Mandela word sedert Woensdagmiddag by dié hospitaal behandel.
Sy het haar oë afgevee en haar neus geblaas toe sy omstreeks 13:30 die hospitaal verlaat het.
Graca Machel is ook opgemerk toe sy omstreeks 15:00 Donderdag by die hospitaal opgedaag het. Kort voor Graca se aankoms het die emosionele Winnie Madikizela-Mandela die perseel verlaat, het Sapa berig.
Madikizela-Mandela was saam met Mandela se oudste kleinseun, hoofman Mandla Mandela, en ander familielede.
Volgens Reuters is Mandela steeds in die Milpark-hospitaal nadat een van sy longe platgeval het. Hy is glo nie in ‘n waakeenheid nie.
“Hy is ingeneem vir ‘n roetine ondersoek en dokters het besluit om hom in die hospitaal te hou vir observasie. Hy is nog nie gesond nie, maar sal moontlik Vrydag ontslaan word.”
Mediese beamptes wou dié inligting nie bevestig nie.
Waarnemende president, Kgalema Motlanthe, het aan die SABC gesê dat Mandela “nog lewe en dat hy nie gesterf het nie.”
Hy het alle Suid-Afrikaners, asook die wêreld, verseker dat Mandela goed versorg word.
Politieke leiers, familielede en ANC-glanspersoonlikhede het Donderdag te danke aan die media-aandag die hospitaal oorval wat deur ‘n militêre kordon afgesper is. IVP-leier Buthelezi het na dié toestroming as ‘n “sirkus” verwys.
Die ANC het ook Donderdag Suid-Afrikaners tot kalmte gemaan.
“Laat ons asseblief nie onnodig paniekknoppies druk nie,” het Jackson Mthembu, woordvoerder van die ANC, aan die eNews-kanaal gesê.
“Daar is niks kritiek waarvoor hy hospitaal toe is nie.”
“As daar enige verwikkelinge is, sal die Nelson Mandela-stigting en Mandela se familie ons almal in kennis stel,” het Jackson gesê.
Leave a Reply
You must be logged in to post a comment.