur te staaf.

  • Steenkoolmyners staak

    Die getal lede van die NUM wat in die steenkoolbedryf staak, sal na verwagting vandag tot sowat 30 000 styg.

    Die staking het gister traag begin omdat die meeste myne op Sondae gesluit is.

    Duisende lede van die NUM sal na verwagting in Witbank in Mpumalanga, nou genoem Emalahleni, aan ‘n optog deelneem.

    Dit is die tuiste van talle steenkoolmyne in die land.

    ‘n Woordvoerder van die NUM se Hoëveldstreek in Mpumalanga, Nelson Ratshoshi, sê hulle aanvanklike eis vir die laags-besoldigde werkers was R3000, wat hulle later tot R1000 afgeskaal het.

    Die werknemers bied R300 aan.

  • Waterstaking kan 11 miljoen mense raak

    Meer as 11 miljoen mense staar moontlike watertekorte in die gesig as werkers by Rand Water begin staak.

    Samwu het gewaarsku dat krane kan droog loop indien die maatskappy nie reageer op die werkers se eise nie.

    Sowat 4000 lede van die unie – betrokke in beide die behandeling en verspreiding van water – het Maandag kennis gegee van hulle voorneme om te staak.

    Onderhandelinge het in duie gestort toe Samwu die aanbod deur die watermaatskappy verwerp het. Die twispunte handel oor salarisverhogings, behuisingstoelae en bonusse.

    Die watermaatskappy sê daar is tydens ‘n vergadering met vakbonde wel bevestig dat die ooreenkoms oor minimum-diensvlakke nie betwis sal word nie.

    “Ons volgende afspraak met Rand Water sal op die strate wees,” het Samwu gewaarsku.

    Rand Water het egter die versekering gegee dat hy steeds hoë gehalte drinkwater aan sy al kliënte sal verskaf, selfs al staak sy werkers.

    Indien die staking voortgaan kan inwoners in Johannesburg, Pretoria en dele van Mpumalanga geraak word.

  • MTN sê staking raak net Limpopo, Mpumalanga

    Die selfoonmaatskappy, MTN, sê nie alle dienssentrums in Suid-Afrika word deur die staking by die maatskappy geraak nie, het RSG berig.

    Van die dienssentrums in Limpopo en Mpumalanga was buite werking weens die staking deur werkers van die kommunisiekasiewerkersvakbond, CWU.

    Vroeër het intekenare van MTN gekla dat hulle tussen 30 minute en ‘n uur moet aanhou indien hulle die 173-dienssentrum skakel.

    Die stakende werkers sê die maatskappy bied net ‘n bonus van vier persent vir 2014 aan.

    Die bestuurshoof van MTN-SA, Ahmed Farouk, het vroeër ‘n griefskrif van stakende werkers by die maatskappy se hoofkantoor in Johannesburg in ontvangs geneem.

    Die maatskappy se hoof van menslike hulpbronne, Themba Nyathi, sê in Kaapstad was daar ontwrigting, maar dat dit reeds reggestel is.

  • AMCU-lede by Aquariusmyn eis hoër lone

    Duisende mynwerkers van die vakbond AMCU mobiliseer weer vir beter lone.

    Die mynwerkers is tans in diens van die Aquarius-platinummyn by Rustenburg in Noordwes.

    Die AMCU-lede het ‘n mandaat aan sy leierskap gegee om ‘n salarisverhoging te eis vir ‘n minimumloon van R12 500.

    Lede het gister na ‘n massavergadering gehou is, op die eisom ‘n verhoging besluit.

    Die platinumbedryf wat grootliks in die gebied gesetel is, het verlede jaar onder ‘n vyfmaandelange staking deurgeloop.

    Een van AMCU se vloerorganiseerders sê hulle wil die bestuur by die Aquariusmyn dwing om die minimumlone aan te pas soos dié wat werkers by die groter myne, Lonmin en Impala, verdien.

    Hy sê die minimumloon by Aquarius is tans R5 600.

    President Jacob Zuma het intussen gesê hy sal slegs die bevindings en aanbevelings van die Marikana-kommissie van ondersoek bekendmaak, nadat hy dit deeglik oorweeg het.

    Aanduidings is dat die kommissie bevind het dat die polisie vir die skietery tydens die platinummynstaking verantwoordelik was waarby AMCU betrokke was.

    Hy het vrae in die Nasionale Raad van Provinsies beantwoord. Zuma sê die verslag moet behoorlik bestudeer word.

    Die Regshulpraad het vroeër in die Konstitusionele Hof betoë gelewer in verband met die hooggeregshof-beslissing wat gelas het dat die organisasie die Marikana-beseerdes en die wat in hegtenis geneem is, se regskoste by die ondersoek moet betaal.

    Die Regshulpraad kla dat die uitspraak `n duur presendent kan skep vir toekomstige kommissies van ondersoek.

    Die Regshulpraad se hoof-regsbeampte sê die hofbeslissing sal meebring dat geld weggeneem word van mense met `n geldige eis en die raad se hulp nodig het, veral vroue en kinders.

  • Medupi-werkers staak lustig voort na hofbevel

    Konstruksiemaatskappye wat betrokke is by die bou van die Medupi-aanleg op Ellisras (Lephalale) in Limpopo stuur steeds teksboodskappe aan werkers waarin hulle aangesê word om terug te keer werk toe.

    Kontrakteurs en Eskom het verlede week ‘n hofbevel bekom wat gelas dat die werkers hulle staking beëindig, het RSG berig.

    Die meerderheid van die werkers gaan egter voort met hulle onbeskermde staking wat nou reeds bykans vier weke lank duur, ondanks die gevaar dat hulle afgedank kan word.

    Volgens die Eskom-woordvoerder, Khulu Phasiwe meld minder as tweeduisend van die sowat 16 000 werkers daagliks vir diens aan.

    Hulle maak van openbare vervoer gebruik in plaas van die busse wat deur Eskom verskaf word om intimidasie te vermy.

    Daar is vroeër bekendgemaak dat die voltooiing van Medupi, asook die Kusile-aanleg, verder deur die voortslepende arbeidsonrus vertraag gaan word.

  • Honderde pasiënte ly onder staking

    Honderde pasiënte met spesiale behoeftes is aan hulle eie genade oorgelaat nadat verpleegsters by ‘n hospitaal op Tzaneen in Limpopo begin staak het, het RSG berig.

    Die provinsie se Departement van Maatskaplike Ontwikkeling, sê hy sal met die diensverskaffer in verbinding tree wat die Shiluvanahospitaal bestuur.

    Werkers en verpleegsters staak onwettig oor wat hulle sê swak werksomstandighede is.

    Die hospitaal huisves sowat 200 pasiënte. ‘n Woordvoerder van die Departement, Adel van der Linde, sê dit is baie belangrik om te verseker dat dienste steeds gelewer word, en hulle sal daaroor met die werkgewer in gesprek tree.

  • Medupi-stakers terug werk toe met netwerk onder groter druk

    Die Nasionale Mynwerkersunie, Numsa, sê geskorste werknemers van die Medupi-kragstasie in Ellisras (Lephalale) sal na verwagting môre terugkeer werk toe. Dié aankondiging kom te midde van groot druk op die kragleweringsnetwerk.

    Eskom het Woensdagaand fase-drie beurtkrag ingestel, en sê die kragnetwerk is tans kwesbaar.

    Nuus24 berig ten minste 1 500 werknemers is uit die kragstasie gesluit nadat hulle ‘n bonus vir die voltooiing van eenheid 6 geëis het.

    Numsa-streekswoordvoerder, Mahlodi Modike, sê hulle sal steeds vandag met werknemers vergader om die voorstel van die werkgewer te bespreek. Sommige van die werkers het boodskappe ontvang dat hulle geskors is, terwyl ander bloot uitgesluit is.

    Dié aksie het tot die staking aanleiding gegee.

    Eskom en Numsa het drie dae lank onderhandel, waarna die geskorste werkers uiteindelik toegelaat is om terug te keer werk toe. Die bonuseis is egter nog nie uitgeklaar nie.

    Eskom het intussen aangekondig dat Fase Twee beurtkrag van sesuur vanoggend tot tienuur vanaand hervat sal word.

    Die kragvoorsiener sê die netwerk is onder druk weens opwekkingseenhede wat buite werking is. Fase Drie beurtkrag is Woensdag ingestel nadat geskeduleerde onderbrekings sedert Sondag voorkom.

    Die Johannesburgse elektrisiteit-nutsmaatskappy City Power het bekend gemaak dat ‘n nuwe stelsel in werking gestel word.

    Volgens die kragbeperking-stelsel sal krag na huishoudings gesny word wat elektrisiteit buitensporig gebruik. Dit sal egter slegs geld vir huishoudings met slim-meters.

    Die burgemeester van Johannesburg, Parks Tau wat die loodsfase in Aspen Hills bekend gestel het, sê verbruikers sal aangemoedig word om krag tydens dié tydperke spaarsaam te gebruik.

  • Beurtkrag tap miljarde van ekonomie

    Eskom se beurtkrag kos die SA ekonomie tussen twintig en tagtig miljard rand per maand.

    Dit is volgens ‘n voorlegging wat die Departement van Openbare Ondernemings vandag aan die Parlement maak.

    Eskom se raad gaan na verwagting ook vandag op ‘n spesiale vergadering oor die toekoms van sy voorsitter, Zola Tsotsi besluit.

    Die vergadering by Megawatt Park kom te midde van berigte dat Eskom se voormalige uitvoerende hoof, Tshediso Matona sy skorsing ook vandag in die Arbeidshof gaan betwis. Tsotsi het vroeër aangekondig dat Matona en drie ander senior bestuurders gevra is om hul poste te ontruim.

    Intussen word berig dat werkers by die Medupi-kragaanleg met ‘n een dag lange staking besig is. Die staking gaan na bewering oor swak lewenstoestande en hoër lone.

  • Poskantoor dreig om stakers af te dank na ooreenkoms

    Die Poskantoor het gedreig om werkers af te dank as hulle nie Maandag vir werk opdaag nie.

    ‘n Span is deur die minister van Pos- en Telekommunikasie, Siyabonga Cwele en die minister van Finansies, Nhlanhla Nene aangestel om die Poskantoorstaking by te lê.

    Die hoof van die ingrypingspan, Simo Lushaba is deur die twee ministers aangewys om stakende werkers te oorreed om terug te keer werk toe.

    Lushaba het die naweek gesê dat die diens reeds van sy werksaamhede hervat het.

    Die Poskantoor het Vrydag ‘n salarisooreenkoms met twee vakbonde bereik nadat hulle tot ‘n verhoging van 6,5 persent ingestem het.

    Die vakbond, CWU, wat 39 persent van die posdiens se werkers verteenwoordig, het die aanbod egter verwerp.

    CWU eis ‘n verhoging van 7,5 persent.